29 июндә Башҡортостанда Йәштәр көнө үткәрелә. Ошоға бәйле республикала алкоголле эсемлектәрҙе берәмләп һатыу тыйыла. Был хаҡта Башҡортостандың Дәүләт Йыйылышы – Ҡоролтай Рәйесе Константин Толкачев хәбәр итте. – “Башҡортостан Республикаһында этил спирт, алкоголле һәм спирттан торған продукцияны етештереү һәм әйләнеш өлкәһендә эшмәкәрлекте көйләү тураһында”ғы законға ярашлы, Йәштәр көнөндә алкоголле продукцияны берәмләп һатыу тыйыла. 2022 йылға тиклем был байрам 27 июндә билдәләнә ине. Әммә Рәсәй Президенты Владимир Путин уны үҙгәртергә ҡушты. Хәҙер Рәсәйҙә Йәштәр көнө йәйҙең беренсе айының һуңғы шәмбеһендә үткәрелә, - тип хәбәр итте Константин Борисович. – Был тыйыу дөйөм туҡланыу предприятиеларына – ресторандарға һәм кафеларға – ҡағылмай. Улар эш режимын ғәҙәттәгесә дауам итә. Республика ҡануниәте тарафынан билдәләнгән киләһе алкоголһеҙ шәмбе Белем көнөндә була. Ул быйыл 2 сентябрҙә үткәрелә. БЕЛЕШМӘ: Башҡортостан Дәүләт Йыйылышы – Ҡоролтайҙың матбуғат хеҙмәте хәбәр итеүенсә, Башҡортостан биләмәһендә алкоголле продукция менән берәмләп сауҙа итеү түбәндәге көндәрҙә, дөйөм йәмәғәт туҡланыуы хеҙмәттәрен күрһәткәндә алкоголле продукцияны берәмләп һатыуҙан тыш, тыйыла: дөйөм белем биреү ойошмалары тарафынан “Һуңғы ҡыңғырау” сараһын ойошторған көндә; муниципаль районда, ҡала округында “Һабантуй” милли байрамын үткәргәндә; Йәштәр көнөндә; Белем көнөндә (1 сентябрҙә, әгәр 1 сентябрь йәкшәмбе көнөнә тура килһә, 2 сентябрҙә). Бынан тыш, Яңы йыл каникулында ла алкоголле эсемлектәрҙе берәмләп һатыу ваҡыты ҡыҫҡартыла. Айрат Нурмөхәмәтов фотоһы.