Бәләбәйҙең шәп егете яуҙа ла һынатмай

Махсус хәрби операция биләмәһенә командировка мәлендә танышҡан Бәләбәй егете – “Механик” позывнойлы яугир алсаҡлығы, ихласлығы менән күңелде яуланы. Ҡаҡса буйлы, йәш кенә күренһә лә, Динар өс бала атаһы булып сыҡты, ярайһы уҡ донъя күргән, әрмелә хәрби сынығыу алған, тыуған төйәгендә механизатор булып тырышып эшләгән. “Механик” тигән позывнойҙы ла яратҡан һөнәренә бәйле һайлаған. “Бөтә аңлы ғүмерем техника менән бәйле: армияла водитель булдым, ҡайтҡас, тракторға ултырҙым”, – ти ул. Махсус хәрби операцияға юлланыуын “Механик” түбәндәгесә аңлатты: – Егеттәр контракт төҙөп китә башланы. Миндә лә шул теләк барлыҡҡа килде, ситтә ҡала алманым. Шаштырыу түгел: илһөйәрлек рухы ла ошо аҙымды яһарға әйҙәне. Шулай итеп, “Башҡортостан” полкына яҙылдым, – ти яугир. Һөнәренә ярашлы, водитель булыу мөмкинлеге булһа ла, уҡсы булырға ҡарар итә. “Механик” оҙаҡ ваҡыт алғы һыҙыҡта гранатометсы була, бик яуаплы, хәл иткес һөжүмдәрҙә ҡатнаша. Тәүге алышты ла кисәге кеүек яҡшы хәтерләй. – 12 кеше индек. Әлбиттә, күңелдә ҡурҡыу ҙа, шом да булды. Ни тиһәң дә, тәүге тапҡыр ине бит. Ошо алышта бер иптәшебеҙҙе юғалттыҡ. Һуғыштың бөтә аяныслы хәҡиҡәтен шунда аңлағанмындыр. Үҙем дә яраландым, әммә йәрәхәтем еңел ине: снаряд ярсығын үҙем тартып алып эшкәрттем, – тип һөйләй Бәләбәйҙең батыр егете. “Ә артабан нисек булды? Штурмға барыуға өйрәнеп китеп буламы? “ – тип һорайым. – Эйе, өйрәнәһең. Таһыллыҡ барлыҡҡа килә, тәжрибә туплана, әммә иң ауыры – әҙерлек, йәғни көтөү мәле. Хәрәкәт итә башлаһаң, барыһы ла нисектер аңлайышлы кеүек, тик алға ынтылаһың. Йырлай-йырлай һөжүмгә барған саҡтар ҙа булды. Үҙебеҙҙе шулай дәртләндерәбеҙ, рухты нығытабыҙ. Илап, һыҡтап, штурмға барып булмай. Ундай кәйефтә булһаң, бер нимә лә килеп сыҡмай, – ти “Механик”. Ҡыҫҡа ваҡытлы ялға сыҡҡан бер арала һәр төрлө техника нескәлектәрен һәйбәт белгән “Механик”тан кухнялағы сафтан сыҡҡан мейестәрҙе ҡарауҙы һорайҙар. Йүнәтеп бирә. Ошо хәлдән һуң матди тәьминәт ротаһы командиры, “бер ҡайҙа ла ебәрмәйем, бөгөндән һин беҙҙеке!” тип, уны үҙ ҡарамағына алыуҙы юллай. Хәҙер Бәләбәй яугире хеҙмәтен ошо йүнәлештә намыҫлы дауам итә. Алғы һыҙыҡ булмаһа ла, бындағы хеҙмәт тә бик яуаплы, “прилёттар” ҙа булып тора. Шулай, һуғыш шарттарында хәүеф һәр ерҙә һағалай. Һәр яугир кеүек, Динар яуҙаштары, хәрби дуҫтары тураһында бик ихлас һөйләне. Айырыуса тәүге һөжүмгә бергә барған Ишембай егете Рәдимде бер туғанылай