8 июлдә Башҡортостан Башлығы Радий Хәбиров уҙғарған аҙналыҡ оператив кәңәшмәлә торлаҡ-коммуналь хужалыҡ объекттарының алдағы йылытыу миҙгеленә әҙерлеген тикшерҙеләр. Республиканың торлаҡ-коммуналь хужалыҡ министры Ирина Голованова хәбәр итеүенсә, 8 июлгә тармаҡтың ҡышҡа әҙерлеге 42 процент тәшкил итә. Төбәктә яңы йылытыу миҙгеленә 18,5 мең күп фатирлы йортто әҙерләү бурысы тора. Уларҙың яртыһында йорт эсендәге йылытыу системаларын йыуыу, эске йылытыу һәм эҫе һыу менән тәьмин итеү системаларының көйләү һәм тоташтырыу арматураһын тикшереү үткәрелгән. Күп фатирлы йорттарҙың туғыҙ проценты ҡышҡы шарттарҙа файҙаланыуға әҙерлек паспорттары алған. – Әҙерлек темптары үткән йылдар кимәленә тап килә. Эштәр штат режимында бара, – тине Ирина Голованова. – Йылытыу миҙгеленә иң юғары әҙерлекте Архангел, Әлшәй, Нуриман, Дәүләкән райондары күрһәтә. Башҡортостандың торлаҡ-коммуналь хужалыҡ министры республиканың йылылыҡ менән тәьмин итеү системаларын яңыртыу буйынса эште дауам итеүен өҫтәне. Атап әйткәндә, Милли именлек фонды средстволарын йәлеп итеп, Краснохолмский ауылындағы ҡаҙанлыҡты реконструкциялайҙар һәм Учалыла яңы ҡаҙанлыҡ төҙөйҙәр. Бынан тыш, коммуналь инфраструктураны яңыртыу программаһы сиктәрендә 2024 йылда Яңауылда, Күмертауҙа һәм Шишмәлә йылылыҡ менән тәьмин итеү селтәрҙәрен капиталь ремонтлау эштәре алып барыла. Шулай уҡ күп фатирлы йорттарҙа елләтеү каналдарының һәм төтөн йөрөтөүселәрҙең эшләүен тикшереү дауам итә. Бындай 14 меңдән ашыу йорт тикшерелгән дә инде. Әбйәлил, Асҡын, Баҡалы һәм Күгәрсен райондарында көҙгө-ҡышҡы осорға әҙерләнеүгә ҙур иғтибар бүленә. Ирина Голованова Белореттағы хәлгә ентекле туҡталды, унда уҙған ҡыш коммуналь авариялар булды. – Белоретта ҡатмарлы йылытыу миҙгеле үтте. Шуға күрә 2024 йылда республика бюджетынан ҡаланың йылылыҡ менән тәьмин итеү селтәрҙәрен капиталь ремонтлауға 100 миллион һум бүленде, - тип хәбәр итте республиканың торлаҡ-коммуналь хужалыҡ министры. - Эксперт советында был объектты Республика адреслы инвестиция программаһына индереү мөмкинлеген ҡарау өсөн Башҡортостан Хөкүмәтенә Белореттың йылылыҡ менән тәьмин итеү селтәрҙәрен реконструкциялауға өҫтәмә рәүештә 384 миллион һум суммаға документтар пакеты ебәрелде. Башҡортостан Башлығы республика Хөкүмәтенә Мәғариф һәм фән министрлығы һәм Мәҙәниәт министрлығы ҡарамағындағы газ үткәрелмәгән объекттарҙы газ менән йылытыуға күсеүҙе әүҙемләштерергә, шулай уҡ ошо маҡсатҡа финанслауҙы күҙ уңында тоторға ҡушты. Фото: Башҡортостан Башлығы сайты.