Башҡортостан иҡтисадына инвестициялар күләменең үҫеш темпы һуңғы биш йылда уртаса Рәсәй күрһәткестәренән ике тапҡырға юғарыраҡ. Был хаҡта 1 июлдә Башҡортостан Башлығы Радий Хәбиров уҙғарған оператив кәңәшмәлә беренсе вице-премьер – иҡтисади үҫеш һәм инвестиция сәйәсәте министры Рөстәм Моратов хәбәр итте. Әгәр 2019 йылда инвесторҙар проекттарҙы тормошҡа ашырыуға 338 миллиард һум йүнәлтһә, 2023 йылда инвестициялар күләме 620 миллиард һумға етте. Биш йылда үҫеш – 52,9 процент. Шул уҡ ваҡытта Рәсәй буйынса уртаса күрһәткес 29,8 процентҡа күтәрелгән. Башҡортостанда тормошҡа ашырылған инвестиция башланғыстарының көнүҙәк портфеленә дөйөм суммаһы 1,2 триллион һумлыҡ 2,2 меңгә яҡын проект инә, улар яҡынса 61 мең яңы эш урыны булдыра. Рөстәм Моратов әйтеүенсә, республика Инвестиция комитеты эшмәкәрлеге - төбәк иҡтисадына инвестициялар йәлеп итеүҙең һөҙөмтәле инструменттарының береһе. Ул эшләгән осорҙа 153 тематик кәңәшмә уҙғарылды, унда 630 башланғыс ҡаралды. Муниципаль кимәлдә иһә республика етәксеһе башланғысы менән хакимиәт башлыҡтары урынбаҫарҙары – бизнес-шәрифтәр институты индерелде. Бизнес менән әүҙем эш Башҡортостандың Инвестиция мөхите торошоноң милли рейтингында юғары позицияларына булышлыҡ итә. 2023 йыл йомғаҡтары буйынса республика унда тәүге тапҡыр өсөнсө урынды алды. – Төбәк 70 күрһәткестән 32 күрһәткес буйынса рейтингтың иң яҡшы төркөмөндә тора, – тип билдәләне Рөстәм Моратов. – Мәҫәлән, ер участкаһын сауҙаһыҙ ҡуртымға алыу ваҡыты былтыр – 27-нән 24 көнгә, ә милек хоҡуғын теркәү ваҡыты дүрттән өс көнгә тиклем ҡыҫҡартылды. Башҡортостан Республикаһының Инвестиция порталы ла федераль эксперттарҙың юғары баһаһын алды. 2024 йылда Башҡортостанда бизнес менән әүҙем эш алып барыла. Мәҫәлән, беренсе кварталда республика иҡтисадына инвестициялар күләме уҙған йылдың ошо уҡ осоро менән сағыштырғанда 24,2 процентҡа үҫкән һәм 105 миллиард һумға еткән. Ташыу һәм һаҡлау (7,7 миллиард һум), шулай уҡ эшкәртеүсе производстволар (7,3 миллиард һум) өлкәһендә башланғыстар күрһәткестең ыңғай динамикаһына төп өлөш индерҙе. 2024 йылдың беренсе кварталында төбәктең инвестиция портфеле дөйөм хаҡы 72 миллиард һумлыҡ 116 проектҡа артҡан. Башҡортостан Башлығы республиканың идара итеү командаһына, Хөкүмәттең иҡтисади блогына, шулай уҡ муниципалитеттарға инвестициялар йәлеп итеү йәһәтенән һөҙөмтәле эшләгәндәре өсөн рәхмәт әйтте. – Бөтә күрһәткестәр ҙә лайыҡлы. Был – яйға һалынған команда эше һөҙөмтәһе, – тине Радий Хәбиров. – Шул уҡ ваҡытта һәр етәксе өсөн артабан да иҡтисадҡа капитал һалыуҙар үҫешен тәьмин итеү мөһим. Беҙҙең бурыс – йыллыҡ инвестициялар күләмен бер триллион һумға тиклем еткереү. Фото: Башҡортостан Башлығы сайты.