Был аҙыҡтан күп кеше ағыуланған

Әҙер аҙыҡ ҡулланғандан һуң ботулизм менән зарарланған ауырыуҙарҙың Мәскәүҙә генә түгел, илдең башҡа төбәктәрендә лә таралыуы билдәле булды. Исемлектә – Мәскәү өлкәһе, Ҡазан, Нижегород өлкәһе... Ағыуланыусылар 200-гә етеп килә һәм был һандың тағы артыуы ихтимал. Ботулизмға юлыҡҡандарҙың күбеһе Мәскәүҙә асыҡланған. Был сир ни өсөн хәүефле? Уға ниндәй билдәләр хас? “Роспотребнадзор”ҙың Башҡортостан буйынса идаралығы белгестәренә ошо һорау менән мөрәжәғәт иттек. Беҙҙең республикала халыҡтың күмәкләп ботулизм менән ағыуланған осраҡтары күҙәтелгәнме? – Ботулизм – бик ауыр аҙыҡ токсикозы, аҙыҡ-түлеккә ботулотоксин эләккәндә башланыуы ихтимал. Ә уны орлоҡ күҙәнәктәре (споралар) етештереүсе Cl.botulinum таяҡсаһы барлыҡҡа килтерә. Бактерия споралары тирә-яҡ мөхиттә ныҡ таралған, түбән һәм юғары температураларға, химик факторҙарға һәм кибеүгә бик сыҙамлы. Биш-алты сәғәт ҡайнатҡандан һуң да үлмәйҙәр. Тоҙҙоң юғары концентрацияһы, шәкәрҙең күплеге һәм әселектең түбәнлеге спораларҙың шытыуын тотҡарлай. Ниндәй аҙыҡты “хәүефлеләр” рәтенә индереп була? Йорт шарттарында бәшмәк, йәшелсә, емеш-еләк, ит аҙыҡтарынан әҙерләнгән консервалар; тоҙланған, ыҫланған һәм ҡаҡланған балыҡ; сусҡа салоһы; заводта етештерелгән, әммә ҡапҡастары ҡабарып сыҡҡан, иҫкергән консервалар. Былтыр республикала йорт шарттарында консервалаланған бәшмәктәрҙе ашап ағыуланған осраҡтар булды. Шуға күрә консервалар әҙерләгәндә иҫкәртеү сараларын күҙәтеү мөһим, – ти “Роспотребнадзор” белгестәре. – Үлемесле инфекцияның төп билдәләре: баш ауыртыуы, йотоу һәм һөйләшеү, тын алыу ауырлашыуы, күҙ күреүе һәм мимиканың боҙолоуы, уҡшыу һәм ҡоҫоу, фалиж һуғыуы. Табип-инфекционист Елена Тихомолова әйтеүенсә, ботулизм илдә йыл һайын күҙәтелә. Башҡа йоғошло сирҙәрҙән айырмалы, уға температура күтәрелеүе һәм интоксикация хас түгел, йәғни сир эсәктә үҙгәрештәр тыуҙырмай, эс китеүе күҙәтелмәй. Бындай осраҡтар булһа ла, бик ҡыҫҡа ваҡытлы. Тәүге планға неврологик үҙгәрештәр сыға. Пациенттар күҙҙәр күреүе насарланыуына, томанланыуына зарлана, тын алыуы, йотоуы ауырлаша. Табиптың әйтеүенсә, ботулизмды махсус сыворотка – ауырыуҙың ҡанындағы токсинды нейтралләштереүсе антитоксин менән дауалайҙар. Температура режимы һаҡланмаған шарттарҙа аҙыҡтарҙың хәүеф сығанағы булыуы ихтимал. “Шуныһын да белегеҙ, токсиндың еҫе лә, тәме лә юҡ. Шуға күрә тәме һис үҙгәрмәгән аҙыҡтың да зарарлы, токсинлы булыуы мөмкин”, – тип иҫкәртә Елена Тихомолова. Ботулизм ваҡиғаһы ауырыуҙарҙы асыҡлау, дауалау, дауаханаларға урынлаштырыу, ”больничный”ҙар асыу кеүек мәшәҡәттәрҙән тыш, әллә күпме күҙгә күренмәгән эштәрҙе башҡарырға мәжбүр иткән. “Роспотребнадзор”ҙың Мәскәү буйынса идаралығы хеҙмәткәрҙәре ботулизм тыуҙырған аҙыҡты әҙерләү өсөн файҙаланылған 60 тоннанан ашыу аҙыҡ-түлекте тартып алған, меңдән ашыу кешенән һорау алыу һөҙөмтәһендә 76 ауырыуҙы асыҡлаған һәм бишеһен дауаханаға һалған... Тәфтиш комитеты күңелһеҙ ваҡиғаның төп сәбәпселәрен асыҡлау өҫтөндә эшләй, Рәсәй Енәйәт кодексының 238-се статьяһы буйынса енәйәт эштәре ҡуҙғатылған, барлығы хәүефле 172 тонна тауар әйләнештән алынған... Тағы ниндәй төбәктәргә ебәрелеүе мөмкин был хәүефле аҙыҡ-түлектең? Быныһын да оператив рәүештә асыҡлау мөһим. Тикшереү барышында бер нисә сит ил гражданының миграция тураһындағы ҡанундарҙы боҙоп, законһыҙ рәүештә теркәлеүе асыҡланған. Тимәк, "ағыулы фасоль” эҙемтәләрен тикшереү яңы закон боҙоу осраҡтарын асыҡлау менән бергә дауам итәсәк. Фото:Dzen.ru