Ер ҡәҙерен белгән, бала саҡтан аунап үҫкән тыуған тупраҡ йомартлығын баһалай белгән кешеләр йәшәй был төбәктә. Дүртөйлө районының гербында уңдырышлы ерҙең ҡеүәтен сағылдырған дүрт тос башаҡтың һүрәтләнеүе юҡҡа түгел. Ғүмер баҡый йыл әйләнәһенә игенселек, ер эшкәртеү, малсылыҡ менән шөғөлләнгән ауыл хужалығы хеҙмәткәрҙәре – райондың иң ҙур ғорурлығы. Беҙ китаптан уҡып ҡына белгән замандарҙа ла ауыл хужалығы кешеләрҙең боронғо мөһим шөғөлө булған. Барыһы ла ерҙән башлана – тәүге орлоҡтарҙы бураҙналарға һалыуҙан, үҙ мәлендә уңышты йыйып алыуҙан, тыуған тупрағыңа хәстәрлегеңде, күңел йылыңды, оҫталығыңды арнауҙан. XVIII быуат аҙаҡтарында архив материалдарында тәү тапҡыр телгә алынған “Дүртөйлө” атамаһы бер ниндәй үҙгәрешһеҙ беҙҙең көндәргә килеп еткән. Тарихы дүрт кенә өйҙән башланған тораҡ хәҙер инде ҡала статусын алған, көндән-көн ырамлы аҙымдар менән бер ниндәй ауырлыҡтарға , санкцияларға ҡарамай алға барыуын дауам иткән иң матур һәм төҙөк ҡалаларҙың береһе. Уның социаль-иҡтисади үҫеш тиҙлеге уңған яҡташтарының фиҙакәр хеҙмәте, етәкселәрҙең ойоштороу һәләте менән билдәләнһә, республиканың төньяҡ-көнбайыш төбәгендә нефть ятҡылыҡтарын асыу һәм үҙләштереү үҫешенә этәргес көс була. Ете район менән сиктәш биләмәлә тиҫтәгә яҡын милләт вәкилдәре – 60 меңгә яҡын кеше йәшәй. Урман-дала зонаһында урынлашҡан район һирәк осрай торған ҡарағайлыҡтары, шыршы-ҡарағас урмандары менән дан тота, Бәләкәй һәм Оло Йылан күлдәре дәүләт һаҡлығы аҫтындағы тәбиғәт биләмәләре исемлегендә. Ғөмүмән,был тарафтарҙа элек-электән фантазияға, юморға, ижади ҡомарға бай кешеләр йәшәгәндер төҫлө тойола. Шулай булмаһа, әллә ҡайҙағы итальян ҡалаһы исемен иҫкә төшөрөп, тирә-яғы һыу менән уратылған ауылды Венецияға оҡшатып, шундай яңғырауыҡлы исемде ҡушмаҫтар ине. Дүртөйлөнән Мәскәүгә лә “һә” тигәнсә барып етеп була. Тарихтан күренеүенсә, тәүге тапҡыр был урынға күсеп ултырған Аҡйегетовтың хөрмәтенә ауылды яҡташтары “Мәскәү” тип атарға булған. Бына шулай Мәскәүле лә, Венециялы ла, Арғымағы, Бишнараты, Ҡаҙаҡлар һәм Ҡырғыҙы ла булған мауыҡтырғыс яҡ ул. Ҡатмарлы үҫеш йылдары һәм киҫкен боролошло юлдар араһында аҙашмау, үҙ йөҙөңдө һаҡлау, төбәкте инвестициялар йәһәтенән ылыҡтырғыс итеү, халыҡтың тормош сифатын яҡшыртыу өсөн ҙур эштәр башҡарыла. Бөгөнгө замандың талаптары ла ҡырыҫыраҡ, бурыстары ла етдиерәк. Дүртөйлө районы хакимиәте башлығы Риф Сәғәҙәтулла улы Йосопов бына ошо тынғыһыҙ, ҙур яуаплылыҡ талап иткән эште ҡатмарлы сәйәси-иҡтисади шарттарҙа тартҡан тәжрибәле етәкселәрҙең береһе. Беҙ уға үҙебеҙҙе ҡыҙыҡһындырған бер нисә һорауға яуап биреүен һорап мөрәжәғәт иттек. ВРЕЗ: Риф Сәғәҙәтулла