Башҡортостан Хөкүмәте Премьер-министры Андрей Назаров етәкселегендәге республика делегацияһы халыҡ-ара “Рәсәй” форум-күргәҙмәне ябыу тантанаһында ҡатнашты. Күргәҙмәнең ойоштороу комитеты рәйесе, Рәсәй Президенты Хакимиәте етәксеһенең беренсе урынбаҫары Сергей Кириенко күргәҙмәгә ҙур өлөш индергән төбәктәргә рәхмәт белдерҙе. – Күргәҙмәлә 18 миллиондан ашыу кеше булды, был беҙ уйлағандан күберәк булып сыҡты. Эш һанда ғына түгел, ә сифатта – кешеләрҙең уй-тойғоларында. Дүрт ай әҙерлек һәм һигеҙ ай эш барышында был эштә ҡатнашҡан кешеләр күңелдәрен һалып эшләне –президент һәм губернаторҙарҙан башлап корпорациялар, предприятиелар, журналистар, ирекмәндәр һәм эшселәргә тиклем, – тип билдәләне Сергей Кириенко. Андрей Назаров әйтеүенсә, республика күргәҙмә дауамында төрлө өлкәләрҙә үҙенең ҡаҙаныштарын һәм ҡеүәтен күрһәтте, инновация проекттарын һәм технологияларын ғына түгел, яңы идеяларға һәм партнерлыҡҡа асыҡлығын да билдәләне. – Космолет рәүешендәге Башҡортостан стенды публикала ҙур ҡыҙыҡһыныу уятты, бындайҙы әлегә бер кемдең дә яһағаны булманы. Беҙ үҙебеҙҙең мәнфәғәттәребеҙҙе һәм биләмәбеҙҙе үҫтереүҙәге эшебеҙҙе күрһәттек. Артабан да башҡа төбәктәр һәм илдәр менән хеҙмәттәшлекте дауам итәсәкбеҙ. “Рәсәй” күргәҙмәһендә ҡатнашыу ошо йүнәлештәге уңышлы аҙым булды, һәм республика инновациялар һәм инвестициялар өсөн уңайлы мөхит тыуҙырыуға йүнәлтелгән проекттарға һәм башланғыстарға әҙер, – тине етәксе. Халыҡ-ара күргәҙмә асылғандан алып Башҡортостан командаһы утыҙҙан ашыу тематик көн-аҙналар, 300 оҫталыҡ дәресе, 51 презентация үткәрҙе. 3 декабрҙә Мәскәүҙә Башҡортостан республикаһы көнө үткәрелде, уның күркәм өлөштәренең береһе “Ҡышҡы һабантуй” булды. Күргәҙмәлә биш пар никахлашты, республика дауаханаларына 12 путевка уйнатылды, күстәнәстәре менән килеүселәрҙе һөйөндөрҙө. “Башҡортостан Башлығы Радий Хәбиров һәм үҙемдең исемдән күргәҙмәнең көндәлек эшенә ҙур өлөш индергән министрлыҡтарға һәм ведомстволарға, райондарға, киң мәғлүмәт сараларына һәм, әлбиттә, ҡатнашыусыларға рәхмәт белдерәм, – тине Андрей Назаров социаль селтәрҙәге битендә. Фото:https://pravitelstvorb.ru/news/24369/