Бөгөн Башҡортостандың Милли музейында Башҡортостандың атҡаҙанған матбуғат һәм киң мәғлүмәт хеҙмәткәре, Рәсәй һәм Башҡортостан Журналистар союздары ағзаһы, "Башҡортостан" республика ижтимағи-сәйәси гәзитенең фотохәбәрсеһе, фоторәссам Айрат Нурмөхәмәтовтың 60 йәшлек юбилейына һәм ижади эшмәкәрлегенең 40 йыллығына арналған күргәҙмәһе асылды. "40 йыл мөғжизә эҙләгәндә” тип аталған экспозиция эсенә биш тиҫтәнән ашыу фотоһүрәт тупланған. Уларҙа – республика тормошоноң төрлө осорҙағы сағылышы, хеҙмәт кешеләре, билдәле шәхестәр. Ғөмүмән, Айрат Нурмөхәмәтов халыҡ-ара, Бөтә Рәсәй саралары барышын, республика етәкселегенең көндәлек эшмәкәрлеген генә түгел, ябай кешеләрҙе, көндәлек күренештәрҙе лә берҙәй сағыу һәм иҫтә ҡалырлыҡ итеп төшөрә. Уларҙың һәммәһен дә уртаҡ сифаттар берләштерә - фотолар иҫ киткес йәнле, йәмле, ундағы образдарҙың булмышын асып һала. Айрат Билал улы 1964 йылда Нуриман районының Иҫке Күл ауылында тыуған. 1982 йылда Өфө полиграфия училищеһын тамамлағас, йәш белгес Кострома өлкәһенең район гәзиттәренең береһендә фотохәбәрсе булып хеҙмәт юлын башлаған. Талантлы, сағыу ижади потенциалға һәм художестволы зауыҡҡа эйә фотохәбәрсе "Башҡортостан" гәзите редакцияһына 1985 йылдың мартында килгән. Республиканың төп ижтимағи-сәйәси баҫмаһының ҙур, татыу коллективына тиҙ арала берегеп, әлеге көнгәсә туған редакцияһына тоғро ҡала ул. Ғөмүмән, “Башҡортостан” тиһәк, гәзитте Айратһыҙ, Айрат Билал улын “Башҡортостан”һыҙ күҙ алдына килтереп булмай һымаҡ. Хәйер, башҡаса мөмкин дә түгел: билдәле фотохәбәрсенең барлыҡ хеҙмәт юлы тиерлек республиканың төп баҫмаһы менән бәйле, ҡырҡ йылға яҡын ул гәзиткә һөнәри тоғролоҡ менән хеҙмәт итә һәм күпселек осраҡта тап уның объективы аша беҙ республика тормошо менән төрлө яҡлап танышабыҙ. Айрат Билал улы уҡытыусылары тип билдәле фоторәссамдар Анатолий Виноградовты, Владимир Фоминды иҫәпләй. Хәйер, үҙе лә күптән остаз иҫәбендә – ижади эҙләнеү, ныҡышмалылыҡ һәм эшһөйәрлек хас Айрат Нурмөхәмәтовты уҡыусыһы тип иҫәпләгән фоторәссамдар бихисап. Күргәҙмә асыу тантанаһына Айрат Нурмөхәмәтовтың хеҙмәттәштәре, дуҫтары, фекерҙәштәре килгәйне. Бөтә донъя башҡорттары ҡоролтайы рәйесе, Башҡортостандың Дәүләт Йыйылышы-Ҡоролтай депутаты Юлдаш Йосопов фоторәссамды тантаналы көн менән ҡотлап, уға иң изге теләктәрҙе еткерҙе һәм ойошманың иң юғары наградаһын – “Ал да нур сәс халҡыңа!” миҙалын тапшырҙы. – Айрат Билал улы менән даими хеҙмәттәшлек итәбеҙ һәм төрлө йүнәлешле сараларҙы тап уның фотолары аша күрәбеҙ. Һис шикһеҙ, улар республика тормошо тарихында ҡаласаҡ. Артабан да халҡыбыҙ мәнфәғәтендә уңышлы ижад итергә, эшләргә яҙһын, - тине Юлдаш Мөхәммәт улы. Шулай уҡ күргәҙмә асыу тантанаһында “Башҡортостан” гәзитенең баш мөхәррире, Башҡортостан Журналистар сюзы рәйесе Вәдүт Исхаҡов, “Ағиҙел” журналы мөхәррире, журналист Мөнир Ҡунафин, Бөтә донъя башҡорттары ҡоролтайының Башҡарма комитеты ағзаһы, «Башҡортостан» телерадиокомпанияһы генераль директорының радиотапшырыуҙар буйынса урынбаҫары, Рәсәйҙең атҡаҙанған мәҙәниәт хеҙмәткәре Тәнзилә Үлмәҫбаева, билдәле фоторәссам Рәиф Баҙыҡов һәм башҡалар сығыш яһаны. Улар һәммәһе лә Айрат Нурмөхәмәтовтың һөнәри оҫталығын, фотоға төшөргән һәр геройы менән шунда уҡ уртаҡ тел табып, күңеленә күпер һала белеүен; ихласлыҡ, кешелеклелек кеүек күркәм сифаттарын билдәләне. Ысынлап та, көндәлек тормоштоң ҡәҙимге мәлдәрен дә сәнғәт әҫәренә әйләндерә белеү, тирә-яҡ донъяны башҡа күҙлектән күрһәтә алыу – ҙур һәләт, профессионалға хас һөнәри үҙенсәлек. Айрат Билал улына бөтмәҫ-төкәнмәҫ һалыҡ, ижади уңыштар һәм яңы үрҙәр теләп ҡалабыҙ! Уның хаҡында тулыраҡ мәҡәләне гәзиттең яҡындағы һанында уҡырһығыҙ. Фото: “Башҡортостан” редакцияһы