1 июлдә Республика йортонда Башҡортостан Башлығы Радий Хәбиров «Брикс илдәренең спорт уйындары» Халыҡ-ара мультиспорт сараһы еңеүселәре һәм призёрҙары менән осрашты (БРИКС уйындары). Спортсылар менән осрашыу 12 – 23 июндә Ҡазанда үткән ярыш йомғаҡтарына, шулай уҡ республикала спортты артабан үҫтереү пландарына арналды. Хәтерегеҙгә төшөрәбеҙ: Башҡортостан спортсылары БРИКС уйындарында 20 миҙал яуланы – 12 алтын, ете көмөш һәм бер бронза. Илдең йыйылма командаһына Башҡортостандан һигеҙ дисциплина буйынса 18 вәкил инде. Сәләмләү һүҙендә Башҡортостан Башлығы БРИКС уйындары еңеүселәренең һәм призёрҙарының физик культураны үҫтереүгә һәм Рәсәй спортын популярлаштырыуға индергән өлөшөн һыҙыҡ өҫтөнә алды. – Мин һеҙҙең менән осрашырға һәм, тәү сиратта, ҙур уңыштарығыҙ өсөн рәхмәт әйтергә теләнем. Беҙ һеҙҙең менән бик ғорурланабыҙ! – тине Радий Хәбиров. – Ярыштар барышын иғтибар менән күҙәтеп барҙыҡ – һеҙ яулаған 20 миҙал Рәсәй йыйылмаһы командаһына ҙур өлөш индерә. Һеҙҙең һәр ҡаҙанышығыҙ, һәр спорт батырлығығыҙ – Башҡортостанда спортты үҫтереү өсөн тағы бер стимул. Һеҙгә миллионлаған кеше, балалар ҡарай. Малайҙар һәм ҡыҙҙар, һеҙҙең кеүек күренекле спортсыларға ҡарап, үҙҙәре лә спорт менән шөғөлләнергә ҡарар итә. Улар һеҙҙән өлгө ала. Бының өсөн ҙур рәхмәт! БРИКС уйындары Рәсәй Федерацияһына ҡаршы санкцияларға яуап булды, тип билдәләне төбәк етәксеһе. Башҡортостан вәкилдәре, илдең йыйылма командаһының барлыҡ ағзалары кеүек үк, ҙур спортта изоляция була алмауын иҫбатланы һәм ярыштарҙа дуҫ дәүләттәр спортсылары менән лайыҡлы сығыш яһаны. Донъя һәм Рәсәй спортында конкуренция көсәйә, тип өҫтәне Башҡортостан Башлығы. Алдынғылыҡты һаҡлап ҡалыу маҡсатында, республика профессиональ кимәлдә спорт менән шөғөлләнеү өсөн шарттар тыуҙыра, спорт инфраструктураһын үҫтерә. – Беҙҙең алда ҙур сара тора – көҙөн Өфөлә «Рәсәй – спорт державаһы» ХІІ халыҡ-ара форумы үтәсәк. Ил Президенты, был ваҡиғаны уҙғарыуҙы тапшырып, беҙгә ҙур ышаныс белдерҙе, – тине Радий Хәбиров. – Республикала спортҡа ҡарата мөнәсәбәттең бик етди булыуын беләһегеҙ, спортты үҫтереүгә мин дә ҙур көс һалам. Беҙ даими рәүештә спорт менән шөғөлләнеү өсөн яҡшы шарттар булдырыу өҫтөндә эшләйбеҙ. Өфөнөң юбилейы йылында Көрәш һарайын, Фехтование үҙәген, Ишкәкле слалом комплексын тапшырасаҡбыҙ. Был үҙәктәр илдең иң яҡшы спорт объекттары рәтендә буласаҡ. Беҙ шулай уҡ Бокс прогресы үҙәге һәм Республика теннис академияһы нигеҙҙәренә тәүге таш һалдыҡ. Еңел атлеттарыбыҙ манеж төҙөү тураһында ла бик һорағайнылар, был мәсьәлә буйынса эш алып барабыҙ. Спортсыларыбыҙ менән ниҙер хаҡында килешәбеҙ икән, барыһын да эшләйбеҙ. Тәҡдимдәрегеҙҙе тыңларға әҙермен. *** Бадминтон буйынса БРИКС уйындарының ике тапҡыр еңеүсеһе Алина Дәүләтова республика етәкселегенә Башҡортостанда бадминтонды үҫтергән һәм популярлаштырған өсөн рәхмәт белдерҙе. – Быйыл февралдән беҙ Өлфәт Мостафин исемендәге Спорт әҙерлеге үҙәгендә шөғөлләнә башланыҡ. Бадминтонсыларҙың күнекмәләр өсөн үҙ базаһы барлыҡҡа килеүенә бик шатбыҙ. Был