Радий Хәбиров һәм Дмитрий Глушенков “Патриот”та булды

26 июндә Шишмә районында Башҡортостан Башлығы Радий Хәбиров һәм Үҙәк хәрби округ ғәскәрҙәре командующийы вазифаһын ваҡытлыса башҡарыусы генерал-лейтенант Дмитрий Глушенков Рәсәй Геройы Максим Серафимов исемен йөрөткән “Патриот” паркында булды. Белеүебеҙсә, 2022 йылдың июнендә парк биләмәһендә “Авангард” уҡыу-методик үҙәге эшләй башланы. Унда тотош республиканан өлкән кластар уҡыусылары сборҙар үткәрә. Улар устав, тактика нигеҙҙәрен өйрәнә, строй һәм хәрби-медицина буйынса әҙерлек үтә. “Патриот”та шулай уҡ мәҙәни-тәрбиә, спорт һәм мәғариф саралары, хәрби хәрәкәттәр ветерандары менән осрашыуҙар үткәрелә. Бында “Партизан ауылы” комплексы һәм ярыштар өсөн “Геройҙар уҙыштары” трассаһы бар. Радий Хәбиров һәм Дмитрий Глушенков дәрестәр өсөн кабинеттарҙы, шул иҫәптән электрон тирҙы һәм беренсе медицина ярҙамы кабинетын да ҡараны. Рәсәй Геройы Максим Серафимов иҫтәлегенә бында уның исемен йөрөткән кабинет булдырылған. “Авангард” уҡыу-методик үҙәге етәксеһе Никита Рекрут өлкән кластарҙа уҡыусыларҙың сборҙарҙы йыл әйләнәһенә үтеүе тураһында белдерҙе. Курсанттарҙың уҡыуы өсөн сифатлы матди база булдырылған. “Патриот” биләмәһендә парашют вышкаһы һәм төрлө спорт ҡоролмалары барлыҡҡа килгән. Радий Хәбиров һәм Дмитрий Глушенков “Патриот” паркында кубриктарҙы ҡараны. Уларҙа хәрби-патриотик сменалар һәм сборҙар ҡатнашыусылары йәшәй. Былтыр 49 кешегә иҫәпләнгән яңы модулдәрҙе йәйге лагерҙарҙы заманлаштырыу федераль программаһы буйынса һалғайнылар. Уларҙы файҙаланыуға тапшырғас, “Авангард”та 10 меңдән ашыу курсант уҡыуҙар үтә ала. Үҙәк хәрби округ ғәскәрҙәре командующийы вазифаһын ваҡытлыса башҡарыусы генерал-лейтенант Дмитрий Глушенков “Авангард” уҡыу-методик үҙәге музейында маҡтаулы ҡунаҡтар китабында хәрби-десантсыларға уңыштар теләп яҙҙы. -Һеҙҙең парк яҡшы, эшлекле. Граждандар фронтында ла, шулай уҡ хәрби һөнәр буйынса ла илде алға этәргән йәш быуын вәкилдәрен тәрбиәләү өсөн булдырылғанлығы күренеп тора, - тип һыҙыҡ өҫтөнә алды Дмитрий Глущенков студенттар менән аралашҡанда. Сығанаҡ, фото: glavarb.ru/rus/press_serv/novosti/179997.html