Өфө ҡунаҡтар ҡабул итте

Бөгөн Өфөлә Башҡортостан Башлығы Радий Хәбиров Рус география йәмғиәтенең төбәктәр советының күсмә ултырышында һәм йәштәр слетында ҡатнашты. Көн тәртибендә үткән йылға йәмәғәт ойошмаһының төбәк бүлексәләренең эшмәкәрлегенә йомғаҡ яһалды, алдағы осорға эш бурыстары билдәләнде. Ултырышты асып, Рус география йәмғиәтенең Башҡортостандағы төбәк бүлексәһенең Попечителлек советы рәйесе Радий Хәбиров ҡунаҡтарҙы тәбрикләне, республика баш ҡалаһының 450 йыллығы алдынан Өфөлә шундай ҙур сара үткәреүгә ышаныс белдергәндәре өсөн рәхмәт белдерҙе. – Сараның Евразия фәнни белем биреү үҙәгенең вуз-ара кампусында үтеүе осраҡлы түгел. Тап ошонда Рус география йәмғиәтенең беҙҙең бүлексәһенең штаб-фатиры урынлашасаҡ. Был йәмғиәтте яратабыҙ, әүҙем хеҙмәттәшлек итәбеҙ. Рус география йәмғиәтенең тарихы 1845 йылдан башлана. Уның башында билдәле тикшеренеүселәр – Иван Крузенштерн, Фердинанд Врангель, Фёдор Литке тора. Улар барыһы ла Рус география йәмғиәтенә нигеҙ һалыусылар, – тине Радий Хәбиров. Төбәк етәксеһе һуңғы йылдарҙа Башҡортостанда ландшафтты, төбәктең тәбиғи үҙенсәлектәрен, мәҙәниәтен өйрәнеү, яңы туристик нөктәләр асыу буйынса ҙур эш алып барылыуын билдәләне. Элекке Советтар Союзы биләмәһендә республикабыҙ беренсе булып “Янғантау” геопаркы булдырып, ЮНЕСКО-ның глобаль геопаркы статусын алды. Ул Салауат районында урынлашҡан. Бынан тыш, ЮНЕСКО-ның бөтә донъя мәҙәни мираҫ объекттары исемлегенә индереүгә йәнә бер ғариза әҙерләнде – ул Башҡортостан биләмәһендәге икенсе геопарк “Торатау”. Ул 2018 йылда республика Башлығы башланғысы буйынса булдырылды. - Яңы объекттар рәтендә Салауат районындағы “Салауат ере” мемориаль паркы, Бөрйән районында “Шүлгәнташ” тарихи-мәҙәни музей комплексы бар. Сәнәғәт мираҫын һаҡлау сиктәрендә Мәләүез районының Воскресенское ауылында элекке баҡыр иретеү заводы биләмәһе төҙөкләндерелде. Был эшмәкәрлек беҙҙең төбәктә туризмды үҫтереүҙе лә сағылдыра. Иҡтисадыбыҙ өсөн дә мөһим роль уйнай. Был йүнәлешкә артабан да иғтибар бүләсәкбеҙ, – тине республика етәксеһе. Рус география йәмғиәтенең төбәктәр советы рәйесе Артем Манукян үҙенең сығышында йәмғиәттең федераль проекттарында Башҡортостандың әүҙем ҡатнашыуын белдерҙе. - Башҡортостандағы бүлексә Рус география йәмғиәтенең тәүге иң яҡшы ун бүлексәһе исемлегенә инә. Ул сифатлы һәм күләмле проекттарҙы тормошҡа ашыра. Был экпедиция-проект, нәшриәт эшмәкәрлегенә лә ҡағыла. Йәштәр менән дә ҙур эш алып барыла һәм, әлбиттә, туризмды үҫтереүгә, төбәктең туристик ҡеүәтен күтәреүгә ҙур иғтибар бирелә, – тине ул. Артем Манукян Радий Хәбировҡа Рус география йәмғиәтенең төбәк бүлексәһенең 70 йыллығы уңайынан ҡотлау адресы тапшырҙы. Шулай уҡ Башҡортостан Башлығы емешле хеҙмәттәшлеге өсөн “Төньяҡ полюс – Стратосфера 2024” проектының Рәхмәт хатын алды. Ултырыш аҙағында Радий Хәбиров Рус география йәмғиәтенең төбәк бүлексәһе ағзаларына әүҙем хеҙмәттәре өсөн Башҡортостандың дәүләт наградаларын тапшырҙы. Ошо уҡ көндө уҙғарылған Рус географияһы йәмғиәтенең төбәктәр советының киңәйтелгән ултырышы ла мөһим мәсьәләләр күтәрҙе. Унда шулай уҡ рус география йәмғиәтенең йәштәр клубтары етәкселәре лә ҡатнашты. Иң элек Рус география йәмғиәтенең эшмәкәрлегенә байҡау яһалды. Шул уҡ ваҡытта йәштәр менән эш алып барыуға ла ҙур иғтибар бүленде. Бөгөн 70-ләп төбәктә йәмғиәттең 215 йәштәр клубы эшләп килә. Киләһе йылда мөһим ваҡиға көтөлә. Рус география йәмғиәтенең 180 йыллығы уңайынан ҙур саралар уҙғарыласағы әйтелде. Ултырышта балалар өсөн Бөтә Рәсәй интеллектуаль конкурс үткәреү тураһында ла фәһемле сығыш яңғыраны. “Рус география йәмғиәте”нең Краснодар төбәге бүлексәһе рәйесе Иван Чайка йәш быуынды йәлеп итеүгә маҡсатланған Рәсәй кимәлендәге ике ҙур конкурс тураһында һөйләне. Бөтә Рәсәй “Донъялағы иң күге” конкурсы һәм Бөтә Рәсәй “Географияны иң яҡшы белеүселәр” турниры аша уҡыусыларҙың география фәненә ылығыуы ла ғәжәп түгел. Ошо конкурстарҙа еңеп, төрлө тарафтарға сәйәхәттәр менән бүләкләнеүсе уҡыусыларҙың тәьҫораттары менән йылы тойғолар ҡалдырҙы. Фото: Башҡортостан Башлығы сайтынан һәм авторҙыҡы.