Быйыл ғинуар-апрель айҙарында былтырғы ошо осор менән сағыштырғанда Башҡортостандан Төркиәгә экспорт күләме 17,4 процентҡа артҡан, тип хәбәр итә төбәктең Тышҡы иҡтисади бәйләнештәр һәм конгресс эшмәкәрлеге министрлығы. Ошондай һөҙөмтәгә “Халыҡ-ара кооперация һәм экспорт” милли проектына ярашлы өлгәшкәндәр. (национальный проект “Международная кооперация и экспорт”) -Тәүге өс айҙа Төркиәгә беҙҙең экспорттың 80 процент тирәһен минераль продукттар һәм 19,5 проценты химия сәнәғәте продукцияһы тәшкил итте. Шулай уҡ беҙ аҙыҡ-түлек, сеймал, ағас һәм целлюлоза-ҡағыҙ әйберҙәр ебәрҙек. Шуны билдәләү мөһим, экспорттың ғына артыуы күҙәтелмәй, Башҡортостан менән Төркиә араһында үҙ-ара тауар әйләнеше лә үҫә, - тине төбәктең Тышҡы иҡтисади бәйләнештәр һәм конгресс эшмәкәрлеге министры Маргарита Болычева. - Төркиә партнерҙары менән бер нисә перспективалы проекттар әҙерләйбеҙ. Мәҫәлән, Өфө районында йөк күтәреү ҡорамалын етештереү буйынса инвестиция проекты тормошҡа ашырылыу өҫтөндә. Төркиәнән барлыҡ тейешле технологик ҡорамалдар ҙа килтерелгән, төҙөлөш эштәре йомғаҡлау этабында. Проект буйынса инвестиция күләме яҡынса 120 миллион һум тәшкил итә, - тине Рәсәй Федерацияһы Хөкүмәтенең Төркиәләге сауҙа вәкиллеге ҡарамағындағы республика вәкиле Марат Танһыҡҡужин. “Халыҡ-ара кооперация һәм экспорт” милли проекты яңы иҡтисади бәйләнештәр булдырыуға, Рәсәй производтвоһы тауарҙары экспортын үҫтереүгә йүнәлтелгән. Милли проекттар Рәсәй Президенты Владимир Путиндың ҡарары менән 2019 йылдан тормошҡа ашырыла. Фото: “Башҡортостан” ДТРК-һы.