Ишембай районының Яңы Әптек мәктәбендә спортҡа иғтибар элек-электән көслө, шуға ла күптәрҙең был шөғөлдө артабан да ташламауҙары ғәжәп тә түгел. Был тарафҡа эш сәфәребеҙ барышында Яңы Әптек ауылынан спортҡа мөкиббән Әлмира һәм Максим Слеповтар ғаиләһе менән танышыу форсаты тейҙе. Үкенескә ҡаршы, беҙ барғанда ғаилә башлығы эштә ине. Шулай булһа ла, әңгәмәбеҙ йәнле, тулы килеп сыҡты. Әлмира менән Максим икеһе лә Яңы Әптектекеләр, бер мәктәптә, бер класта уҡығандар. Бер-береһенә һөйөү хистәре лә үҫмер осоронда тоҡана. Әлмира егетте армияға оҙата, көтөп ала. Йылдар аша һыналған мөхәббәттәренә тоғро ҡалып, улар тиҙҙән өйләнешә. Максим рус егете булһа ла, йәштәр никах уҡытып, ғаилә ҡороп ебәрә. Хәҙер тормош һуҡмағынан бергә атлауҙарына ла 20 йыл ваҡыт үтеп киткән. Мәктәптән үк спортҡа ғашиҡ ҡыҙ Стәрлетамаҡ физкультура техникумына юллана. Уны уңышлы тамамлап, йәнтөйәгенә эшкә ҡайта. Физкультура уҡытыусыһы ғына түгел, бер осорҙа уға Яңы Әптек мәктәбенең директоры ла булып эшләргә тура килә. Бөгөнгө көндә, физкультуранан уҡытыуҙан тыш, директорҙың тәрбиә эштәре буйынса урынбаҫары вазифаһын уңышлы башҡара. Ауылдың йәмәғәт тормошонда ла ҡайнап йәшәй. Һәр кемдең үҙенең яратҡан шөғөлө бар. Әлмира еңел атлетика, волейболды яратһа, ире футбол, күпбәйгелә уңыштарға өлгәшә. Ғаилә ағзаларының барыһының да ГТО-ның алтын билдәләре танытмалары бар. Ҡыҙҙары Аделина менән улдары Вилдан да бәләкәйҙән спорт менән шөғөлләнеп үҫә. Аделина 2022 йылда районда ”Иң яҡшы спортсы” тигән исемгә лайыҡ була. Ул волейбол, теннисты айырыуса ярата. Мини-лапта буйынса мәктәп командаһының капитаны ла була. Был осорҙа дүрт йыл дауамында улар республикала икенсе урын яулайҙар. Бөгөн Аделина Өфө дәүләт нефть техник университетының Октябрьский ҡалаһындағы филиалында белем ала. Бында ла ҡыҙ – алдынғы студент. Үҙен төрлө яҡлап үҫтерә. Төркөмөнөң старостаһы, шулай уҡ ғилми-тикшеренеү эштәре менән дә уңышлы шөғөлләнә. Улдары Вилдан 5-се класта ғына уҡыһа ла, ҡаҙаныштары тураһында байтаҡ һөйләргә мөмкин. Балалар баҡсаһынан уҡ ул Гагарин кубогы олимпиадаһында физкультура буйынса беренсе урынды яулай. Өфөлә тыуған ҡалаһы исеменән сығыш яһай. Ихатала ғына спорт майҙансығы ҡоролоуы ла егет өсөн уңайлы. Киләсәктә ул үҙен полиция хеҙмәткәре йәки янғын һүндереүсе итеп күрә. Спорт ғаиләне берҙәм итә, ти Слеповтар. Уларҙың уңыштарына ҡарап та шулай тип әйтергә мөмкин. 2013 йылда “Йәш ғаилә” конкурсында муниципаль этапта Гран-при яулайҙар, ә республика кимәлендә “Әүҙем тормош позицияһын яҡтыртҡан өсөн” номинацияһына лайыҡ булалар. Ағиҙел ҡалаһында ғаилә командалары араһында уҙғарылған “Атай, әсәй һәм мин – спорт ғаиләһе” йәйге республика фестивалендә беренсе урынға сығыуҙары ла Слеповтарҙың спортҡа һәләтен сағылдыра. Ғаиләнең буш ваҡытта яратҡан шөғөлө – сәйәхәт итеү. Балалар бәләкәй саҡтан тәбиғәт ҡосағында әүҙем ял итеүгә күнеккән. Ғаилә ҡайҙа ғына булмаған. Ишембайҙың Күк-Ҡарауыҡ шарлауығында, Миәкәнең Нарыҫтауында, Күгәрсендең Мораҙым тарлауығында булғандар, Арҡайымды ла күреп ҡайтҡандар, Ырымбурҙың Тоҙ-Илегендә лә ял иткәндәр. - Спорт ғаиләне туплай, тәртипкә өндәй, ауырлыҡтарға түҙергә, һынауҙарҙы еңергә өйрәтә. Шуға ла спорт менән шөғөлләнгән кешеләр һәр ваҡыт уңышлы, – ти Слеповтар. Ғаиләне берҙәм иткән тағы ла бер матур шөғөлдәре бар. Улар йыл һайын күмәкләшеп боҙ һындар эшләп, ихаталарын Яңы йылға биҙәй. Район конкурстарында еңеү ҙә яулағандар. Ғаиләһенең уңыштары менән генә түгел, уҡыусыларының ҡаҙаныштары өсөн дә ғорурлана уҡытыусы. Мини-футбол, мини-лапта, теннис буйынса Яңы Әптек мәктәбе уҡыусылары алдынғылыҡты бирмәй. Әлмира Юнир ҡыҙының уҡыусылары араһында физкультура уҡытыусыһы, тренерҙар булып китеүселәр ҙә аҙ түгел. - Һәр кем спорт менән шөғөлләнергә тейеш, сөнки спорт – ул һаулыҡ, матурлыҡ. Рух ныҡлығын да үҫтерә, – ти әңгәмәсем. Хеҙмәт уңыштары өсөн былтыр ул Башҡортостандың Почет грамотаһы менән бүләкләнгән. Ғаиләһендә генә түгел, әллә күпме үҫмерҙең күңелендә лә спортҡа һөйөү уята алған физкультура уҡытыусыһы Әлмира Юнир ҡыҙының артабанғы көндәре лә уңыштарға бай булһын. Уның тормошҡа һәр ваҡыт ыңғай ҡарашы, һынауҙар алдында юғалып ҡалмауы ла тап ошо спортты яратыуына бәйлелер, тигән уйҙар тыуҙы уның менән хушлашҡанда. Фотолар авторҙыҡы һәм шәхси архивтан.