улы Йосопов Саҡмағош районының Сыйрышбаш ауылында тыуып үҫкән. Ауыл хужалығы фәндәре докторы. Алтмыштан ашыу ғилми хеҙмәт авторы, Башҡортостандың атҡаҙанған ауыл хужалығы хеҙмәткәре исемен йөрөтә. Фиҙакәр хеҙмәте өсөн Халыҡтар Дуҫлығы ордены һәм күп һанлы Почет грамоталары менән наградланған. Башҡортостан ауыл хужалығы институтын тамамлағас, Саҡмағош районында инженер-энергетик, баш инженер, 1992 йылдан Киров исемендәге колхоз, аҙаҡ“Алға” ауыл хужалығы производство кооперативы рәйесе булып эшләй. 2003 -2017 йылдарҙа Саҡмағош районы хакимиәте, ә 2019 йылдан Дүртөйлө районы хакимиәте башлығы вазифаларын башҡара. – Риф Сәғәҙәтулла улы, бөтә замандарҙа ла Ватанды һаҡлау, уның сиктәрен һаҡлау ир-егеттең мөҡәддәс бурысы, хәүефле булһа ла, һәр саҡ маҡтаулы, почетлы эш һаналған. Һеҙҙең районда хәрбиҙәрҙең, ил һаҡсыларының, ветерандарҙың иҫтәлеген мәңгеләштереү буйынса ҡоласлы эш башҡарылыуына шаһитбыҙ. Дүртөйлөләр яҡташтарының батырлығын, ауыр хеҙмәттәрен баһалай белә! – Яңыраҡ Ағиҙелдең бейек ярындағы ял итеү биләмәһендә, Сик һаҡсыларына арнап, яңыртылған һәйкәлде астыҡ. Хәрбиҙәрҙең тормошо барыбыҙ өсөн өлгө булырлыҡ көсөргәнешле ауыр хеҙмәт менән һуғарылған. Һәйкәлдәр хәтерҙе яңыртыу, йәштәрҙә илһөйәрлек тойғоларын тәрбиәләү өсөн бик мөһим. Төрлө һуғыштарҙа ҡатнашҡан яугирҙәребеҙ хөрмәтенә ҡала үҙәгенә яҡын ерҙә урынлашҡан мемориаль комплекс һәр кемдең иғтибарын үҙенә тартҡан, тарихыбыҙ биттәре менән танышырға мөмкинлек биргән бик йәмле урынға әүерелде. “Фронтҡа китеүсе һалдат” скульптура экспозицияһының гранит плитәләренә Бөйөк Ватан һуғышында ҡатнашыусы яугирҙәребеҙҙең исем-шәрифтәре уйылған. Шулай уҡ рус-япон һуғышында, Афғанстан һәм Чечня компанияларында ҡатнашыусылар, десантниктар хөрмәтенә ҡуйылған иҫтәлекле һәйкәлдәр урынлашҡан биләмә тантаналы саралар үткәреү урынына әүерелде. Никахлашыусы йәштәребеҙ үҙҙәренең байрамында геройҙарыбыҙҙы иҫкә төшөрөп, сәскә гөлләмәләре һалырға килә. Ғөмүмән, Яр буйы хеҙмәт аҙнаһынан һуң көс туплау, уйҙарыңды тәртипкә килтереү, пландар төҙөү, хыялдарға бирелеп ултырыу өсөн уңайлы урын. Еңеү байрамы алдынан Иҫке Байыш ауылында “Азат итеүсе яугир”һәйкәлен яңырттыҡ. Еңеүҙең ниндәй ҡиммәткә төшөүен йәш быуын аңларға бурыслы. Халыҡ батырҙарҙың данын, исемдәрен мәңгеләштереү идеяһын дәррәү яҡлай һәм үҙҙәре лә тәҡдимдәре менән уртаҡлаша. Мәҫәлән, Һуҡҡул ауылында яугирҙәргә һәйкәлде яңыртыу уйы менән янған яҡташыбыҙ тәүҙә һәләк булғандарҙың тулы исемлеген асыҡлауҙы һорай. Һис һүҙһеҙ, халыҡтың тәҡдимдәрен иҫәпкә алып эште дауам итәсәкбеҙ. Түбәнге Ҡарғалы ауылында Дан обелискын асыуҙа ярҙам иткән һәр кемгә оло рәхмәтемде