“Әсәһе йүгереп сыҡты ла ҡысҡырып илай башланы”

Кисә Октябрьский ҡалаһындағы бер ғаиләлә ҡот осҡос фажиғә булды. Ҡаланың Насиров урамындағы йорттан бер йәшлек бала ҡоланы. Дүртенсе ҡаттағы тәҙрәнән осоп төшкән ҡыҙ, ҡыҙғанысҡа ҡаршы, дауаханала һәләк булған. Күрше подъезда йәшәгән Алена исемле ҡыҙ “КП-Өфө” баҫмаһына был хәл тураһында һөйләгән. Ҡыҙ иртән ҡатын-ҡыҙ ҡысҡырыуын ишетеп ҡалған. Нимә булғанын аңлар өсөн ул балконға йүгереп сыҡҡан. “Мин ҡан күләүегендә бәләкәй генә кәүҙә күреп ҡалдым. Янында бер нисә кеше йөрөй ине”, – тигән ул. Баланың ҡолаған мәлен ул күрмәгән, ә аҙаҡ камеранан ҡараған. Унда күренеүенсә, ҡыҙыҡай асыҡ тәҙрә төбөндә тора, аҙаҡ шыуышып кәрнизгә сыға һәм төшөп китә. Ерҙә ятҡан бала янына шунда уҡ үтеп барған ҡатын килә һәм “Кемдең балаһы” тип ҡысҡыра. Биш минуттан шок хәлендә тышҡа баланың әсәһе йүгереп сыға һәм ҡысҡырып илай башлай. Күп тә үтмәй ашығыс ярҙам килә. – Мин был хәлдәрҙе ҡалтыраған ҡул менән күҙәттем. Балаға бер кем дә ярҙам итмәгән тип һөйләйҙәр, был дөрөҫ түгел. Табип шунда уҡ уны ҡараны һәм ипләп кенә носилкаларға һалды, – тип иҫләй Алена. Табиптар килгәндә ҡыҙыҡай тере була. Тик ул алған йәрәхәттәренән реанимацияла үлә. Һуңғараҡ асыҡланыуынса, фажиғә ваҡытында әсә өйҙәше менән фатирҙа булған. Күрәһең, сабыйҙың тәҙрә төбөндә уйнағанын күрмәй ҡалғандыр. Берәүҙәр иғтибарһыҙ әсәйҙе әрләй, икенселәр уны йәлләй, сөнки бәләкәй баланы бер минутҡа күҙҙән яҙлыҡтырыу ҙа ҙур фажиғә килтереүен аңлайҙар. Әле Октябрьский ҡалаһы прокуратураһы баланың тәҙрәнән ҡолап төшөү шарттарын тикшерә. – Атап әйткәндә, бәлиғ булмағандарҙың ҡарауһыҙлығын һәм хоҡуҡ боҙоуҙарын иҫкәртеү тураһында ҡануниәттең үтәлеше тикшереләсәк, ата-әсәләрҙең ғәмәлдәренә баһа биреләсәк. Һуңыраҡ прокурор ярҙамы саралары тураһында мәсьәлә хәл ителәсәк, – тип хәбәр иттеләр күҙәтеү ведомствоһынан. Республика Тәфтиш комитетында ла тәфтиш алды тикшереүен ойошторғандар – ваҡиға урынын ҡарағандар, шаһиттарҙан һәм һәләк булған ҡыҙҙың ата-әсәһенән һорау алғандар, шулай уҡ суд-медицина экспертизаһын тәғәйенләгәндәр. – Ғаиләнең торлаҡ-көнкүреш һәм социаль шарттары тикшерелә, сабыйҙың үлеменә булышлыҡ иткән бөтә сәбәптәр һәм шарттар асыҡлана, – тип аңлаттылар төбәк Тәфтиш комитетының матбуғат хеҙмәтендә. Фото: скриншот.