Бөгөнгө мәғлүмәттәргә ҡарағанда, шартлы мал башына 8,2 центнер мал аҙығы йыйып алынған, был планлаштырылған күләмдең 33 проценттан ашыуын тәшкил итә. 660 мең тонна сенаж, 246 мең тонна бесән һәм 5 мең тонна силос йыйып алынған. Бесән әҙерләү буйынса Әлшәй һәм Борай райондары алдынғылыҡты бирмәй. Был райондарҙа 10 мең тоннанан ашыу мал аҙығы әҙерләнгән. Сенажды иһә Илеш һәм Ауырғазы райондары иң күбе әҙерләгән — 60 һәм 55 мең тонна. Салауат ЗАРИПОВ, Борай районының “Зарипов” крәҫтиән-фермер хужалығы етәксеһе: - Бесәндең сифаты уны әҙерләү ваҡытына ныҡ бәйле. Әгәр бесән сифатһыҙ икән, тимәк, һөттөң дә сифаты булмаясаҡ. Ә һөт беҙҙең хужалыҡтың төп килем сығанағы булып тора. Шуға ла ҡояшлы көндәрҙе ҡулдан ысҡындырмаҫҡа кәрәк. Быйылғы һауа торошон аңлап булмай. Төшкә 30 – 35 градус эҫе булһа, ярты сәғәттән болоттар йыйылып, ямғыры яуа. Шуға ла эште тиҙләтергә кәрәк. Бөгөн хужалыҡта 70 гектар бесән сабылды. Сапҡыста Максим Мөхәмәтйәнов эшләй. Сабылған бесәнде әйләндереп, дүрт бакуйҙан берәүгә Иван Йөҙбахтин һала. Эш гөрләй. Быйыл бесән мул, – ти фермер. Ә һеҙ бесәнгә төштөгөҙмө? Әллә ямғырҙар ҡамасаулаймы? Фотолар Башҡортостан Ауыл хужалығы министрлығынан алынды.