Башҡортостан спортсылары “БРИКС илдәренең спорт уйындары” (БРИКС уйындары) халыҡ-ара мультиспорт сараһында Рәсәй милли командаһы составында 20 миҙал яуланы. Республика Башлығы Радий Хәбиров аҙналыҡ оператив кәңәшмәлә ошо хаҡта хәбәр итте. БРИКС уйындары 12 июндән 23-өнә тиклем Татарстандың баш ҡалаһы Ҡазанда уҙҙы. 90 илдән 5 меңдән ашыу спортсы 27 спорт төрөндә көс һынашты. Илдең йыйылма командаһына һигеҙ дисциплина буйынса Башҡортостандан 18 вәкил инде. Улар иҫәбендә - каратэ, бадминтон, байдаркала һәм каноэла ишеү, фехтование, билбау көрәше, спорт көрәше, көрәш, бокс. – Беҙҙең спортсылар бик яҡшы сығыш яһаны – 12 алтын, ете көмөш һәм бер бронза миҙал яуланы, – тип билдәләне Радий Хәбиров. – Әйҙәгеҙ, улар менән осрашайыҡ, барыһын да тикшерербеҙ. Бындай осрашыуҙар юғары ҡаҙаныштар спортын үҫтереүгә яҡшы импульс бирә. Башҡортостан Башлығы Радий Хәбиров спортсыларға рәхмәт әйтте һәм республиканың Спорт министрлығына БРИКС уйындары еңеүселәрен һәм призерҙарын бүләкләү буйынса тәҡдимдәр әҙерләргә ҡушты. Белешмә: Юғары пробалы миҙалдарҙы Нохчо Лабазанов (грек-рим көрәше), Артур Зөлҡәрнәев (көрәш), Илья Первухин (байдаркала һәм каноэла ишеү), Алина Дәүләтова (бадминтон) - парлы һәм ҡатнаш разрядтарҙа, Эрнест Шәрәфетдинов (каратэ), Азалия Әминева (бокс), Тимур Сафин һәм Владислав Журавлев (рапира, команда беренселегендә), Алина Пухова, Замират Кусаева һәм Айнур Һыртаев (билбау көрәше) яуланы. Илья Первухин (байдаркала һәм каноэла ишеү) - 1 000 һәм 5 000 метр арауыҡта, Анна Кудрявцева (каратэ), Тимур Сафин (рапира) – шәхси беренселектә, Алёна Фәтихова, Илфак Ибәтуллин һәм Рәзил Шәбиев (билбау көрәше) көмөш миҙалдар яуланы. Бронза награданы Айгөл Садиҡова (каратэ) алып килде. Фото: Башҡортостан Башлығы сайты.