Власть органдарын законһыҙ эштәр ҡылған намыҫһыҙ кешеләрҙән таҙартыу бара

Билдәле булыуынса, 13 июндә Башҡортостандың Йәштәр сәйәсәте буйынса дәүләт комитетының элекке рәйесе Яна Гайдук вазифа вәкәләттәрен арттырып үтәүҙә ғәйепләүгә бәйле һаҡ аҫтына алынды. Шулай уҡ Башҡортостандың элекке транспорт һәм юл хужалығы министры А.В. Клебановҡа ришүәт биреү буйынса эште тикшереү дауам итә. Мәғлүм булыуынса, 2023 йылдың 9 ноябрендә тәфтишселәр республиканың Йәштәр сәйәсәте буйынса дәүләт комитеты һәм Республика ирекмәндәр хәрәкәте һәм йәштәр башланғыстарына ярҙам итеү үҙәге хеҙмәткәрҙәренең вазифа вәкәләттәрен дөрөҫ файҙаланмауы факты буйынса енәйәт эше аса. 15 ноябрҙә иһә хоҡуҡ һаҡлау органдары Яна Гайдуктың фатирында тентеү үткәрә, быйыл 13 ғинуарҙа ул үҙ теләге менән вазифаһынан китә. 8 майҙа Башҡортостандың элекке транспорт министры Александр Клебанов ике айға тәфтиш изоляторына оҙаталар. Александр Клебановты айырыуса ҙур күләмдә ришүәт алыуҙа ғәйепләйҙәр — ул, "Башкиравтодор" ҙың директорҙар советы ағзаһы булараҡ, йөк ташыусы компаниянан биш миллион һум аҡса талап иткән. 16 майҙа Башҡортостандың Юғары Суды Өфөнөң Совет район судының Александр Клебановҡа һаҡ аҫтында ҡалдырыу сараһын һайлау тураһындағы ҡарарын үҙгәрешһеҙ ҡалдырҙы. Ул 7 июлгә тиклем һаҡ аҫтында була. Белеүебеҙсә, Александр Клебановты 7 майҙа ҡулға алалар. Шул уҡ көндө республика Башлығы Радий Хәбиров уны министр вазифаһынан бушатты. Тәфтишселәр фаразы буйынса, 2023 йылда Александр Клебанов, “Башкиравтодор” дәүләт предприятиеһының директорҙар советы ағзаһы булараҡ, подрядсы компания етәкселегенән инерт төҙөлөш материалдарын ташыуға килешеү буйынса ҡурсалау һәм ваҡытында түләүҙә ярҙам иткән өсөн 5 миллион һум талап иткән. Юғиһә министр эшҡыуарҙарға түләү алыуға ҡамасаулау менән янай. Компания етәкселеге күрһәтелгән сумманы тапшыра. Судта хәбәр итеүҙәренсә, министр “Киви” компанияһының топ-менеджментынан “аҡсаның тәғәйенләнеше тураһында белмәгән башҡа кеше” аша ришүәт алған. Республика Башлығына хоҡуҡ һаҡлау органдарының уның команда ағзаларына ҡарата ниәттәре тураһында тәүгеләрҙән булып хәбәр ителә. Радий Хәбиров бер нисә тапҡыр, үҙенең командаһында ҡаҙна бурҙарына һәм ришүәтселәргә урын юҡ, тип белдерҙе. Башҡортостан Башлығы власть органдарын законһыҙ эштәр ҡылған намыҫһыҙ кешеләрҙән таҙартыу буйынса хоҡуҡ һаҡлау органдары менән тығыҙ бәйләнештә тора. Республика Башлығы коррупционерҙарға ҡарата үҙ мөнәсәбәтендә ҡатылыҡ күрһәтә. Үҫергә теләгән чиновникка үҙенең ниәттәрен тормошҡа ашырыу мөмкинлеге тыуҙырыла, йыш ҡына был идара итеүҙә сикһеҙ вәкәләттәр биреү юлы менән эшләнә. Ҡыҙғанысҡа ҡаршы, юғары ышаныс күрһәткән чиновниктар үҙ вәкәләттәрен шәхси байығыу өсөн ҡуллана. Бындай чиновниктар идара итеү командаһынан төшөп ҡала, республика Башлығы уларҙы яҡламай һәм властың ришүәтселәрҙән үҙ-үҙен таҙартыу процесы бара. Бының сағыу миҫалы - Руслан Ҡазыхановтың ҡулға алыныуы. Был хәлдән һуң ул да Евразия