Ҡыҙғанысҡа ҡаршы, һуңғы ваҡытта наркотик ҡулланыусылар һаны күбәйә бара. “Наркотик” һүҙе грек теленән алынған һәм ойоп ҡалыу, һиҙемләү бөтөү тигән мәғәнәне аңлата. Наркотиктарға бигерәк тә йәш быуын вәкилдәре бик тиҙ өйрәнә, психик һәм физик бәйлелек барлыҡҡа килә. Нервы системаһы таушала, кеше хәлһеҙләнә. Ошо афәт һөҙөмтәһендә әллә күпме йәш ғүмерҙәр юғала. Тормоштоң ҡыҙығы ҡалмай, кеше кешелеклелеген юғалта, әллә күпме фажиғәләр теркәлә. Наркотиктарға ҡаршы айлыҡтың төп бурыстары – наркоманлыҡ һәм наркотик енәйәтселек проблемаларына иғтибар йәлеп итеү, бәлиғ булмағандарҙың наркотик ҡулланыуҙың кире эҙемтәләре һәм уларҙың законһыҙ әйләнешендә ҡатнашыу өсөн яуаплылыҡ тураһында хәбәрҙарлыҡ кимәлен күтәреү; балаларҙы һәм үҫмерҙәрҙе сәләмәт тормошҡа йәлеп итеү, балалар һәм йәштәр менән комплекслы профилактик наркотиктарға ҡаршы эш ойоштороу. Ҡыҙғанысҡа ҡаршы, был афәт һәр кемгә ҡағылырға мөмкин. Көсөргәнешлелек, стреслы хәлдәрҙең күбәйеүе, билдәһеҙлек, тотороҡһоҙлоҡ йәш быуын вәкилдәрендә наркотик матдәләр ҡулланыу кеүек кире күренештәрҙе арттыра, шуға күрә бала саҡтан һаулыҡҡа һаҡсыл ҡараш булырға, сәләмәт тормош алып барырға, спорт менән дуҫ булырға кәрәк. Ғүмерҙең һәр көнө ҡәҙерле икәнлеген хәтерҙән сығарырға ярамай. Айлыҡ барышында дөйөм белем биреү ойошмаларында үҙ һаулығына яуаплы мөнәсәбәт булдырыуға, сәләмәт йәшәү рәүешен пропагандалауға, бәлиғ булмағандарҙа тәмәке тартыуға, алкоголгә, наркотиктар ҡулланыуға кире мөнәсәбәт булдырыуға йүнәлтелгән иҫкәртеү әңгәмәләре, тренингтар үткәреү планлаштырыла. Уҡыусыларға наркотиктарға ҡаршы видеороликтар һәм фильмдар күрһәтелә. Һаулыҡ һаҡлау ойошмаларында амбулатор-поликлиника бүлексәләрендә бушлай, аноним консультациялар һәм сәләмәт йәшәү рәүеше буйынса тәҡдимдәр, шул иҫәптән табип-психиатр-нарколог һәм медицина психологы консультациялары биреү маҡсатында “Асыҡ ишектәр көнө” үткәрелә, китап күргәҙмәләре, наркотиктарға ҡаршы тематикаға мәғлүмәт стендтары ойошторола. Тикшереү һәм рейд саралары наркотиктарҙың законһыҙ әйләнеше өлкәһендәге енәйәттәрҙе һәм административ хоҡуҡ боҙоуҙарҙы асыҡлау, туҡтатыу өсөн бәлиғ булмағандарҙың күпләп йәшәгән урындарында үтә. 26 июндә билдәләнгән Халыҡ-ара наркоманияға ҡаршы көрәш көнөнә арналған бөтә саралар мәғариф һәм йәштәр ойошмалары, мәҙәниәт ойошмалары, иҫкәртеү субъекттары менән берлектә ойошторола. Әйткәндәй, был дата 1987 йылдан алып Берләшкән Милләттәр Ойошмаһының Генераль Ассамблеяһы ҡарары буйынса билдәләнә. Наркотиктар таратыуға ҡаршы көрәш тарихына инде 100 йылдан ашыу. 1909 йылдың февралендә Шанхай опиум комиссияһы ҡатнашыусылары, ә уның эшендә 13 ил, шул иҫәптән Рәсәй ҙә ҡатнаша, Азия илдәренән наркотиктар индереүҙе сикләү юлдарын эҙләп ҡарай. Айлыҡ саралары 2024 йылдың 1 июленә тиклем үткәрелә.