Бөтә Рәсәй эшкә урынлаштырыу йәрминкәһе ил Президенты ҡушыуы буйынса йыл һайын үткәрелә. Беренсеһе – төбәк этабы – 12 апрелдә онлайн форматта ойошторолдо. 28 июндә иһә Бөтә Рәсәй "Проффест. Рәсәй эше. Мөмкинлектәр ваҡыты" хеҙмәткә урынлаштырыуҙың федераль этабы старт алды. Йәрминкә саралары тотош ил буйлап ойошторолдо. Сараны асыу тантанаһында Башҡортостан Хөкүмәте Премьер-министрының беренсе урынбаҫары Урал Килсенбаев, республиканың ғаилә, хеҙмәт һәм халыҡты социаль яҡлау министры Ленара Иванова, Өфө ҡала хакимиәте башлығы Ратмир Мәүлиев һәм башҡалар ҡатнашты. – Кеше эшкә урынлашҡан һәм үҙенең һөнәри эшмәкәрлегендә тәүге аҙымдарын яһаған ваҡыт бик мөһим, сөнки уға күп нәмә бәйле. Әгәр ул дөрөҫ һөнәрҙе һайлаған икән, тимәк, тормошонда ла барыһы ла яҡшы буласаҡ. Шуға күрә бөгөнсө сара – йәштәр, үҫеп килгән быуын вәкилдәре өсөн мөһим осорҙарҙың береһе, – тип белдерҙе Урал Килсенбаев. “Рәсәй эше. Мөмкинлектәр ваҡыты” хеҙмәткә урынлаштырыу йәрминкәһе хыялланған эште табыу урынына әүерелде, хеҙмәт баҙарының яңы мөмкинлектәрен белеү урыны булды. Мәғариф ойошмаларының күргәҙмәһе лә сараға килеүселәрҙе үҙенә йәлеп итте. Һаулыҡ мөмкинлектәре сикләнгән кешеләр өсөн дә белгестәр эш табырға ярҙам итте. – Беҙ ҙур марафондың бер өлөшөнә әүерелдек. Унда һәр кем бар ерҙә эш биреүсенең кадрҙар эҙләүгә күп көс сарыф иткәнен аңланы. Дәүләттең, белем биреү ойошмаларының, эш биреүселәрҙең кеүек үҙенә ҡулайлы эш таба алһын өсөн шарттар тапшырыу, профориентацияны сифатлы ойоштороу мөһим, – тине Башҡортостандың ғаилә, хеҙмәт һәм халыҡты социаль яҡлау министры Ленара Иванова. Сараның төп маҡсаты эш табыуҙа ғына түгел, уны планлаштырыуҙа ла ярҙам итеү ине. Йәрминкәлә, вакансиялар менән бер рәттән, заман хеҙмәт мәшғүллеге мөмкинлектәре лә күрһәтелде. Өфөләге "Торатау" конгресс-холында республикалағы эш биреүселәр туғыҙ мең тирәһе вакансия тәҡдим итте. Уларҙың биш меңе тиерлек баш ҡалабыҙҙа ине. Бөтә Рәсәй онлайн-марафонға ярашлы, Өфөлә “Рәсәй эше. Төҙөү мәле: компанияла кадрҙар резервын булдырыу” йәрминкәһе үткәрелде. Әйткәндәй, ошо уҡ көндө “Торатау” конгресс-холы алдында “Өфө-450" флешмобы уҙҙы. Бынан тыш, төрлө лекторийҙар ойошторолдо. Мәҫәлән, “Кадрҙарҙы үҫтерәбеҙ” лекторийында профилле белгестәр ҡатнашты. Кадрҙарға мохтаж эш биреүселәр, юғары һәм урта белем биреү ойошмалары, мәшғүллек үҙәктәрендә файҙаланып булған хеҙмәттәр, һөнәрҙе үҙгәртеү – ошондай һорауҙар ҡаралды. Онлайн-марафон барышында сара спикерҙары хеҙмәт баҙары өсөн көнүҙәк булған мәсьәләләр – йәштәр мәшғүллеге, сәнәғәт секторын хеҙмәткәрҙәр менән тәьмин итеү, кадрҙар йәһәтенә алдан күҙаллау һәм башҡалар тураһында һөйләште. Әйткәндәй, Башҡортостан, “Демография” милли проектына ярашлы, мәшғүллек үҙәктәрен заманлаштырыу буйынса федераль пилот булараҡ сығыш яһай. Һөҙөмтәлә республикалағы халыҡты эш менән тәьмин итеү үҙәктәре үҙгәртелә. Илдә беренселәрҙән булып модулле кадр үҙәктәре барлыҡҡа килә. “Проффест. Рәсәй эше. Мөмкинлектәр ваҡыты” исеме аҫтында үткәрелгән йәрминкәнең федераль этабында эш биреүселәр хеҙмәткә урынлашыу шарттары, социаль гарантиялар тураһында ла һөйләне. Сараға килеүселәр бушлай һөнәри уҡыу, шул иҫәптән “Демография” милли проектына ярашлы, тураһында белде. Йәштәр төрлө оҫталыҡ дәрестәрендә, квест-уйындарҙа һәм башҡа сараларҙа ҡатнашты. Махсус хәрби операцияла ҡатнашыусылар һәм уларҙың ғаиләләре өсөн һөнәри әҙерлек, квалификацияны күтәреү, хеҙмәткә урынлаштырыу йәһәтенән консультациялар үткәрелде. “Кадрҙарҙы үҫтерәбеҙ” лекторийы үҙ эше оҫтаһы булырға телгәндәр өсөн отошло булһа, “Эшемде ойошторам” эшҡыуарлыҡ майҙансығы үҙ эшен асырға, уңышлы эшҡыуар булырға теләүселәр өсөн мауыҡтырғыс булды. Әйткәндәй, ошо көндө Сибай ҡалаһы тарихында үҙенсәлекле бит асылды. Бында, “Демография” милли проектына ярашлы, беренсе модулле кадрҙар үҙәге төҙөлөшө башланды. Айрат Нурмөхәмәтов фотолары.