Октябрьскийҙа яңы бассейн төҙөлә

Башҡортостанда “Бизнес-спринт (Мин спортты һайлайым)” федераль проекты сиктәрендә алты ҙур спорт объекты төҙөлә. Был хаҡта республиканың спорт министры Руслан Хәбибов аҙналыҡ оператив кәңәшмә барышында белдерҙе. 2022 йылдан тормошҡа ашырылған “Бизнес-спринт” проекты концессия килешеүҙәре нигеҙендә дәүләт-шәхси партнерлыҡ сиктәрендә күмәк спорт инфраструктураһы объекттарын булдырыуҙы берлектә финанслауға федераль ҡаҙнанан субсидиялар биреүҙе күҙ уңында тота. Башҡортостанда “Бизнес-спринт” программаһы буйынса Өфөлә “Бал” универсаль спорт комплексы, Нефтекамала “Амфибия” спорт үҙәге, Октябрьскийҙа йөҙөү бассейны һәм Стәрлетамаҡта “Алға” физкультура-һауыҡтырыу комплексы төҙөлә. Ике объект сафҡа индерелгән дә инде – улар Өфөлә “Физра-Д” һәм “Физра-Р” физкультура-сәләмәтләндереү комплекстары. Был комплекстар төҙөлөшөнөң дөйөм хаҡы 3 миллиард һумдан ашыу тәшкил итә, шуның 1,4 миллиард һумы – инвесторҙар средстволары, 1,4 миллиард һумын федераль бюджет бүлә, 200,2 миллион һумы – Башҡортостан бюджеты һәм 49,7 миллион һумы – урындағы бюджеттар. Шулай итеп, әлеге проекттарҙы тормошҡа ашырыу өсөн республика ҡаҙнаһының һәм муниципалитеттарҙың аҡса күләме уларҙың хаҡынан 10 проценттан кәмерәк тәшкил итәсәк. Концессия килешеүенә ярашлы, объекттарҙы файҙаланыу менән концессионер үҙе шөғөлләнә, тип билдәләне Руслан Хәбибов. Был комплекстарҙы тотоу буйынса сығымдарҙа бюджет аҡсаһын экономияларға мөмкинлек бирә. Концессионерҙың бурысы - балалар спорт секциялары өсөн бушлай социаль сәғәттәр биреү. Оператив кәңәшмәлә Башҡортостан Башлығы Радий Хәбиров видеоконференцбәйләнеш режимында Октябрьскийҙа “Бизнес-старт” программаһы буйынса йөҙөү бассейны төҙөлөшөнә старт бирҙе. Буласаҡ объекттың хаҡы – 1 миллиард һумдан ашыу, шуның 786 миллион һумы – инвестор средстволары һәм 305 миллион һумы – федераль бюджет аҡсаһы. Тәүге этапта бында 25 метрлыҡ бассейн йыһазландырыу күҙалланғайны. Әммә инвестор ҡала хакимиәте ярҙамында, өҫтәмә сығымдарҙы үҙ өҫтөнә алып, 50 метрлыҡ бассейн төҙөргә ҡарар итте. Объектты 2026 йылдың аҙағына тиклем файҙаланыуға тапшырыу күҙаллана. – Октябрьский беҙҙә – Башҡортостандың иң спорт ҡалаларының береһе, - тине Радий Хәбиров. – Муниципалитеттың бурысы – инвесторҙарға ярҙам итеү һәм тиҙ арала бассейн төҙөү. Уны файҙаланыуға тапшырғандан һуң Октябрьскийҙа ҡеүәтле спорт кластеры буласаҡ. Фото: Башҡортостан Башлығы сайты.