белдерәм. Иҫкергән, ҡояшта уңалып, буяуҙары ҡойолоп ултырған һәйкәл һәм обелисктар Ватан именлеге хаҡына ғүмерҙәрен биргән яугирҙәребеҙҙең шәхесен кәмһетә, данлы хәтирәләрҙе төҫһөҙләндерә. Улар быуындарҙы бәйләүсе, ата-бабаларыбыҙҙың ҡаһарманлығын һынландырыусы символ булып хеҙмәт итһен. Дүртөйлөләр был йәһәттән бик әүҙем, күп ауылдарҙа үҙ аҡсаларына обелисктар төҙөп, тәртиптә тотҡан илһөйәрҙәр бар. – Халыҡтың ниндәй кинәнес, ҡәнәғәтлек кисереүен сайттағы яҙмаларҙан да асыҡ күрәбеҙ: ”Һеҙгә ҙур рәхмәт! Ағиҙел яры буйында шундай матур ял урыны менән беҙҙе һөйөндөрҙөгөҙ! Ниндәй генә рәхмәттәр әйтһәк тә, аҙ”, тип һаулыҡ теләй һеҙгә бер яҡташығыҙ. Икенсеһе уны ҡеүәтләп, “бындай матурлыҡ өсөн ҙур рәхмәт! Халҡыбыҙҙың был эште баһалай белеүен теләйем”, тип белдергән. ”Тәүлектең теләгән ваҡытында бында рәхәтләнеп йөрөй алабыҙ. Иң мөһиме, ошо матурлыҡты һаҡлайыҡ!”, тигән пенсионерҙың теләге менән нисек ризалашмайһың? – Районыбыҙҙы тағы ла күркәмерәк, сағыуыраҡ итеү өҫтөндә эшләүҙе дауам итәбеҙ. Иванай баҡсаһын төҙөкләндереү концепцияһын бер нисә ай буйына ҡала халҡы менән бергәләп тикшерҙек, фекерҙәр менән уртаҡлаштыҡ. Проект өҫтөндә Өфө, Ҡазан, Дүртөйлө белгестәренең ҙур командаһы эшләне. Был мәсьәләлә республика етәкселегенң даими ярҙамын тоябыҙ. Объекттар яҡташтарыбыҙға һәм ҡунаҡтарға оҙаҡ йылдар хеҙмәт итергә, һөйөндөрөргә тейеш. Финал проекты Рәсәй Төҙөлөш министрлығына ебәрелде. Әгәр конкурста еңһәк, ҡалабыҙ биләмәне төҙөкләндереүгә грант аласаҡ тигән һүҙ. – Элек етемһерәп ятҡан буш ерҙә Балалар паркы төҙөп, байтаҡ урамдарҙы төҙөкләндереп, асфальт юлдар, бордюрҙар һалып, йәйәүлеләр зонаһы булдырып, халыҡты шатландырғанығыҙҙы беләбеҙ. Әле Бөйөк Еңеүҙең 80 йыллығына ҡаланың тормош артерияһы булған Минеғәле Шаймортов урамын капиталь ремонтлау уйы менән янаһығыҙ. Бындай ҙур проекттарҙы тормошҡа ашырыуға ҙур финанс сығымдары талап ителеүен яҡшы аңлайбыҙ. Ҡайҙан алаһығыҙ был хәтлем миллионлаған аҡсаны? – Финанс сығанағы сер түгел, хәҙер беҙҙә бик емешле, мөһим проекттар эшләй. Мәҫәлән, “Торлаҡ һәм ҡала мөхите” милли проектына ингән “Уңайлы ҡала мөхитен булдырыу”, “Башҡортостан Республика торлағы” төбәк проекттары торлаҡ төҙөлөшөн арттырырға, йорттарҙы сафҡа индереү күрһәткесен 134 процентҡа үтәргә мөмкинлек бирҙе. Башҡортостан Башлығы Радий Хәбиров ҡушыуы буйынса башланған “Башҡорт ихаталары” программаһы ҡаланың үҫешенә баһалап бөткөһөҙ өлөш индерҙе. 