Былтыр йәй Күгәрсен районының Воскресенское ауылында фажиғәле хәд булды. Lada Priora машинаһы тәгәрмәсе аҫтында 20 йәшлек Сабрина Ильясованың ғүмере өҙөлдө. Ошо көндән ҡыҙҙың әсәһе Валентина Ильясованың тормошонда тыныслыҡ бөтә. Бәхетһеҙ осраҡ төндә була. Сабрина төнгө сменанан ҡайтып килгән була. Ул ауылдағы АЗС-та кассир булып эшләгән һәм ҡуртымға йорт алып йәшәгән. Ҡапыл юлда машина килеп сыға. Уның руле артында 17 йәшлек Илназ Солтанов ултырған була. Егеттең водитель таныҡлығы булмай, ул машина хужаһы рөхсәте менән рулгә ултыра. Билдәле булыуынса, егет ныҡ иҫерек булған, ә ҡайһы бер ауылдаштары әйтеүенсә, рөхсәт ителмәгән матдәләр ҙә ҡулланған булған. Пассажир урынында автомобилдең 29 йәшлек хужаһы ла ултырған. Бер мәлдә водитель юл ситенән китеп барған ҡыҙҙы тапата һәм кәртәгә барып бәрелә. Бәрелеш ныҡ көслө була, ҡыҙ табиптар килгәнсе вафат була. Урынға килгән полиция хеҙмәткәрҙәре водителдең иҫерек булыуын билдәләй. Уға һәм пассажирға бер нимә лә булмай. Авария буйынса енәйәт эше ҡуҙғатыла, тик тәфтиш ваҡытында ла, суд барғанда ла Илназ тыныс ҡына ауылында йәшәп ята. Ул үҙенең ғәйебен таныһа ла, ҡыҙҙың туғандары алдында ғәфү үтенмәй. Сабринаның әсәһе бер йыл үтеүгә ҡарамаҫтан ҡыҙының үлемен тыныс кисерә алмай. Ул көн һайын ҡыҙының ҡәберенә йөрөй һәм ҡыҙыл ҡәнәферҙәр алып бара. Асыҡланыуынса, Валентина Ильясова суд ултырыштарына йөрөмәй башлаған, сөнки ул быны күтәрә алмай. Ғәйепле егетте күреүе лә уға бик ауыр. Уның ҡан баҫымы күтәрелеп, судҡа ашығыс ярҙам саҡыртҡандар. Һуңғы суд ултырышында иһә18 йәшлек Илназ Солтановтың әсәһе илаған. Күгәрсен район-ара суды уны 3 йылға һәм 10 айға колония-ауылға хөкөм итте, шулай уҡ зыян күреүсегә бер миллион һум түләргә ҡарар итте. Үлемесле юл фажиғәһендә ғәйепле тип танылған хөкөм ҡарары сығарылғандан һуң, суд бинаһынан тыныс ҡына сығып, өйөнә йүнәлгән. Колония-ауылға ул үҙ аллы килергә тейеш. Һәләк булған ҡыҙҙың туғандары уның күҙҙәрендә тәүбә итеүҙең күләгәһен дә күрмәгән һәм унан ғәфү үтенеү һүҙҙәрҙе лә ишетмәгән. Ә хөкөм ҡарарын иғлан итеүгә һәләк булған Сабринаның әсәһе Валентина Ильясованы табиптар индермәгән. Уның йәнә хәле насарайыуы ихтимал тип борсолғандар. Хөкөм ҡарары әлегә үҙ көсөнә инмәгән, ике яҡ та ялыу бирергә йыйынған. 20 йәшлек ҡыҙҙың ғүмерен өҙгән өсөн уны бик йомшаҡ тип иҫәпләйҙәр. Фото: КП-Өфө.