Արցախցիները, ովքեր չեն նախատեսում ՀՀ քաղաքացիություն ստանալ, հնարավոր է՝ դիմեն դատարան՝ կենսաթոշակային խնայողություններ ստանալու համար, տեղեկացել է «Հրապարակ»-ը։
Այժմ, ըստ հրապարակման, արցախցի քաղաքական գործիչները խորհրդակցում են իրավաբանների հետ։
«Մեր տեղեկություններով՝ Արցախի քաղաքական գործիչները հանդիպում են նախաձեռնում սահմանադրագետների, իրավունքի մասնագետների, իրավաբանների հետ՝ քննարկելու այս հարցը և ընտրելու լուծման ճանապարհը։ Հանդիպման օրը դեռ որոշված չէ, սակայն մեր աղբյուրը չբացառեց, որ մասնագետների հետ քննարկումից հետո լուծման մի քանի ճանապարհ կընտրվի՝ սկսած անհատապես դատարաններ դիմելուց, վերջացրած Սահմանադրական դատարան դիմելով», - հայտնել է թերթը
Արցախցիները օրենսդրական փոփոխությունների միջոցով այս հարցի լուծումը քննարկել են նաև խորհրդարանական ընդդիմության հետ, սակայն, հաշվի առնելով դա, ՔՊ մեծամասնության խորհրդարանի պարագայում դա գրեթե բացառվում է, այդ պատճառով մնում է միայն դատարան դիմելը։
Թերթի տեղեկությամբ, խոսքը մոտ 17 մլրդ դրամի և մոտ 35 հազար շահառուի մասին է։ Ըստ թերթի, ով փորձում է ստանալ կուտակայինը, պետական գերատեսչությունում չեն տալիս կոնկրետ պատասխան, իսկ տարբեր կառույցներում պատասխանում են, «թե իրենք կապ չունեն կուտակային ֆոնդերի հետ», մինչդեռ այդ գումարները կուտակվել են ՊԵԿ-ի միջոցով՝ ՀՀ-ում գործող կենսաթոշակային ֆոնդերում:
Նորություններին հետևեք մեր կայքում, ինչպես նաև Telegram-ում և YouTube-ում