2022 йылда Дүртөйлө бәләкәй ҡалаларҙа уңайлы ҡала мөхите булдырыу буйынса иң яҡшы проекттарҙың Бөтә Рәсәй конкурсында яңынан еңеүсе булды. Шулай итеп, беҙ Ағиҙел яры буйында “Дүртөйлө. Башҡортостандың йылға ҡапҡалары” проектын тормошҡа ашырыу маҡсатында 85000,0 мең һум аҡса оттоҡ! Гранттар беҙгә үҫеү өсөн яңы мөмкинлектәр, офоҡтар аса икән, ниңә беҙгә тиҙерәк ҡыбырҙамаҫҡа, халыҡ менән кәңәшләшеп, ниңә йылдамыраҡ документтар әҙерләп, заявкалар бирмәҫкә? Һәр беребеҙҙән өлгөрлөк талап ителә бөгөн. ”Башҡорт ихаталары” ла республика өсөн бик үҙенсәлекле проект. Уны тормошҡа ашырыу һөҙөмтәһендә Дүртөйлөнөң 1 Май, Нефтселәр урамдарындағы күп ҡатлы йорттар ихаталарын тәртипкә килтерҙек, шулай уҡ Семилетка ауылындағы бер нисә урамдағы ихаталарҙы яңырттыҡ. Финанслау суммаһы яҡынса алтмыш миллион һумға төштө. Районда үтә ҡатмарлы, мәшәҡәтле торлаҡ-коммуналь хужалыҡ тармағын алып барған хеҙмәттәштәремдең эшен юғары баһалайым. Күп ҡатлы йорттарҙағы дөйөм милекте һәм подъездарҙы капиталь ремонтлау эше планлы рәүештә алып барыла. Райондағы тораҡтарҙың генераль пландарын әҙерләү инфраструктураны уңайлыраҡ итеү буйынса эште йәнләндерәсәк, халыҡтың йәшәү шарттарын яҡшыртыуға булышасаҡ. Башҡортостан Башлығы указы менән 2023 йылды “Файҙалы эштәр йылы” тип иғлан итеү, “Атайсал” проектында халыҡтың әүҙем ҡатнашыуы бығаса хәл ителмәгән мөһим эштәрҙе (мәсеттәр, шишмәләр, зыяраттар, йәмәғәт биләмәләре һәм һәйкәлдәрҙе төҙөкләндереү) атҡарырырға, сәхнә костюмдары тегергә, “Ҡанатлы ат” фестивален ( был фестиваль хәҙер беҙҙең бренд!) үткәрергә ярҙам итте лә инде. – Һеҙ махсус хәрби операциянан ялға ҡайтҡан ҡайтҡан һәр һалдатты ҡаршы алып, изге теләктәрегеҙҙе теләп, оло юлға шәхсән оҙатырға тырышаһығыҙ. Алғы һыҙыҡтағы егеттәр янында алты тапҡыр булып, уларҙың тормошо, рух ныҡлығы, теләктәре менән яҡшы танышыуҙан ниндәй һығымта яһанығыҙ? – Ошо көндәрҙә махсус хәрби операцияла ҡатнашҡан, Даян Мурзин исемендәге мотоуҡсылар батальонының рота командиры урынбаҫары, офицер, “Алпан” позывнойлы егет менән осраштым. Ул яу ҡырындағы ауырлыҡтар, хәрби тормош тураһында фекерҙәре менән уртаҡлашып, бер тапҡыр ҙа зарланманы, киреһенсә, еңеүгә ышаныстары, бурыстарын намыҫ менән үтәүҙәре тураһында рухланып һөйләне. Ошондай бөркөттәй ҡыйыу, ҡурҡыу белмәҫ егеттәр үҫтергән ата-әсәләргә ҙур рәхмәт! Беҙ уларҙың һәр береһе өсөн борсолабыҙ, әлбиттә, көтәбеҙ... Гуманитар йөк алып барғанда яугирҙәр менән осрашыуҙар бик тулҡынландырғыс үтә, улар беҙҙең аша тыуған яҡ йылыһын, сәләмен ала, һөйөүебеҙҙе тоя, ә мин уларҙың һәр береһендә беҙҙең яҙмышыбыҙҙы хәл итеүсе Ватан һаҡсыһын ғына түгел, ә рухташ, фекерҙәш туған кешемде тоям. Гуманитар йөк матди ярҙамдан бигерәк беҙҙең яҡташтарыбыҙға булған мөнәсәбәттебеҙҙе, яратыуыбыҙҙы, рәхмәтебеҙҙе, уларҙы онотмауыбыҙҙы белдергән матур ғәмәл. Үкенескә ҡаршы, бөгөн хәрбиҙәрҙең исемдәрен