Биҙәлгән аттарҙа ЗАГС-ҡа барғандар

Оло йәшкә етһәләр ҙә, бер-береһен ҡәҙерләп, хөрмәтләп йәшәгән парҙар була. Уларҙың бер-береһе өсөн генә яратылғаны әллә ҡайҙан күренеп тора. Ишембай районының Яңы Әптек ауылында йәшәүсе Гәүһәр менән Баязит Латиповтар тураһында ла тап шул һүҙҙәрҙе әйтергә мөмкин. Ҡарашта ла, үҙ-ара һөйләшеүҙә лә сағыла йылы мөнәсәбәт. Гәүһәр апай – Арлар ауылынан, Баязит ағай иһә Һайрандыҡы. Бер мәктәптә уҡыйҙар. Тап шул үҫмер осорҙа улар бер-береһенә ғашиҡ була. Тәнәфестәрҙе көтөп алып, бер-береһенә запискалар тапшырған мәлдәрҙе әле лә йылы хистәр менән һағынып иҫкә ала Латиповтар. Баязит ағай ҡыҙҙың зәп-зәңгәр матур күҙҙәренә ғашиҡ булһа, Гәүһәр апайҙы иһә егеттең сибәрлеге, ҡуйы бөҙрә сәстәре әсир итә. – Мәктәптә уҡығанда еңел атлетика менән шөғөлләндем. Физкультура техникумына барырға теләгәйнем, “малай кеше һымаҡ унда уҡып йөрөмә” тип атайым ҡаршы төштө. Шуға Китапхана техникумына юлландым, аҙаҡ ситтән тороп Силәбе ҡалаһындағы Мәҙәниәт һәм сәнғәт академияһында юғары белем алдым, – тип һөйләп алып китте Гәүһәр апай. Баязитты армияға оҙата, ҡаршы ала. Байтаҡ йылдар үтһә лә, уның һалдат хаттарын әле лә ҡәҙерле иҫтәлек итеп һаҡлай. Егете яҙ армиянан ҡайтҡас, көҙ өйләнешеп тә ҡуялар. -1983 йылда, Яңы йыл осоронда, туйыбыҙ булды. Биҙәлгән аттарҙа ауыл советына ЗАГС-ҡа барҙыҡ. Бер аҙна дауам итте беҙҙең туй. Тотош ауылдың байрамына әүерелгәйне ул, – тип йылмайып хәтергә алды Латиповтар ул көндө. Ете балалы ҙур ғаиләгә килен булып төшә ҡыҙ. Баязит – бер бөртөк малай. Тәүге йылда төп йортта йәшәйҙәр, икенсе йылына Яңы Әптек ауылына күсеп сығалар. Бергә йәшәүҙәренә – 41, ошо ауылда төпләнеүҙәренә 40 йыл йыл ваҡыт үткән. Бала саҡтан эшкә өйрәнеп үҫкән йәштәргә донъя көтөп алып китеүе ауыр булмай. Әйткәндәй, Гәүһәр апай үҙе лә туғыҙ балалы ғаиләнән. “Бәләкәйҙән эш менән булдыҡ. Әсәйемә фермаға ярҙам итергә лә йөрөнөм. Дүртенсе класта уҡығанымда уға еңел булһын тип, дүрт һыйыр һауыша торғайным”, – тип балалыҡ осорон да хәтеренә алды. Тырыш, матур ғаилә ауылдаштары араһында ла ихтирамлы була. Гәүһәр Әбделхәй ҡыҙы ауыл китапханаһында хеҙмәт итә, клубта эшләп килгән “Тамаша” халыҡ театрында режиссер булған йылдарында ла байтаҡ хеҙмәт ҡаҙаныштарына өлгәшә. Конкурстарҙағы еңеүҙәрҙе, гастролдәрҙе, халыҡ менән бергә дәртләнеп эшләгән осорҙо ул әле лә һағынып иҫкә ала. Баязит Марс улының хеҙмәт юлы төҙөлөшкә бәйле, ул совхозда төҙөлөш цехында заманында йорттар һалған. Тап ошо һөнәрҙе үҙ итеүе ғәжәп тә түгел. Уның ағас эшенә оҫталығы тураһында тирә-яҡта белеп бөткәндәр. Балалары, ейәндәре тыуған һайын һәр береһенә семәрләп, матур итеп бишектәр яһай. Өй йыһаздары ғына түгел, ейәндәренә бәләкәй саҡтарында машина, мылтыҡҡа тиклем үҙ ҡулдары менән эшләп бирә һәм бәләкәстәр олатайҙары эшләгән уйынсыҡтар менән бик яратып уйнай. -Ике яҡтан да олатайҙарым ағас эшенә оҫта булды. Бала саҡта беҙгә тәгәрмәстәр ҡуйып, арба эшләп биргәндәре хәтерҙә. Аҙаҡ атайым эргәһендә йөрөп тә эш рәтенә өйрәнеп үҫтем. Тәүге тапҡыр үҙем ағастан эшләгән әйберҙе лә хәтерләйем әле. Ун йәш самаһы булғандыр ул ваҡытта. Күршеләргә ҡунаҡҡа ҡаланан минең тиҫтер ейәндәре ҡайта ине. Уның арбама һәр ваҡыт күҙе ҡыҙа торғайны. Шуға уға тип икәүләшеп арба эшләргә керештек, матур ғына килтереп сығара алдыҡ, – ти ағас оҫтаһы. Төҙөлөштән һуң Баязит ағай тирмәндә лә, мәктәптә хужалыҡ мөдире булып та эшләй, Камчатка яҡарында ла хеҙмәт итеп ҡайта. Хеҙмәт, балалар үҫтереү мәшәҡәттәре менән ғүмер аҡҡаны һиҙелмәй ҙә ҡала. Латиповарҙың улдары Айрас, ҡыҙҙары Юлиә – икеһе лә тормошта үҙ юлдарын тапҡан. Юғары белем алып, үҙҙәренең ғаиләләрен ҡорғандар. Гәүһәр апай менән Баязит ағай – дүрт ейән-ейәнсәргә олатай менән өләсәй. -Бер-береңде хөрмәт итеп йәшәүҙә – донъя йәме. Ғаиләлә күп нәмә ир кешегә бәйле. Баязит ағайығыҙ мине ҡурсалап, ҡәҙерләп кенә йәшәтте. Балаларын да ныҡ яратты. Ир кеше яҡшы булһа, ҡатын-ҡыҙ ҙа уның өсөн өҙөлөп торасаҡ, ­– ти Гәүһәр апай. Үҙ-ара йылылыҡ бөркөп торған Латиповтарға һоҡланмау мөмкин түгел. Артабан да был ғаиләлә ҡот һүнмәһен, бәрәкәт юғалмаһын. Автор фотоһы.