Аҡ юл һеҙгә, йәштәр!

Рәми Ғарипов исемендәге 1-се Башҡорт республика интернат-гимназияһының сығарылыш уҡыусыһы Вилдан Мәжитов мәктәпте ҙур уңыштар менән тамамлай, бигерәк тә физика буйынса берҙәм дәүләт имтиханын 100 балға тапшырыуы һөйөндөрә. Өмөтлө егет киләсәген теүәл фәндәр менән бәйләргә теләй. – Бөгөн шатлыҡлы ла, моңһоу ҙа тойғолар кисерәм. Бер яҡтан, оло тормошҡа аяҡ баҫыуыма ҡыуанһам, икенсе яҡтан, яратҡан гимназиямдан, уҡытыусыларымдан һәм дүрт йыл буйы бергә уҡыған һабаҡташтарымдан айырылғым килмәй. Директорыбыҙ Илнур Рифат улы Сәлиховҡа, уҡытыусыларға, тәрбиәселәргә, шулай уҡ өҫтәмә белем биреү педагогтарына, ашнаҡсыларға, табиптарға, йыйыштырыусыларға – бөтәһенә лә оло рәхмәт. Класс етәксебеҙ, физика уҡытыусыһы Гөлдәр Вәис ҡыҙы Әхмәтова менән тәрбиәсебеҙ Фәүзиә Манъюл ҡыҙы Шафиҡова алдында бигерәк тә рәхмәтлебеҙ, бурыслыбыҙ. Беҙ бер ҡасан да гимназиябыҙҙы онотмаҫбыҙ! – тип тойғолары менән уртаҡлашты Вилдан. Хәйбулла районының Әбеш мәктәбен быйыл өс уҡыусы – ике егет һәм бер ҡыҙ тамамлай. Улар берҙәм дәүләт имтиханын уңышлы тапшырған, ә бына Айзилә Әминева башҡорт теленән 95 балл йыйыуға өлгәшкән. – Имтихандарҙы тапшырыуы ҡыйын булманы, сөнки мәктәбебеҙҙә бик көслө уҡытыусылар эшләй, улар беҙгә төплө белем бирҙе. Башҡорт теленән юғары балл йыйыуымда ла уҡытыусым Әминә Сәлихйән ҡыҙы Юнысованың өлөшө ҙур. Ул мине йыл да олимпиадаларға әҙерләне. Артабан Мифтахетдин Аҡмулла исемендәге Башҡорт дәүләт педагогия университетының башҡорт һәм инглиз телдәре бүлегендә уҡырға теләйем, – тине Айзилә. Бынан алда Башҡортостан Башлығы Радий Хәбиров БДИ йомғаҡтары буйынса Башҡортостан уҡыусыларының рекордлы һөҙөмтәләре тураһында хәбәр иткәйне. Уның һүҙҙәренсә, быйыл 147 имтихан эше юғары баһа алған – ул былтырғыға ҡарағанда ике тапҡырға тиерлек күберәк (ул саҡта 82 ине). 11 сығарылыш уҡыусыһы бер юлы ике фәндән 100 балл йыйған, былтыр ундайҙар икәү ине. – Бығаса булмаған һөҙөмтәләр. Балаларыбыҙҙы ихлас ҡотлайым! Һөнәр һайлауҙа уңыштар теләйем, һәр саҡ уларға уңыштар юлдаш булһын, – тип яҙҙы Радий Хәбиров. – Һуңғы йылдарҙа имтихандарҙы 100 балға тапшырыусылар, олимпиадаларҙа еңеүселәр һанының артыуы – мәктәп мәғарифын яңыртыу буйынса башҡарған бөтә эштәребеҙҙең һөҙөмтәһе ул.