Радий Хәбиров Үҙәк һайлау комиссияһына документтар тапшырҙы

1 июлдә Өфөлә Радий Хәбиров республиканың Үҙәк һайлау комиссияһына Башҡортостан Башлығы вазифаһына кандидатҡа урындағы үҙидараның вәкиллекле органдары депутаттарының ҡултамғалары менән хуплау ҡағыҙҙарын һәм кандидатҡа хуплау ҡағыҙҙарына үҙ ҡултамғаларын ҡуйған кешеләрҙең исемлеген тапшырҙы. Уның менән бергә БР Үҙәк һайлау комиссияһына документтар тапшырыуға “Берҙәм Рәсәй” партияһының төбәк башҡарма комитеты етәксеһе Руслан Насретдинов һәм кандидаттың финанс вәкиле Максим Ульчев килде. Кандидат урындағы үҙидараның вәкиллекле органдары депутаттарының 462 ҡултамғаһы менән хуплау ҡағыҙҙары, Федерация Советы ағзаһы вазифаһына тәҡдим ителгән өс кандидатура тураһында мәғлүмәт, беренсе финанс отчеты, Рәсәй Федерацияһы биләмәһенән ситтә урынлашҡан сит ил банктарында иҫәптәре (һаҡламдары) булмауы, ҡулаҡса һәм ҡиммәттәре һаҡланмауы, сит ил финанс инструменттарына эйә булмауы һәм (йәки) файҙаланмауы тураһында белдереү ҡағыҙҙары менән таныштырҙы. – Үҙәк һайлау комиссияһына Башҡортостан Башлығы вазифаһына сәйәси партиялар тәҡдим иткән биш кандидаттан документтар килде. Тәүгеләрҙән булып Радий Фәрит улы Хәбиров хуплау ҡағыҙҙарын һәм башҡа кәрәкле документтарҙы тапшырҙы. Ҡалған кандидаттар быны 11 июлдән дә һуңға ҡалмайынса атҡарырға тейеш. Республика Башлығы вазифаһына кандидаттарҙы теркәү 20 июлдә тамамлана, – тип белдерҙе БР Үҙәк һайлау комиссияһы рәйесе Азат Ғәлимханов. Кандидаттарға 1 июлдән алып 11 июлгә 18.00 сәғәткә тиклем республика Башлығы вазифаһына кандидаттарҙы теркәү өсөн хуплау ҡағыҙҙарынан тыш, республиканың Үҙәк һайлау комиссияһына кандидат тураһында мәғлүмәттәргә үҙгәрештәр индереү тураһында мәғлүмәт, беренсе финанс отчеты, Рәсәй Федерацияһы сенаторы вәкәләттәрен биреү өсөн өс кандидатура тураһында мәғлүмәт бирергә кәрәк. Уларҙың береһе, әгәр кандидат һайланһа, тейешле вәкәләттәргә эйә буласаҡ, шуға ла кандидаттың иҫәптәре (һалынған аҡсаһы), Рәсәй Федерацияһынан ситтә урынлашҡан сит ил банктарында ҡулаҡсаһы һәм ҡиммәтле әйберҙәре, сит ил финанс инструменттары булмауы һәм ҡулланмауы тураһында яҙма белдереү тапшыра. Иҫегеҙгә төшөрәбеҙ, быйыл Башҡортостан Башлығын һайлауҙа тауыш биреү өс көн – 6, 7, 8 сентябрҙә барасаҡ. Фото сығанағы: Башинформ.