Башҡортостан Хөкүмәте Премьер-министры Андрей Назаров социаль селтәрҙә йәйге селләне бәлә-ҡазаһыҙ үткәреү өсөн ҡайһы бер хәүефһеҙлек ҡағиҙәләрен иҫкә төшөрә. “Был аҙнала республикабыҙға яңынан эҫе йәй әйләнеп ҡайтты. Синоптиктарҙың күҙаллауынса, яҡын ял көндәрендә һауа температураһының 30 градусҡа күтәрелеүе көтөлә. Тәбиғәттә ял итеү өсөн яҡшы ваҡыт. Әммә балаларығыҙға урманда һәм өйҙә ут менән һаҡ булырға кәрәклекте йышыраҡ иҫкә төшөрөргә саҡырам. Ололар үҙҙәре лә был хаҡта онотмаҫҡа тейеш.Ҡыҙғанысҡа ҡаршы, йәй - ял һәм каникул ғына түгел, ә юғары янғын хәүефе осоро ла. Былтыр беҙ ут сығыуҙарҙы 2 процентҡа кәметә алдыҡ. 2019 йыл менән сағыштырғанда янғында һәләк булғандар һаны 13 процентҡа ҡыҫҡарһа ла, был күрһәткес юғары булып ҡала әлегә. Шулай булғас, хәүефте кәметеү буйынса эшләйәсәкбеҙ. Беренсенән, янғын частарының матди-техник базаһын даими нығытабыҙ. Республикала Янғын-ҡотҡарыу көстәрен үҫтереү стратегияһы тормошҡа ашырыла. Биш йылда ирекле янғын командалары подразделениеларында төп һәм таҡмалы техниканы 66-нан 221 берәмеккә арттырҙыҡ. Баймаҡ, Белорет, Ғафури һәм Кушнаренко райондарында янғын деполары төҙөнөк. Тағы берәү Ишембай районында төҙөлә. Икенсенән, алға ҡарап эшләйбеҙ – янғын хәүефе кимәлен күҙәтәбеҙ. Республикала 2021 йылдан “Урман һаҡсыһы” видеомониторинг системаһы эшләй. Система биләгән территория 8,5 мең квадрат километр майҙанды алып тора. Уның ярҙамында 13 урман янғынын бик ваҡытлы күреп ҡала алдыҡ. Янғынды һүндереүгә ҡарағанда иҫкәртеүе еңелерәк булыуы билдәле. Бында һүҙ аңлатыу эштәре тураһында ғына бармай. Хәүефһеҙлек техникаһын күҙәтмәү арҡаһында янғындар сығып тора. Республикала “Янғын извещателе – һәр өйгә, һәр фатирға” проекты тормошҡа ашырыла. Һуңғы биш йылда ошондай 545 мең ҡорамал өйҙәргә ҡуйылды һәм меңдән ашыу кеше, шул иҫәптән, 433 баланың ғүмерен ҡотҡарып ҡалды. Беҙҙең тәжрибә Рәсәйҙә иң уңышлыһы һәм ул башҡа төбәктәргә тәҡдим ителде. Ҡәҙерле дуҫтар! Тағы бер ҡат иҫегеҙгә төшөрөргә теләйем, власть органдарының ғына тырышлығы янғын менән көрәштә етерлек түгел. Хәүефһеҙлек ҡағиҙәләрен үтәгеҙ һәм был хаҡта балаларығыҙға һөйләгеҙ!” Фото:VK.com