Йәшәйештең киҫкен мәсьәләләрен хәл итеүгә районға байтаҡ финанслау талап ителә

Башҡортостан Республикаһы Башлығы Радий Хәбиров ҡушыуы буйынса республика Хөкүмәте Премьер-министры Андрей Назаров Стәрлетамаҡ районына эш сәфәрен ойошторҙо, Хөкүмәт ултырышын үткәрҙе, унда муниципалитеттың социаль-иҡтисади үҫеше мәсьәләләре тикшерелде. Министрҙар кабинеты етәксеһе уҙған биш йыллыҡта райондың үҫеш һөҙөмтәләрен иғлан итте. – Биш йыл эсендә урындағы бюджеттың килеме дүрттән бер өлөшкә тиерлек үҫкән. Үҙебеҙ етештергән тауарҙар күләме 2,5 тапҡырға тиерлек арта. Шул уҡ ваҡытта сәнәғәттә дүрт тапҡырға үҫеш күҙәтелә, ауыл хужалығында - 55 процент. 2019 йыл менән сағыштырғанда торлаҡ 1,5 тапҡырға тиерлек күберәк сафҡа индерелгән. Бәләкәй һәм урта эшҡыуарлыҡ субъекттары һаны 30 процентҡа артҡан, улар 1,5 меңдән ашыу. Алты тораҡ пунктты һыу менән тәьмин итәләр, 220 километрҙан ашыу автомобиль юлы төҙөлә һәм ремонтлана, – тип белдерҙе Хөкүмәт Премьер-министры. Шул уҡ ваҡытта районда сирле нөктәләр бар, уларҙы тигеҙләргә кәрәк. Мәҫәлән, “Инцидент-менеджмент” системаһы мәғлүмәттәре буйынса, юлдарға, торлаҡ-коммуналь хужалыҡҡа һәм төҙөкләндереүгә ҡағылышлы иң хәл ителмәй килгән мәсьәләләр бар. Стәрлетамаҡ районында социаль-иҡтисади хәлде тотороҡландырыу маҡсатында республика Хөкүмәте аппаратына башҡарма власть органдары менән берлектә ағымдағы хәлде анализлау һәм тейешле тәҡдимдәр әҙерләү бурысы йөкмәтелде. Бөтә саралар ике “Юл картаһы”на тупланған, улар 2024 йылдың 1 сентябренә тиклем тормошҡа ашырыла торған ҡыҫҡа ваҡытлы үҫеш планы һәм 2030 йылға тиклемге юл картаһы. Стәрлетамаҡ районы хакимиәте башлығы Рита Сәмиғуллина муниципалитетҡа булышлыҡ иткәндәре өсөн төбәк властарына рәхмәт белдерҙе. “Юл картаһы” сараларын тормошҡа ашырыу район халҡы өсөн ҙур әһәмиәткә эйә, тип билдәләне ул. Йәшәйештең киҫкен мәсьәләләрен хәл итеүгә районға байтаҡ финанслау талап ителә, сығымдар буйынса дөйөм ихтыяж биш миллиард һумдан ашыу тәшкил итә, тип уртаҡлашты район башлығы. – 13 майҙа республика Башлығы етәкселегендә Республика менән идара итеү үҙәгендә үткән эш кәңәшмәһендә бөтә проблемалы мәсьәләләрҙе күтәрҙек. Радий Фәрит улына һәм Хөкүмәткә “киҫкен” мәсьәләләребеҙҙе контролдә тотҡанығыҙ өсөн рәхмәт белдерәм, эш алға китте. Мәҫәлән, әле биш һыу ҡыуҙырыу башняһы буйынса эш алып барыла. Покровкала һыу үткәргестәге етешһеҙлектәрҙе бөтөрәләр, системаны һыу менән тултыралар. Мәғариф министрлығы булышлығында ике мәктәптең ҡыйығын ремонтлауға, Мәҙәниәт министрлығы аша бер мәҙәниәт йорто бинаһын өлөшләтә ремонтлауға һәм һигеҙ мәҙәниәт