“Фән сәғәте” үткәрелде

26 июндә Башҡортостан Башлығы Радий Хәбиров “Фән сәғәте” форматында тематик күсмә кәңәшмә үткәрҙе. Сара Рәсәй Фәндәр академияһының Металдарҙың үтә пластикалылығы проблемалары институтында булды. Кәңәшмәлә профилле министрлыҡтар һәм ведомстволар етәкселәре, төбәк вуздары ректорҙары, фәнни йәмәғәтселек вәкилдәре ҡатнашты. Көн үҙәгендә тикшереү проекттарын тормошҡа ашырыу һәм уларға республика ярҙамы мәсьәләләре ине. Башҡортостан Башлығы үҙенең сығышында фәнни эшмәкәрлектең мөһимлеген һәм иҡтисадтың төрлө тармаҡтарына, тәү сиратта машиналар төҙөүгә яңы эшләнмәләрҙе сафҡа индереүҙең мөһимлеген һыҙыҡ өҫтөнә алды. Республика етәкселеге Башҡортостандың фәнни-технологик үҫештең программаларын эшләгән пилот төбәктәре иҫәбенә инеүе хаҡында әйтте. -Быйыл август аҙағында Рәсәй Хөкүмәтендә һәм Федерация Советында программаны яҡлаясаҡбыҙ, - тине Радий Хәбиров. – Һәм был өлкәләге төп йүнәлештәребеҙҙең береһе – фәнгә һәм юғары мәктәпкә булышлыҡ итеү. Башҡортостан Башлығы шулай уҡ фәнни-техник парк концепцияһын күрһәтергә тейешле эшлекле төркөмдөң ойошторолоуы тураһындағы ҡарарға ҡул ҡуйыуы тураһында хәбәр итте. “Фән сәғәте”ндә видеобәйләнештә Рәсәй Фәндәр академияһы вице-президенты Сергей Чернышев ҡатнашты. Ул Башҡортостандың илдең техник суверенитетын тәьмин итеүгә һиҙелерлек өлөш индереүен әйтте. Ә төбәк етәкселеге фән үҫешенә һәм ғалимдарға ярҙам итеүгә ҙур иғтибар бүлә. Рәсәй Фәндәр академияһының Металдарҙың үтә пластикалылығы проблемалары институтының фәнни етәксеһе Радик Мөлөков институттың төп эш йүнәлештәре һәм белгестәрҙең төп эшләнмәләре тураһында һөйләне. Әйткәндәй, кәңәшмә башланғанға тиклем Башҡортостан Башлығы ойошманың инновация продукцияһы һәм технологик мөмкинлектәре менән танышты. Рәсәй Фәндәр академияһының Металдарҙың үтә пластикалылығы проблемалары институты директоры урынбаҫары Айрат Назаров институттың Инновациялар үҙәген ойоштороу масштаблы проекты тураһында һөйләне. 2,5 миллиард һум тирәһе тәшкил иткән был проект етештереү-һынау корпусын күтәреүҙе, шулай уҡ юғары эшкәртеү ҡорамалдарын һатып алыуҙы күҙаллай. “Фән сәғәте”ндә ҡатнашыусылар был проектты хупланы. Кәңәшмәлә институттың башҡа перспективалы йүнәлештәре тураһында ла һөйләштеләр. Сара аҙағында Рәсәй Фәндәр академияһының Металдарҙың үтә пластикалылығы проблемалары институтының әйҙәүсе белгестәренә дәүләт наградаларын тапшырыу тантанаһы булды. Сығанаҡ, фото: glavarb.ru/rus/press_serv/novosti/180034.html