атап, уларҙың батырлығы тураһында аныҡ һөйләй алмайбыҙ. Ә улдарының ҡыйыу һуғышыуы тураһында хаттар ата-әсәләренә генә түгел, район хакимиәтенә лә килә. Һуңғы сәфәрҙәрҙең береһендә “Племзавод” йәмғиәте ебәргән “УАЗ” машинаһын, “Племзавод Ленина” йәмғиәтенең “Нива”һын,”Дүртөйлө электр селтәрҙәре” нең ”УАЗ”ын, меңәрләгән километрҙарса ерҙән алып килеп, егеттәргә асҡыстарын тапшырҙыҡ. Ватанды һаҡлаусылар райондаштарының даими ярҙамы өсөн рәхмәт белдерә. Уларҙың ынтылышын, хәрби рухын бер ниндәй ҡурҡытыу менән дә һындырырлыҡ түгеллеген аңланыҡ, тимәк, Еңеү беҙҙең яҡта буласаҡ! Махсус хәрби операция иғлан ителеү менән ашығыс мөһим мәсьәләләрҙе хәл итеү буйынса Тымыҡ океан флотында һыу аҫты кәмәһендә 20 йыл хеҙмәт иткән тәжрибәле хәрби Ришат Вәлиевты советник итеп алдым. Ул тәүге көндәр айырыуса ауыр ине. Хәҙер “Ватанды яҡлаусылар” фонды филиалы булдырылғас, Ришат Рик улы ошо ойошмала яугирҙәрҙең, уларҙың ғаиләләренең һорауҙарын хәл итеү өҫтөндә эшләй. Беҙ халыҡ, предприятие һәм ойошмалар ярҙамында алғы һыҙыҡҡа 23 ылау, 37 машина ебәрҙек. – Риф Сәғәҙәтулла улы, дүртөйлөләрҙең ижади, уйланыусан, һәр эшкә үҙенсәлек индерергә тырышҡан өлгөр халыҡ икәнен беләбеҙ. Яугирҙәргә ярҙам итеү маҡсатында, “Үҙебеҙҙекеләрҙе ташламайбыҙ!” тигән девиз аҫтында хәйриә акцияһы ойоштороп, эстафетаны ауыл советтарына тапшырыу идеяһы кемдең уйына килде? – Халыҡ үҙе инде. Мәҫәлән,Иҫке Байыш, Мәскәү ауылдары биләмәләре кешеләре ярты миллион һумға яҡын аҡса туплап, яугирҙәргә әйберҙәр әҙерләне. Эшҡыуар Илфир Ғилметдинов УАЗ һатып алды. Аҙаҡ Иҫке Байыштар гуманитар ярҙам туплау хоҡуғын Семилетка ауыл советына тапшырҙы. Улары был мөһим эште әсәндәргә тапшырмаҡсы. Яҡташтарҙың уйлап тапҡан был “феномены” бик уңышлы, ойошҡан рәүештә дауам итә. – Һеҙҙең өсөн эшегеҙҙә иң ауыры ниҙә? –Элегерәк булһа, тәбиғәт көйһөҙлөктәре, йә булмаһа, ауыл хужалығында техника, финанс етешмәүе тиер инем. Нисек кенә ҡыйын булмаһын, был ҡаршылыҡтарҙы еңеп сығып була. Әлеге көндә үҙәккә үткәне, йөрәкте һыҙландырғаны – улдарын юғалтҡан әсәләрҙе йыуатыуы. Бында миһырбанлыҡ, мәрхәмәтлек, ҡайғы уртаҡлашыу ғына көсһөҙ. Әлбиттә, ата-әсәләр, уларҙың ғаиләләре менән тығыҙ бәйләнештәбеҙ, ярҙам ҡулы һуҙырға һәр саҡ әҙербеҙ, байрамдарҙа йыш осрашабыҙ. Эшсән халҡыбыҙҙың ныҡлығына, күңелгә наҙ, сәм, ғәм биреүсе әсәләрҙең түҙемлелек менән ҡайғы-хәсрәтте күтәрә белеүенә, ғорурлығына һоҡланыуымдың сиге юҡ. – Һеҙ үҙегеҙ ҙә ғорур, булдыҡлы халҡығыҙҙан көс алып йәшәйһегеҙ төҫлө, Риф Сәғәҙәтулла улы. Композитор Ян Френкелдең шағир Рәсүл Ғамзатов шиғырына ижад ителгән, яу ҡырында һәләк булғандар иҫтәлегенә бағышланған “Торналар” йырын