24 июндә Башҡортостан Башлығы Радий Хәбиров рәйеслегендә үткән аҙналыҡ оператив кәңәшмәлә “Акрос РБ” ауыл хужалығы предприятиеһын үҫтереү мәсьәләләре тикшерелде. Ул агротехника һатыуҙа, хеҙмәтләндереүҙә һәм ремонтлауҙа махсуслаша. Предприятие директоры Артур Тимерғәлин “Акрос РБ” яуаплылығы сикләнгән йәмғиәтенең 2014 йылда ойошторолоуы хаҡында хәбәр итте. Бөгөн уның коллективында 100-ҙән ашыу белгес эшләй. Һуңғы өс йылда ғына компания Башҡортостан аграрийҙарына 574 техника берәмеге һатҡан. 2020 йылда төбәктең инвестиция комитеты Өфө районындағы “Акрос РБ” предприятиеһы майҙанында ауыл хужалығы техникаһы өсөн агрегаттар һәм запас частар сығарыу буйынса 1,5 мең квадрат метр майҙанда етештереү цехын төҙөү проектын хупланы. 2021 йылда “АгроКомплекс” халыҡ-ара махсуслаштырылған күргәҙмәһендә Башҡортостан Башлығы Радий Хәбиров яңы технологик комплекстың эшенә старт бирҙе. Инвестиция проектының киләһе этабын – ремонт-сервис үҙәге төҙөлөшөн – 2024 йылда тамамлау күҙаллана. Был башланғыстарҙы тормошҡа ашырыуға һалынған аҡсаның дөйөм күләме – 373 миллион һум, 40-тан ашыу яңы эш урыны булдырыу ҡаралған. Быйыл 1,4 мең квадрат метр майҙанда ремонт-келәт комплексын, шулай уҡ Өфө районының Зубов ауылында юл буйы сервисының күп функциялы комплексын төҙөй башлайҙар, тип өҫтәне Артур Тимерғәлин. Башҡортостан Башлығы “Акрос РБ” яуаплылығы сикләнгән йәмғиәте коллективына ауыл хужалығын үҫтереүгә ҙур өлөш индергәндәре өсөн рәхмәт белдерҙе һәм уңышлы эш теләне. - Предприятие йылдам үҫешә, яңы проекттарҙы тормошҡа ашыра. Был агросәнәғәт комплексының тотороҡло эшләүе өсөн бик мөһим, - тип билдәләне Радий Хәбиров. - Беҙ планлы рәүештә ауыл хужалығы техникаһы паркын яңыртабыҙ, һәм бындай компаниялар был эштә әүҙем ҡатнаша. Фото: Башҡортостан Башлығы сайты.