Бөгөн Башҡортостандың “Берҙәм Рәсәй” йәмәғәт яҡлауы штабында “Ғаилә һәм демография сәйәсәтен тормошҡа ашырыуҙа дәүләт һәм дини конфессиялар көстәрен берләштереү. Ғаилә ҡиммәттәрен нығытыуға курс” темаһына арналған түңәрәк өҫтәл уҙғарылды. Был түңәрәк өҫтәл Ғаилә йылына арналды һәм ғаиләне, уның ҡиммәттәрен һаҡлауҙы, ғаилә институты һәм никахты нығытыуға ярҙам итеүҙе, рухи-әхлаҡи ҡиммәттәрҙе юғалтмауҙы маҡсат итеп ҡуйҙы. Сарала власть органдары, дини конфессиялар, фәнни берләшмәләр һәм әүҙем граждандар ҡатнашты. Рәсәй Федерацияһының Йәмәғәт Палатаһының секретары урынбаҫары, “Рәсәйҙең ғаиләләр союзы” йәмәғәт ойошмаһы етәксеһе Владислав Гриб видеобәйләнеш аша тәбрикләү сәләме менән сығыш яһаны. -Ғаилә ҡиммәттәрен пропагандалау – ул һәр ҡайһыбыҙҙың, дәүләттең, дини конфессияларҙың, йәмәғәт ойошмаларының бурысы, – тине ул үҙенең сығышында. Башҡортостандың ғаилә, хеҙмәт һәм халыҡты социаль яҡлау министры Ленара Иванова ғаиләне һаҡлауға, яҡлауға, нығытыуға йүнәлтелгән саралар тураһында һөйләне. Был йәһәттән республикабыҙ тарафынан ғаиләләрҙе яҡлау өсөн ҙур хәстәрлек күрә. Башҡортостанда күп балалы ғаиләләр һаны артһа ла, тыуымдың кәмеүенә министр борсолоуын белдерҙе һәм был проблеманы хәл итеү мөһимлеген атаны. Бөгөнгө көндә Башҡортостанда 220 мең балаһы булған ғаилә ярҙам саралары менән ҡуллана. Был йүнәлештә эш туҡталмай. Ленара Хәким ҡыҙы яңы ғына индерелгән ярҙам саралары менән дә таныштырып үтте. Шулай уҡ ғаиләләр араһында уҙғарылған төрлө фестивалдәр, конкурстар, атайҙы, әсәйҙе данлаған наградалар – барыһы ла ғаиләне күтәреүгә йүнәлтелгән. Эске арҡаһында ғаиләләр тарҡалыуын күҙ уңында тотоп, республикабыҙҙа “Айыҡ ауыл” конкурсының да бик уңышлы эшләп килеүен иғтибарға алды. Эскене иҫкәртеү йәһәтенән был конкурстың әһәмиәте айырыуса ҙур. Дин әһелдәренең һөйләгәндәре лә фәһемле булды. Ваҡытында ғаилә ҡороу, үҙ мәлендә балалар табыу бөгөн көнүҙәк мәсьәлә булыуын билдәләнеләр. Демографияны яҡшыртыуға, тыуымды күтәреүгә һаулыҡ һаҡлау тармағы вәкилдәре лә тәҡдимдәрен әйтте. Рухи-әхлаҡи тәрбиә биреүҙә балалар баҡсаһы, мәктәптәрҙең дә ҙур эш алып барыуына миҫалдар килтерелде, яңы тәрбиә алымдары менән дә бүлештеләр. Был йәһәттән ата-әсәләр менән берлектәге эш айырыуса яҡшы һөҙөмтә бирә. Бер-береһенә тоғро, насар ғәҙәттәргә эйә булмаған имен ғаиләлә бәхетле балалар тәрбиәләп була. Һәм киләсәктә улар үҙҙәре лә шундай уҡ ғаилә ҡорорға теләр, тигән теләктәр ҙә урынлы булды. Автор фотолары.