Радий Хәбиров Белоруссия һәм Рәсәй төбәктәре форумының төбәк-ара хеҙмәттәшлек секцияһында сығыш яһаны

Тәүге эш көнөндә Радий Хәбиров «Беларусь союздаш дәүләтенең һәм Рәсәйҙең үҫешен тәьмин итеүҙең мөһим йүнәлеше булараҡ төбәк-ара хеҙмәттәшлекте үҫтереү» секцияһында сығыш яһаны. Полоцкиҙағы майҙансыҡта форумдың 200-ҙән ашыу делегаты йыйылды, улар власть, бизнес органдарының үҙ-ара эш итеү, шулай уҡ мәғариф, мәҙәни һәм туристик алмашыу мәсьәләләрен тикшерҙе. Секция эшен Беларусь Республикаһы Милли Йыйылышы Советының төбәк сәйәсәте һәм урындағы үҙидара буйынса даими комиссияһы рәйесе Леонид Заяц һәм Федерация Советының Федератив ҡоролош, төбәк сәйәсәте, урындағы үҙидара һәм Төньяҡ эштәре буйынса комитеты рәйесе Андрей Шевченко асты. – Рәсәй менән Беларусь Республикаһының хәҙерге ҡатмарлы шарттарҙа хеҙмәттәшлек итеү тәжрибәһенән күренеүенсә, төбәктәребеҙ артабан да сауҙа-иҡтисади, фәнни-техник, социаль-мәҙәни, гуманитар һәм интеллектуаль мөмкинлектәрҙе берләштерергә ниәтләй, – тине Андрей Шевченко. Башҡортостан белорус партнёрҙары менән хеҙмәттәшлек күрһәткестәре буйынса Рәсәйҙең алдынғы төбәктәре иҫәбенә инә, тип билдәләне ул. Андрей Шевченко билдәләүенсә, 2023 йылда Өфөлә үткән Рәсәй һәм Беларусь төбәктәре форумында хеҙмәттәшлек тураһында төрлө кимәлдә 102 документҡа, шул иҫәптән уртаҡ проекттарҙы тормошҡа ашырыу тураһында килешеүҙәргә ҡул ҡуйылған. Секцияла сығыш яһап, Рәсәйҙең иҡтисади үҫеш министры урынбаҫары Дмитрий Вольвач бындай башланғыстарҙы тормошҡа ашырыуҙың юғары темптарын билдәләне. Миҫал итеп ул Башҡортостанда тормошҡа ашырылған проекттарҙы атаны. – Төбәк башлыҡтары һәм муниципалитеттар килешеүҙәр нигеҙендә хеҙмәттәшлекте үҫтереүҙең «юл карталарын» һәм проекттарҙың тулы исемлеген төҙөй. Уртаҡ башланғыстарҙың ыңғай һөҙөмтәһен күрәбеҙ, – тине Дмитрий Вольвач. – Мәҫәлән, Башҡортостан менән Белоруссияның «АМКОДОР» холдингы яҡшы өлгө күрһәтә. Төбәктәр форумында 2023 йылдың көҙөндә асылған ауыл хужалығы ҡорамалдарын сығарыу буйынса «АМКОДОР-Ағиҙел» предприятиеһының төҙөлөш майҙансығында булдым. Проекттың ҙур тиҙлек менән тормошҡа ашырылыуы хөрмәт уята. Рәсәйҙең Белоруссиялағы илселеге кәңәшсеһе Пётр Фролов ил төбәктәренең Белоруссиялағы вәкиллектәре әүҙем үҫешеүен билдәләне. – Мәҫәлән, 2023 йылда Башҡортостандың Минскиҙа эшләүсе Конгресс-бюроһы офисы Рәсәйҙең Сауҙа вәкиллеге составындағы Башҡортостан Республикаһы вәкиллеге итеп үҙгәртелде, – тине Пётр Фролов. Республика Башлығы Радий Хәбиров үҙ сығышында Белоруссияның Башҡортостандың күп кенә хеҙмәттәшлек