бары һеҙҙең кеүек илһөйәр, тыуған төйәген ихлас һөйгән, һәр һалдатты улындай күреп, уларҙың яҙмышы өсөн күңеленән янып йәшәгән шәхес кенә күҙҙәрҙе сылатырлыҡ, йөрәккә үтеп инерлек башҡара алалыр. Клиптарығыҙ ғына түгел, шиғриәт донъяһы менән ҡыҙыҡһыныуығыҙ, Евгений Евтушенко, Андрей Вознесенский, Әнғәм Атнабаев, Назар Нәжми кеүек таланттарҙың шиғри шәлкемдәрнн яттан һөйләүегеҙ ҙә етәкселәр араһында һирәк осрай торған күренеш. – Шәйехзада Бабич, Назар Нәжми кеүек талант эйәләрен биргән ерҙә шиғриәткә, әҙәбиәткә битараф булыуы мөмкин түгелдер. Шағир күңелле булыу өсөн шиғыр яҙыу кәрәкмәйҙер ҙә. Йөрәгендә шиғриәткә һөйөү йөрөткәндәр, яҙышмаһалар ҙа, эргәбеҙҙә етерлек. “Шағир булып тыумаһаң да,бында Һин барыбер шағир булаһың!”– тип яҙмаҫ ине яҡташыбыҙ. Сөнки тәбиғәт ҡосағында үҫкән, бәләкәйҙән матурлыҡҡа, ер-һыуына ғашиҡ кеше уны йәштән ҡәҙерләргә, яратырға өйрәнә. Тормошомда булған ҡайһы бер көтөлмәгән ҡатмарлыҡтар ҙа шиғриәт менән яҡыныраҡ танышыуға этәрҙе. Байтаҡ ҡына етди операциялар үткәрергә тура килгәс, хәтерҙең бер ни тиклем тарҡауланғанын тойҙом. Табип-анестезиолог уны ҡайтарыуҙың ябай ғына ысулын кәңәш итте: шиғыр ятларға кәрәк! Бына шулай тренажер-велосипедта педалдәр әйләндерә–әйләндерә, шиғыр юлдарын ҡабатлай-ҡабатлай хәтерҙе яҡшырттым, өҫтәүенә күпме шағир, күпме әҫәрҙәр менән таныштым. Икеләтә файҙа! Хәҙер был ғәҙәттән ҡотолормон тимә лә! – Һеҙ социаль селтәрҙәге шәхси битегеҙҙе даими алып бараһығыҙ. Ул бик уҡымлы, ҡыҙыҡлы хәбәрҙәр менән тулыландырыла. Һәр хәбәрегеҙгә фекерҙәрен өҫтәгәндәр ҙә етерлек, сөнки әйтелгән һәр һүҙегеҙ уларҙың тормошона ла ҡағыла. Социаль селтәрҙәге яңылыҡтар энә күҙәүенән үтеп, шунда уҡ баһа ала. Ваҡытты һәм энергияны байтаҡ сарыф иткән бындай социаль селтәр һеҙгә ни өсөн мөһим? –Үҙегеҙ үк һорауығыҙҙа яуап бирҙегеҙ түгелме? Район менән етәкселек иткән, 69 меңгә яҡын кешенең тормошо өсөн яуаплылыҡты өҫтөнә алған етәксе өсөн социаль селтәр “һауа торошон”, “көйһөҙлөктәрҙе” алдан билдәләүсе барометр йәғни халыҡтың һулышын асыҡлаған лакмус ҡағыҙындай. Ҡапыл килеп тыуған тәҡдимдәр, идеялар менән танышыу ҙа файҙалы була. – Үҙегеҙҙе ҡәнәғәт тойоу өсөн һеҙгә нимә етмәй, тип уйлаһығыҙ? Эшегеҙгә ҡамасаулаған нимәләр бармы? – Әлбиттә, ҡаршылыҡтар ҙа, осона еткереүҙе көткән проекттар ҙа, хәл итәһе социаль-иҡтисади мәсьәләләр ҙә етерлек. Шуларҙың иң ауыры – ваҡыт етмәүе, тәүлектә ни бары 24 сәғәт кенә булыуы... Ә ҡалғанын һис һүҙһеҙ тормошҡа ашырасаҡбыҙ. – Әңгәмәгеҙ өсөн ҙур рәхмәт! Батыр, булдыҡлы быуын тәрбиәләп үҫтергән, эшсән Дүртөйлө халҡына уңыштар теләйбеҙ! Динә Арыҫланова. Дүртөйлө районы. Айрат Нурмөхәмәтов фотолары. ү