Еңеүселәрҙән ниндәй проект көтөргә?

Еңеүселәр иҫәбенә 33 коммерцияға ҡарамаған ойошма ингән, уларҙың проекттары 50 миллион һум күләмендә финанслау аласаҡ. Шуларҙан 15 ойошма тәүге тапҡыр республика Башлығы гранттары конкурсында еңеү яуланы, улар иҫәбендә – Дүртөйлө районы вәкилдәренең тәүге еңеүе. Республика муниципалитеттары араһында алдынғы урындарҙы Өфө ҡалаһы ойошмалары биләй – 17 дана, икенсе урында – Ғафури районы – ике проект. Еңеүселәр иҫәбендә шулай уҡ Рәсәйҙең дүрт төбәгенән ойошмалар бар: Пермь крайы, Мәскәү ҡалаһы, Силәбе һәм Свердловск өлкәләре. Еңеүселәр киләһе телдәр буйынса билдәләнде: башҡорт теле – 25, сыуаш теле – ике, мордва, удмурт һәм мари телдәре – берәр проект. Шулай уҡ өс проект күп телле: башҡорт, татар, рус һәм инглиз телдәрен үҙ эсенә ала. Ниндәй проекттар көтөргә кәрәк? Мәҫәлән, Туймазы районының Ермучино ауылында “Бишҡурай” этнолингвистик музей-тирмә ойоштороласаҡ, унда башҡорт телен уҡытыуға һәм популярлаштырыуға йүнәлтелгән оҫталыҡ дәрестәре уҙғарыласаҡ. Шулай уҡ мультимедиалы һәм интерактив ҡушымта рәүешендә “Бишҡурай” этнолингвистик һанлы продуктын әҙерләү күҙаллана. “Балалар һәм ата-әсәләр өсөн башҡорт этномәҙәни клубы” проекты сиктәрендә Мәскәү ҡалаһы һәм өлкәһе халҡы өсөн башҡорт әҙәбиәте, музыка һәм мәҙәниәте өлкәһендә ҡатнашыусыларҙың ижади потенциалын асыуға йүнәлтелгән башҡорт теле һәм мәҙәниәте дәрестәре уҙғарыла. Бәләбәй ҡалаһының Сыуаш гимназияһы муниципаль автономлы учреждениеһында “Еткер” медиаүҙәге проекты ғәмәлгә ашырыласаҡ. Ул сыуаш халҡының йолаларын яҡшыраҡ белергә һәм Башҡортостанда сыуаш телен популярлаштырырға ярҙам итәсәк. “Тел - халыҡ күңеле” дөйөм ҡала фестивале йомғаҡлау сараһы буласаҡ. Конкурс еңеүселәренең тулы исемлеге менән грантыглавы102.рф. сайтында танышырға мөмкин. Әлеге ваҡытта, 11 июндән 11 июлгә тиклем, киске сәғәт 5-кә тиклем, 2024 йылда граждандар йәмғиәте институттарын үҫтереүгә һәм социаль әһәмиәтле проекттарҙы тормошҡа ашырыуға Башҡортостан Республикаһы Башлығы гранттарының икенсе конкурсында ҡатнашыуға ғаризалар ҡабул ителә. Конкурста республиканың коммерцияға ҡарамаған ойошмалары ҡатнашып, 500 мең һумға тиклем аҡса алыу мөмкинлегенә эйә. Тулыраҡ мәғлүмәт менән Фонд сайтының “Конкурстар” бүлегендә танышырға мөмкин. Хәтерегеҙгә төшөрәбеҙ, 2020 йылдан Башҡортостан Республикаһы Башлығы гранттары фонды дөйөм 1 384 миллион һумлыҡ 629 проектҡа ярҙам итте.