Иглин районында “Хәүефһеҙ сифатлы юлдар” милли проекты сиктәрендә Өфө – Охлебинин юлында асфальт-бетон япмаһы түшәй башланылар. Эштәр Ҡарамалы һәм Урунда араһында биш километр оҙонлоҡтағы участкала алып барыла. Бынан һуң юл хеҙмәткәрҙәре юл ситтәрен нығытасаҡ һәм термопластиктан юл тамғаларын төшөрәсәк. Юлдың ошо участкаһын ремонтлауға быйыл 76 миллион һумдан ашыу йүнәлтәләр. – Өфө – Охлебинин юлы Өфө һәм Иглин районының бик күп тораҡ пункттары араһында транспорт бәйләнешен тәьмин итә. Бынан тыш, был – туристик йүнәлеш тә. Әүҙем ял итергә яратыусылар ошо юлдан Өфөнән 50 километр алыҫлыҡтағы Охлебинин мәмерйәһенә тиклем бара, – тип һөйләне Башҡортостан Республикаһының транспорт һәм юл хужалығы министры вазифаһын башҡарыусы Любовь Минакова. Был участкалағы бөтә эштәрҙе 2024 йылдың өсөнсө кварталында тамамлау күҙаллана. Хәтерегеҙгә төшөрәбеҙ, 2024 йылда Башҡортостанда ошо милли проект сиктәрендә 148 километрҙан ашыу юлды, шул иҫәптән терәк юл селтәренә ингән 60 километрҙан ашыу юлды ремонтлау күҙаллана. Шулай уҡ эштәр 16 күпер ҡоролмаһында үткәреләсәк. Шуларҙан дөйөм оҙонлоғо 419 метрлыҡ һигеҙ күпер һәм юл үткәргесен быйыл файҙаланыуға тапшырыу күҙаллана. “Хәүефһеҙ сифатлы юлдар” милли проекты (национальный проект "Безопасные качественные дороги") “2030 йылға тиклемге осорға Рәсәй Федерацияһын үҫтереүҙең милли маҡсаттары һәм стратегик бурыстары тураһында” ил Президенты Владимир Путиндың Указы положениеларын үтәү маҡсатында Рәсәйҙең Транспорт министрлығы тарафынан әҙерләнгән. Милли проекттың масштабы бөтә илде солғап ала, унда Рәсәйҙең 84 субъекты ҡатнаша. Фото: Юл һәм транспорт министрлығы.