Алдаҡсыларҙы 7 миллион һумға байытҡандар. Башҡортостан Республикаһы буйынса Эске эштәр министрлығының дежур бүлегенә мутлашыу тураһында 23 ғариза алынған. Рәсәй Эске эштәр министрлығының Салауат ҡалаһы буйынса бүлегенә 74 йәшлек пенсионер мөрәжәғәт иткән. Майҙың уртаһынан бирле үҙҙәрен инвестиция компанияһы белгестәре тип таныштырған билдәһеҙ кешеләр шылтырата башлаған. Улар ҡыҫҡа ваҡыт эсендә ҙур килем алыу мөмкинлеге тураһында һөйләгән. Был тәҡдим ирҙе ныҡ ҡыҙыҡһындырған. Тәүҙә уға бер ай буйы килеменең нисек артасағын күрһәткәндәр. Ышандырырлыҡ булғандыр инде, ир аферистарға 1 миллион һумын ебәргән. Ә инде “артҡан” аҡсаны үҙ иҫәбенә күсерергә уйлағас, бер ни килеп сыҡмай, сөнки тиҙ аҡса эшләү ҡушымтаһы ялған була. Рәсәй Эске эштәр министрлығының Туймазы районы буйынса бүлегенә Райман ауылынан 62 йәшлек ир ҙә ошоға оҡшаш ғариза менән килә. Ошо айҙың 11-се көнөнән алып уға өҫтәмә хеҙмәт тәҡдим итеп шылтыратҡандар. 10 көн буйы ир килеменең нисек үҫеүен күҙәтә. Ул инвестицияға бәләкәй суммала аҡса һалып башлай һәм яйлап арттыра бара. Шулай итеп, алдаҡсыларға ир 700 мең һум күсерә. Был аҡсаның 290 меңен кредитҡа, 430 меңдән ашыуын иптәштәренән бурысҡа ала, тик 8 мең һумы ғына үҙенеке була. Билдәле, аҙаҡ бер һумын да кире сығара алмай – был мут әҙәмдәрҙең сираттағы алдау схемаһы. Ир банк һәм таныштарына ҙур бурыс менән тороп ҡала. Иғтибар! Башҡортостан Республикаһы буйынса Эске эштәр министрлығы иҫкәртә: Аҡса мәсьәләһендә ныҡ иғтибарлы булығыҙ. Билдәһеҙ әҙәмдәргә финанстарығыҙҙы ышанып тапшырмағыҙ. Инвестициялар тураһындағы ҡарарҙы белгестәр менән кәңәшләшеп кенә башҡарығыҙ. Иҫегеҙҙҙә тотоғоҙ: тиҙ һәм күп аҡса эшләү ысулы - алдаҡсыларҙың сираттағы тоҙағы.