“Технокемп” техник ижад менән шөғөлләнгән балаларҙы йыйҙы

19 июндә “Мәғариф” милли проектының (национальный проект “Образование”) “Һәр баланың уңышы” төбәк проектын һәм “Башҡортостан Республикаһында мәғарифты үҫтереү” дәүләт программаһын тормошҡа ашырыу сиктәрендә Стәрлетамаҡ районының “Башаҡ” балалар һауыҡтырыу лагерында техник ижад буйынса “Технокемп” республика профилле сменаһы эш башланы. Белеүебеҙсә, милли проекттар ил Президенты В.В. Путиндың май указдарына ярашлы ғәмәлгә ашырылып килә. Профилле смена 19-25 июндә уҙа. Бында Өфө, Стәрлетамаҡ, Салауат, Белорет, Мәләүез, Благовещен ҡалалары уҡыусылары, шулай уҡ Бөрйән, Шишмә, Тәтешле, Салауат, Әбйәлил райондарынан ағымдағы уҡыу йылында республика һәм бөтә Рәсәй техник йүнәлештәге сараларында еңеүселәр, призерҙар һәм әүҙем ҡатнашыусылар йыйылды. Лагерҙа балаларҙың һәр көнө ҡыҙыҡлы, файҙалы итеп уйланылған, улар «Йәйге лагерь яҡтыһы» инженер кейсын әҙерләне. Бәйгеселәр үҙ проекттары менән таныштырып, уны смена аҙағында эксперттар алдында яҡланы. Бер аҙна дауамында балалар командала эшләргә, креатив фекерләргә; үҙ эшмәкәрлеген анализларға, тиҙ ҡоролоусан конструкциялар төҙөргә өйрәнде. Профилле смена йомғаҡтары буйынса бөтә балаларға ла ҡатнашыусы сертификаты тапшырыла. Белешмә өсөн: Профилле сменаны ойоштороусылар булып Башҡортостан Республикаһының Мәғариф һәм фән министрлығы һәм Республика балалар белем биреү технопаркы сығыш яһай. Фото: БР Мәғариф һәм фән министрлығы.