Прокуратура ”Башҡортостан Республикаһының юл хужалығы идаралығы” дәүләт ҡаҙна учреждениеһы етәксеһенең элекке урынбаҫары Илшат Ишморатовҡа ҡарата эш буйынса ғәйепләүҙе раҫланы. Уны айырыуса ҙур күләмдә ришүәт алыуҙа ғәйепләйҙәр. Тәфтишселәр фаразы буйынса, чиновник 2021 йылдың февраленән 2024 йылдың февраленә тиклем коммерция ойошмаһы вәкилдәренән 100 меңдән 1 миллион һумға тиклем ришүәт алған. Законһыҙ түләүҙәр күләме 3,1 миллион һум тәшкил иткән. Илшат Ишморатов Юл хужалығы идаралығы аукциондарында һәм сауҙаларында компанияның еңеүен тәьмин итеү, улар буйынса башҡарылған эштәрҙе тапшырыу-ҡабул итеүгә ҡул ҡуйыуҙа ҡаршылыҡтарға юл ҡуймау өсөн аҡса алған. Алдан яҙыуыбыҙса, Башҡортостан Башлығы Радий Хәбиров бер нисә тапҡыр, үҙенең командаһында ҡаҙна бурҙарына һәм ришүәтселәргә урын юҡ, тип белдерҙе. Республика Башлығы власть органдарын законһыҙ эштәр ҡылған намыҫһыҙ кешеләрҙән таҙартыу буйынса хоҡуҡ һаҡлау органдары менән тығыҙ бәйләнештә тора. Фото сығанағы: https://t.me/rbc_ufa/5518