Бөгөн Шишмә районында Башҡортостан Башлығы Радий Хәбиров, Асҡын, Благовещен, Борай, Бөрйән, Ғафури, Йылайыр, Көйөргәҙе, Мәсетле, Стәрлебаш, Туймазы, Саҡмағош һәм Яңауыл райондары ауыл советтары башлыҡтарының семинарында ҡатнашты. Сара Рәсәй Геройы Максим Серафимов исемендәге «Патриот» хәрби-патриотик паркында үтте. Республика Башлығы ауыл биләмәләре етәкселәре менән халыҡты борсоған мәсьәләләр тураһында һөйләште. Һүҙ юлдарҙы төҙөкләндереү, инженер селтәрҙәре төҙөү һәм ремонтлау, тораҡ пункттарҙы төҙөкләндереү, шулай уҡ социаль проекттарҙы һәм программаларҙы тормошҡа ашырыу тураһында барҙы. Радий Хәбиров үҙ сығышында республиканың идара итеү коллективының төп бурыстарын билдәләне, уларҙы хәл итеүҙә Башҡортостан муниципаль берәмектәре һәм ауыл биләмәләре әүҙем ҡатнаша. – Әлбиттә, берлектәге эшебеҙҙең иң мөһим йүнәлеше – махсус хәрби операцияға булышлыҡ итеү. Ошо көндәрҙә Украина прокуратураһы мине һәм Өфө мэрын ситтән тороп ғәйепләгәндәрен ишеткәнһегеҙҙер, моғайын. Нимә өсөнмө? Махсус хәрби операция үткәреүҙә ярҙам иткәнебеҙ өсөн. Был беҙҙең әлеге өлкәләге ғәмәлдәребеҙҙең һөҙөмтәле булыуына тағы бер раҫлау. Беҙ егеттәребеҙгә тулыһынса ярҙам итәбеҙ, — тип һыҙыҡ өҫтөнә алды Радий Хәбиров. «Бөтә муниципалитеттарға, ауыл биләмәләренә Ватанды һаҡлаусыларға ярҙам йөҙөнән гуманитар автоколонналар йыйыуҙа әүҙем ҡатнашҡандары өсөн рәхмәт белдерәм. Республика Донбассҡа барлығы 130-ҙан ашыу колонна ебәрҙе, – тине Радий Хәбиров. Махсус хәрби операцияла ҡатнашыусыларҙың ғаиләләре, шул иҫәптән һәләк булған яугирҙәрҙең яҡындары тураһында хәстәрлек күреү ҙә мөһим бурыс булып тора. Башҡортостан Башлығы райондарға эш сәфәрҙәре ваҡытында егеттәрҙең туғандары һәм яҡындары менән осрашыуы хаҡында хәтергә төшөрҙө. Ә муниципаль берәмектәр һәм ауыл биләмәләре етәкселәре хәрбиҙәрҙең ғаиләләренә ярҙам итеүҙә лә шәхси ҡатнашырға тейеш. Эштең өсөнсө йүнәлеше — төбәктең иҡтисады һәм социаль өлкәһе тотороҡло үҫешен тәьмин итеү. – Был йәһәттән, минеңсә, яҡшы эш башҡарабыҙ. Республика үҫешенең төп күрһәткестәре ыңғай динамика күрһәтә, — тине Радий Хәбиров. – Беҙ иҡтисадты кадрҙар менән комплектлауға ҙур иғтибар бүләбеҙ. Бөгөн күп тармаҡтарҙа белгестәр етешмәй. Был мәсьәләне беҙ урта һөнәри белем биреү системаһын камиллаштырыу юлы менән хәл итәбеҙ. Колледждарҙы төҙөкләндерәбеҙ, уларҙың матди базаһын нығытабыҙ, предприятиеларҙың заманса талаптарына ярашлы белем биреү программаларын яңыртабыҙ, - тине Радий Хәбиров. Башҡортостан Башлығы, республика артабан да ғәмәлдәге социаль-иҡтисади программаларҙы, шул иҫәптән биләмәләрҙе үҙләштереү менән бәйле программаларҙы тормошҡа ашырасаҡ, тип өҫтәне. Шул уҡ ваҡытта Радий Хәбиров билдәләүенсә, республика райондары тораҡ пункттарҙы яҡшыртыуға һәм кешеләрҙең йәшәү сифатын күтәреүгә йүнәлтелгән федераль проекттарҙа әүҙем ҡатнашырға тейеш тип билдәләне. Көн тәртибендәге тағы бер көнүҙәк мәсьәлә – халыҡтан алдаҡ юл менән аҡса урлаған телефон мутлашыусыларына ҡаршы тороу. – Уҙған аҙнала республика халҡы мутлашыусыларға 27 миллион һум аҡса ебәргән. Был аҡса украин хәрбиҙәренә бағыусылыҡ итеү өсөн тотонола, — тине Радий Хәбиров. – Беҙҙең семинар программаһы мутлашыу эшмәкәрлегенән һаҡланыу буйынса уҡытыуҙы үҙ эсенә ала. Әммә ябай ҡағиҙә барлығын аңлау мөһим: бер кемгә лә ышанып етмә. Билдәһеҙ номерҙарҙан шылтыратыуҙар ҡабул итһәләр, бындай шылтыратыуҙарға яуап бирмәйем. Минең менән ысынлап та һөйләшергә кәрәк булғандар быны эшләй алыр. Халыҡ менән осрашыуҙарҙа бындай мәсьәләләрҙе мотлаҡ тикшереүегеҙҙе һорайым», — тип һыҙыҡ өҫтөнә алды Радий Хәбиров. Сығышы аҙағында Башҡортостан Башлығы ауыл биләмәләре башлыҡтарына яраштырылған эштәре өсөн рәхмәт белдерҙе. – Беҙ ауыр ваҡытта бергәләп эшләйбеҙ, ил, республика алдында торған заманса проблемаларға бергәләп яуап бирәбеҙ, – тине Радий Хәбиров. – Ауырлыҡтар беҙҙең йәмғиәтте берләштергән. Һәм ошо хәл иткес осорҙа халыҡҡа яҡын булырға, улар менән аралашырға һәм кешеләрҙе борсоған темалар буйынса фекер алышырға кәрәк. Был бик мөһим, - тине Радий Хәбиров. Семинар сиктәрендә республика Башлығы ауыл биләмәләрен үҫтереүгә ҡағылышлы һорауҙарға ла яуап бирҙе. Улар араһында — юлдар төҙөү һәм ремонтлау, тораҡ пункттарға газ һуҙыу һәм һыу менән тәьмин итеү, ҡаты көнкүреш ҡалдыҡтарын сығарыу, ауылда янғын хәүефһеҙлеген тәьмин итеү, почта бүлексәләрен ремонтлау һәм йәмәғәт урындарын төҙөкләндереү. Радий Хәбиров семинар йомғаҡтары буйынса ҡабул ителгән бөтә ҡарарҙар уларҙы артабан тормошҡа ашырыу буйынса күрһәтмәләр рәүешендә рәсмиләштереләсәк, тип һыҙыҡ өҫтөнә алды. "Ауыл биләмәләре етәкселәре менән аралашыу барышында беҙ халҡыбыҙҙы нимә борсоғанын, урындарҙа ниндәй бурыстарҙы хәл итергә кәрәклеген билдәләйбеҙ. Шуға күрә бындай семинарҙар, һис шикһеҙ, мөһим, — тине Радий Хәбиров фекер алышыу йомғаҡтары буйынса журналистарға биргән интервьюһында. Фото: Башҡортостан Башлығы сайтынан алынды.