Төбәк халҡынан тыш, Интернетта башҡорт телендәге ресурстар менән Ханты-Манси автономиялы округы - Югра һәм Силәбе өлкәһе ҡулланыусылары әүҙем ҡыҙыҡһына. Шулай уҡ тәүге бишәү иҫәбендә – Татарстан, Ырымбур өлкәһе һәм Ямал-Ненец автономиялы округы. Был мәғлүмәтте, абоненттарҙың тейешле сайттарға мөрәжәғәттәрен өйрәнгәндән һуң, "МегаФон" аналитиктары килтергән. 2024 йылда башҡорт телендәге порталдарға һәм сервистарға йүнәлтелгән дата-трафик, 2023 йылдың ошо уҡ осоро менән сағыштырғанда, 17 процентҡа артҡан. Онлайн-мәғлүмәттәрҙең 71 проценты – Башҡортостан халҡына, йәнә 29 проценты илдең башҡа төбәктәренән ҡулланыусыларға тура килә. Төньяҡ һәм Урал, Волга буйы буйынса күршеләрҙән тыш, Мәскәү, Санкт-Петербург ҡалалары һәм Краснодар крайы ла әүҙем. Иң популяр категория булып башҡорт телендәге киң мәғлүмәт саралары сайттары тора. Трафиктың яҡынса 50 проценты республиканың баш ҡалаһы һәм райондары тормошо хаҡында яңылыҡтарҙы уҡыуға китә, был өлкәлә «Башҡортостан» гәзите сайты алдынғылыҡты бирмәй. Был бик һөйөнөслө, беҙ көнө-төнө тырышып эшләйбеҙ. Артабан электрон һүҙлектәр килә, бында йышыраҡ ufa-all.ru ресурсынан файҙаланалар. Өсөнсө урында – башҡорт телен онлайн өйрәнеү сервистары. Башҡорт теле – Башҡортостан Республикаһының дәүләт теле. Бөтә Рәсәй халыҡ иҫәбен алыу мәғлүмәттәре буйынса, хәҙер илдә 1,09 миллион кеше башҡортса һөйләшә. Фото һәм сығанаҡ: "Мегафон".