фәнни-белем биреү үҙәгенең күҙәтеү советынан сығарыла һәм БР Башлығы кәңәшсеһе статусынан мәхрүм ителә. “Башспирт” акционерҙар йәмғиәтендә лә етәкселек алмашынды, унда генераль директор итеп БР Хөкүмәте Премьерүминистры урынбаҫары Рәйеф Әбдрәхимов тәғәйенләнде. Артабан Александр Клебановты эштән бушатыу, уның буйынса ла шәхси байыу маҡсатында енәйәттең кире ҡаҡҡыһыҙ дәлиле була. Борис Беляев һәм Рәмзил Күсәрбаев эше коррупцияға ҡағылмай. Коррупция кейсы буйынса хәлдә аныҡ булмаған сәбәптәр бар. Бының миҫалы булып Борис Беляев тора. Күмертауҙа таҙартыу ҡоролмалары төҙөлгән, чиновник байыу йәки ришүәт алыу өҫтәндә тотолмаған. Шуға ҡарамаҫтан, хоҡуҡ һаҡлау органдарының уға дәғүәһе бар. Шуға күрә хөкөм ҡарары белдерелгәнгә тиклем уны командала ҡалдырҙылар, судтың ғәйепләү ҡарары ғына чиновникты команданан сығарыу өсөн нигеҙ булып тора. Республика Башлығы дәүләт хеҙмәте вазифаһына элек ҡануниәт менән проблемалары булған йәки коррупцияға бәйле кадрҙарҙы бер ҡасан да тәғәйенләмәй. Уларҙың ҡайһылары тәғәйенләнгәндән һуң тормоштоң ымһындырғыс күренештәрен күтәрә алмай ришүәтселек менән шөғөлләнә - ундайҙар команданан төшөп ҡала. Ришүәт тәү сиратта әүҙем эш алып барылған һәм байтаҡ аҡса йүнәлтелгән өлкәләрҙә – юл төҙөлөшө, торлаҡ-коммуналь хужалыҡ, фән кеүек тармаҡтарҙа теркәлә. Ҙур финанс сараларын бүлеүгә йоғонто яһау кешене шашыуға килтерә. Йәмәғәтселек һәр ваҡыт коррупцияға ҡаршы көрәш талап итте, шул иҫәптән бөгөн дә был талап бар. Шуға ҡарамаҫтан, коррупцияға ҡаршы көрәш ҡатмарлы, сөнки, бер яҡтан, кешеләр ришүәтселекте кәметеүҙе һәм ундайҙарҙы ғәҙел язаға тарттырыуҙарын теләй, икенсе яҡтан, граждандарҙың күпселеге шәхси мәсьәләләрҙе хәл итеүҙе тиҙләтеү өсөн үҙҙәре лә закон боҙоу юлына баҫа. Һөҙөмтәлә коррупцияға ҡаршы көрәш мәғлүмәт өлкәһендә даими көнүҙәккә әйләнә, шул иҫәптән сәйәси көрәш ҡоралына әүерелә. Коррупцияға ҡаршы көрәште көсәйтеү - граждандарҙың һорауҙарына яуап биргән федераль эшмәкәрлек. Рәсәй Президентын һайлауҙан һуң Рәсәй Оборона министрлығы структураһында ҙур ҡулға алыуҙар башланды. Бынан алда Президент үҙенең Мөрәжәғәтнамәһендә, ”кеҫә тултырыу” менән шөғөлләнгәндәргә власть органдарында урын юҡ, тип билдәләне. Хәҙер бөтә ил буйынса власта ришүәтселәрҙе асыҡлау буйынса эш алып барыла. Марттан һуң тәртип һаҡлау органдарына был эште көсәйтеү һәм ҡулға алыу өсөн бар юлдар асылған, тип фаразларға була. Александр Клебанов та күптән түгел ҡулға алынған, әммә уның өсөн материалдар, моғайын, былтыр көҙ “Башкиравтодор” етәксеһе Илдар Юланов һәм уның иптәштәре ҡулға алынған саҡта булғандыр. Коррупция иҡтисад һәм инвестициялар булған ерҙә барлыҡҡа килә. Һуңғы йылдарҙа республика бында күп федераль финанслауҙы йәлеп итергә өлгәште. Өҫтәмә рәүештә республика иҡтисадҡа шәхси инвестициялар йүнәлтеүҙе көсәйтә. Былар барыһы ла йүнһеҙ хужаларҙа һәм ҡайһы бер чиновниктарҙа шәхси байыу өсөн мөмкинлектәрҙе файҙаланырға этәргес бирә. Фото сығанағы: https://t.me/rb_russia/18685