күреүен әйтте. Ҡариҙел районынан Артур менән бер блиндажда йәшәгәндәр. “Улар менән күпте күрҙек, күпте кисерҙек. Бына ошо ике “братым” бар инде”, – ти “Механик”. Шулай уҡ яугир республика етәкселегенең даими хәстәрен тойоуҙары, яҡташтарҙың ҙур ярҙам күрһәтеүе тураһында ла әйтте. “Әле яңыраҡ тракторға запас частар кәрәккәс, райондаштарға мөрәжәғәт иттем. Күп ваҡыт та үтмәне, “Барыһы ла әҙер, ебәрәбеҙ”, тигән сәләм килеп төштө”, – тине ғорурланып. Динар сығышы менән Бәләбәй районының Тоҙлоҡыуыш ауылынан. Тыуған төйәгендә ата-әсәһе, яратҡан кәләше, өс балаһы, туғандары көтә. Ғаиләһе менән Бәләбәй ҡалаһында төпләнгән. Ҡыҙы Ильвинаға – ун, улы Данирға тиҙҙән биш тула, ә кинйәкәйе Самираға – ике йәш. Яугир ноябрь айында һәм күптән түгел ҡыҫҡа ваҡытлы ялда булған. – Отпуск бик ҡыҫҡа, күҙ асып йомғансы тигәндәй, үтә лә китә. Күберәк ғаилә, балалар янында булырға тырышам. Атай-әсәй, бер туған ҡустым, туғандар менән аралашырға ла ваҡыт бүлергә кәрәк. Барыһы ла борсолоп, һағынып көтөп тора бит, – ти яугир. Әңгәмә һуңында ул: “Иң мөһиме – иҫән-һау булайыҡ! Көтөгөҙ, беҙ ҡайтырбыҙ!” – тине көр тауыш менән. “Механик”тың ошо изге теләге мотлаҡ тормошҡа ашһын һәм ирҙәрсә ҡыйыу ҡарар ҡабул итеп, беҙҙең именлек һағына баҫҡан яугирҙәребеҙ барыһы ла имен-һау уларҙы көткән ғәзиз кешеләре янына әйләнеп ҡайтһын! ӘЙТКӘНДӘЙ Хәтерегеҙгә төшөрәбеҙ, контракт төҙөү мәсьәләләре буйынса республика халҡы берҙәм 177 белешмә номеры буйынса, Ситуация үҙәгенә 122 йәки (347) 218-19-19-19 телефондара аша, “Минең документтарым” күп функциялы үҙәгенең яҡындағы офисына мөрәжәғәт итә ала. Шулай уҡ булған һорауҙарға яуапты башбат.рф сайтында, контракт буйынса хәрби хеҙмәткә инергә теләүселәр өсөн һәм уларҙың ғаилә ағзаларына социаль ярҙам саралары тураһында "Телеграм"да мәғлүмәт таба алаһығыҙ. Башҡортостанда контракт буйынса хәрби хеҙмәткә йыйыу дауам итә. Мобиль пункттар республиканың барлыҡ ҡала һәм райондарында эшләй. Бында йыйыу тәртибе, льготалар һәм түләүҙәр тураһында консультация бирәләр, ниндәй документтар кәрәклеген аңлаталар. Дәүләт менән килешеүҙе пенсияға сыҡҡан запастағы хәрбиҙәр, саҡырыу буйынса сроклы хеҙмәттән һуң эшенән киткәндәр, шулай уҡ армияла булмаған, ләкин юғары йәки урта профессиональ белем алған ир-егеттәр ҙә төҙөй ала. Рядовойҙан алып прапорщикка тиклем контракт буйынса хәрби хеҙмәткә 65 йәшкә тиклемге ир-егеттәр ҡабул ителә. Авторы - В. УРАЗБАЕВ. Луганск Халыҡ Республикаһы. Автор фотоһы.