Һаулыҡ һаҡлау министры Айрат Рәхмәтуллин социаль селтәрҙә республиканың сағыу профессионалдары тураһында һөйләргә булған. Ни өсөн улар тап ошо һөнәрҙе үҙ иткән? Ни өсөн улар эштәрен ярата? “ Минең тәүге геройым – Вил Мамил улы Тимербулатов, хирург, профессор, медицина фәндәре докторы, Рәсәйҙең атҡаҙанған табибы һәм ... химик була алмай ҡалған шәхес! Бына уның тарихы. “ Мәктәптә мин яҡшы уҡыным, химияны яҡшы белдем, олимпиадаларҙа еңеүсе булдым, БДУ-ның химия факультетына имтиханһыҙ ҙа уҡырға инә ала инем. Химия уҡытыусыһы, бына тигән педагог һәм үҙенсәлекле шәхес Гәрәй Нурғәле улы Өмөтбаев минең уның эшен дауам итеүемде теләне. Вузға инергә әҙерләне, өлкән кластарҙа вуздар өсөн химия буйынса китаптарҙы бер нисә тапҡыр уҡып сыҡтым. Тик мин химия тураһында ғына түгел, медицина тураһында ла уйландым. Табип булырға яҙһа, бары хирург буласаҡмын! Шуға күрә БДУ-ның ҡабул итеү комиссияһынан документтарымды алып, Башҡортостан медицина унверситетына илттем. Имтихандарҙы “бишле”гә тапшырҙым. Әлбиттә, Гәрәй Нурғәле улының быны ишетеп, кәйефе төштө, үпкәләне, оҙаҡ ҡына минең менән һөйләшмәй йөрөнө. Аҙаҡ ул минең пациентым булды – ашҡаҙанына операция яһаным. Уҡытыусым мине ғәфү итте: ”Һин табип булырға ҡарар итеп дөрөҫ эшләнең”, - тине. Үҙебеҙҙең профессияла мин нимәне барыһынан элек баһалайым? Кешеләргә ярҙам итеү мөмкинлеген. Кемгәлер сәләмәтлеген йәки ғүмерен һаҡлап ҡалырға ярҙам иткәндә ниндәй ҙур шатлыҡ кисерәһең! Ни өсөн медицинаны һайланым? Моғайын, хирургия химияға ҡарағанда ҡыҙыҡлыраҡ тойолғанғалыр. Унда бит спорттағы кеүек – һәр саҡ алға хәрәкәтләнергә, сирҙе еңергә ынтылырға, һөҙөмтәһен белмәйенсә тәүәккәлләргә тура килә”, – тип һөйләне остаз. Фото: Һаулыҡ һаҡлау министрлығының матбуғат хеҙмәте.