залдарҙа буласаҡ чемпиондар шөғөлләнер, тип ышанам. Ярыштар һөҙөмтәләре буйынса күрһәтелгән матди ярҙам, дәүләт спорт стипендиялары, республика буйынса төҙөлгән объекттар, «Ҡала тренеры» һәм «Ауыл тренеры» проекттары өсөн ҙур рәхмәт, – тине Алина Дәүләтова. *** Токиолағы Олимпиаданың көмөш призеры, БРИКС уйындарының команда беренселегендә еңеүсе, рапирасы Тимур Сафин Башҡортостан Хөкүмәтенә был спорт төрөнә ярҙамы өсөн рәхмәт белдерҙе, шулай уҡ был ярыштарҙа ҡатнашыуы хаҡында һөйләне. – Беҙҙе иғтибарһыҙ ҡалдырмауығыҙ, һөҙөмтәләребеҙҙе һәм сығыштарыбыҙҙы һәр саҡ иғтибар менән күҙәтеп барыуығыҙ өсөн ҙур рәхмәт. Фехтование үҙәге өсөн рәхмәт, быйыл барлыҡ фехтовальщиктар ҙа шөғөлләнә башлар, ә теләгән һәр кем үҙен ошо матур спорт төрөндә һынап ҡарай алыр, тип ышанам, – тип билдәләне Тимур Сафин. – БРИКС уйындары юғары кимәлдә үтте, төрлө илдәрҙән бик күп спортсылар килде. Был турнирҙа мин шәхси зачетта көмөш миҙал яуланым, ә Владислав Журавлёв менән команда беренселендә алтын миҙалға лайыҡ булдыҡ. Әлбиттә, был беҙҙең генә ҡаҙаныш түгел, ә беҙгә ышаныс белдереп ҡараусыларҙың да уңышы. *** Өфөнөң 12-се олимпия резервы спорт мәктәбенең тренер-уҡытыусыһы Николай Балабанов БРИКС уйындары йомғаҡтары буйынса Башҡортостан спортсыларын һәм уларҙың тренерҙарын матди йәһәттән дәртләндереү тәҡдиме менән сығыш яһаны. – Каратэ, билбау көрәше һәм көрәш менән бер рәттән, ҡыҙғанысҡа ҡаршы, спорттың олимпия төрөнә ҡарамай. Мин спортсыларҙы һәм уларҙы әҙерләгән тренерҙарҙы матди дәртләндереү мөмкинлеген ҡарауығыҙҙы һорар инем. Был беҙҙең спортсылар өсөн яҡшы ярҙам буласаҡ, – тине Николай Балабанов. Башҡортостан Башлығы төбәктең Спорт министрлығына ғәмәлдәге указға үҙгәрештәр индерергә ҡушты. Билдәләп үтәйек: Башҡортостан Башлығы указына ярашлы, Европа чемпионаты кимәлендәге спорт сараһында атлеттарға беренсе урын өсөн – 250 мең һум, икенсе урын өсөн – 200 мең һум, өсөнсө урын өсөн 100 мең һум матди ярҙам ҡаралған. Тренерҙарға тәрбиәләнеүселәре алған сумманың 50 проценты түләнә. *** Грек-рим көрәше буйынса БРИКС уйындары еңеүсеһе Нохчо Лабазанов «Ваҡыт капсулаһы» өсөн үҙенең алтын миҙалын тәҡдим итте. Киләсәк быуындарға мөрәжәғәт менән капсуланы 31 августа, Өфөнөң 450 йыллыҡ юбилейын билдәләгәндә, һалырға планлаштыралар. – БРИКС уйындарында республикабыҙ исеменән ҙур ғорурлыҡ менән сығыш яһаным һәм унда беренсе урынға лайыҡ булдым. Финалда мин Белоруссия спортсыһы Дмитрий Зарубский менән көрәштем һәм ышаныслы еңеү яуланым. 50 йылдан һуң киләсәк быуындарға беҙҙең спорт ҡаҙаныштары хаҡында һөйләр өсөн, был награданы «Ваҡыт капсулаһы»на тапшырырға теләйем, – тине Нохчо Лабазанов. *** Осрашыу аҙағында Башҡортостан Башлығы Радий Хәбиров спортсыларға һәм тренерҙарға дәүләт наградалары һәм иҫтәлекле бүләктәр тапшырҙы. Башҡортостан йыйылма командаһы вәкилдәре төбәк етәксеһенә БРИКС уйындары флагын тапшырҙы. Ул Көрәш һарайы музейында башҡа экспонаттар менән йәнәш урын аласаҡ. Фото һәм мәғлүмәт: https://glavarb.ru/bash/press_serv/novosti/180302.html