йүнәлештәре буйынса төп партнеры булыуын һыҙыҡ өҫтөнә алды. – Белорустарҙы бик талантлы һәм эшлекле сауҙа-иҡтисади партнерҙар тип беләбәҙ. Һөйләшелгәндәрҙең барыһын да «юл картаһына» индерәбеҙ, ул 400-ҙән ашыу пунктты үҙ эсенә ала. Уларҙың барыһы ла үҙ мәлендә үтәлә, - тип хәбәр итте Радий Хәбиров. – Мәҫәлән, 2023 йылда «АМКОДОР» холдингы менән берлектә икенсе предприятие төҙөлә башланы. Белоруссия машина эшләүселәренең тәжрибәһе нигеҙендә республикала ауыр төҙөлөш техникаһын сығара башлайбыҙ. Башҡортостан биләмәһендә Белоруссия менән берлектәге индустриаль технопарк булдырыу хеҙмәттәшлекте үҫтереүҙә киләһе аҙым буласаҡ, тип өҫтәне төбәк етәксеһе. Радий Хәбиров башҡа өлкәләрҙә лә проекттарҙы уңышлы тормошҡа ашырыу тәжрибәһе хаҡында һөйләне. Шулай итеп, былтыр Башҡортостандан 1 600 пенсионер «Башҡортостанда оҙон ғүмерлелек. Туризм» льготалы программаһы буйынса Беларусь Республикаһында булып ҡайтты. Радий Хәбиров шулай уҡ Белоруссия төбәктәрендә йәшәүселәрҙе Башҡортостанға саҡырҙы. Икенсе уртаҡ проект экология өлкәһенә ҡағыла. Һүҙ республика биләмәһендә белорус зубрҙары популяцияһын үҫтереү хаҡында бара. Сығышының аҙағында Радий Хәбиров ошо көндәрҙә Витебскиҙы немец-фашист илбаҫарҙарынан азат итеүгә 80 йыл тулыуға арналған тантаналы сараларҙа ҡатнашыуы хаҡында һөйләне. Төбәк етәксеһе Беларусь халҡына совет халҡы тарихына ихтирам менән ҡарағандары һәм йәш быуынды әхлаҡи тәрбиәләгәндәре өсөн рәхмәт белдерҙе. Секцияла ҡатнашыусыларҙың сығыштарынан һуң Рәсәй һәм Беларусь муниципалитеттары араһында хеҙмәттәшлек тураһында документҡа ҡул ҡуйыу тантанаһы үтте. Улар араһында – Салауат ҡалаһы һәм Гомель өлкәһенең Мозырь районы араһында туғандаш мөнәсәбәттәр урынлаштырыу тураһында килешеү. Документҡа Салауат ҡалаһы хакимиәте башлығы вазифаһын башҡарыусы Артур Рундау һәм Мозырь районы башҡарма комитеты рәйесе Елена Павлечко ҡул ҡуйҙы. Журналистар менән әңгәмәләшкәндә Башҡортостан Башлығы белорус партнёрҙары менән артабан үҙ-ара килешеп эш итеү мөмкинлектәре хаҡында һөйләне. – Беларусь менән хеҙмәттәшлек йылдам үҫешә. Иҡтисади эшмәкәрлектә мөһим сифат бар – ул рухи яҡынлыҡ һәм бер-беребеҙгә кешелекле мөнәсәбәт. Тарихыбыҙ, тамырҙарыбыҙ, дошмандарыбыҙ уртаҡ. Был берләштерә, – тине Радий Хәбиров. – Бөгөн беҙ импортты алмаштырыу һәм технологик суверенитет булдырыу проблемаларын бергәләп хәл итәбеҙ. Башҡортостанда бығаса беҙҙә булмаған яңы компетенциялар барлыҡҡа килә. Был – ғәмәлдәге бойҙай киптергестәр производствоһы, киләсәктә төҙөлөш техникаһын сығарырға йыйынабыҙ. Фото: www.glavarb.ru