учреждениеһының матди-техник базаһын нығытыуға аҡса алдыҡ, – тип билдәләне Рита Сәмиғуллина. Районда алып барылған эш тураһында профилле власть органдары етәкселәре үҙ йүнәлештәре буйынса отчет бирҙе. Эшмәкәрлек һөҙөмтәләре, шулай уҡ проблемалы мәсьәләләр һәм уларҙы хәл итеү механизмдары иғлан ителде. Мәҫәлән, муниципалитетҡа үҙенең инвестиция портфелен үҫтереү өсөн республика Инвестициялар йәлеп итеү үҙәге туплаған тәжрибәне ҡулланырға тәҡдим ителде. 2024 йылдың маҡсатлы йүнәлеше – миллиард һумдан кәм булмаған проекттар менән кәм тигәндә 10 инвестор йәлеп итеү һәм инвестицияларҙың 15 процентлы үҫешен тәьмин итеү. Мәҙәниәтте үҫтереү мәсьәләләрен тикшергәндә Премьер-министр район хакимиәтенә 1 авгусҡа тиклем Байраҡ ауылында мәҙәниәт йортон төҙөү буйынса йәмәғәт тыңлауҙарын үткәрергә ҡушты. Ер һәм мөлкәт мөнәсәбәттәре министрлығы һәм Мәҙәниәт министрлығы менән берлектә бер ай эсендә ер участкаһын билдәләргә кәрәк. Ултырышта ҡатнашыусылар район ауылдарында һаулыҡ һаҡлауҙың беренсел звеноһын нығытыу кәрәклеген билдәләне. Биш йыл эсендә бында ни бары өс фельдшер-акушерлыҡ пункты сафҡа индерелгән. Андрей Назаров бөтә мохтаждарға медицина ярҙамы күрһәтеүҙе тәьмин итергә, етерлек күләмдә фельдшер-акушерлыҡ пункттарын булдырырға һәм тейешле кадрҙар әҙерләй башларға ҡушты. Бынан тыш, 2024 йылда ике стационар рентген аппараты килтереләсәк. Бындай техниканы киләһе йылдарҙа ла һатып алыу планлаштырыла. Торлаҡ төҙөлөшө өлкәһендә ер участкалары алған күп балалы ғаиләләр әүҙем төҙөгән биләмәләрҙә инфраструктура булдырырға кәрәк. Премьер-министр Төҙөлөш, Транспорт һәм Торлаҡ-коммуналь хужалыҡ министрлыҡтарына муниципалитет менән берлектә күп фатирлы һәм шәхси торлаҡ йорттар төҙөү өсөн бирелгән ер участкаларын инженер һәм транспорт инфраструктураһы менән тәьмин итеү буйынса саралар планын төҙөргә ҡушты. – Дөйөм алғанда, бөгөнгө фекер алышыуҙы иҫәпкә алып, Стәрлетамаҡ районының социаль-иҡтисади үҫеше буйынса оҙайлы сроклы “Юл картаһын” эшләп бөтөргә һәм раҫлауға тапшырырға кәрәк. Муниципалитетта бөтә йүнәлештәр буйынса күләмле саралар планлаштырыла. Сифатлы башҡарырға, иҫкәрмәләрҙе һәм проблемаларҙы тиҙ арала бөтөрөргә кәрәк, – тип белдерҙе Хөкүмәт Рәйесе. Оҙайлы сроклы “Юл картаһы” проекты власть органдары һәм район хакимиәте тәҡдимдәре нигеҙендә формалаша. Документ 173 сараны үҙ эсенә ала, уларҙы 2030 йылға тиклем тормошҡа ашырыу күҙаллана. Улар торлаҡ-коммуналь хужалыҡтан һәм төҙөкләндереүҙән алып йәмәғәт именлеген һәм экологик именлекте тәьмин итеүгә тиклем төрлө өлкәләргә ҡағыла. Фото һәм мәғлүмәт сығанағы: pravitelstvorb.ru