26 июндә Архангел районына сәфәребеҙ барышында Абҙан ауылындағы "Өмөт" башҡорт халыҡ театры режиссеры Вәлимә Өмөтбаеваға "Башҡортостан" гәзитенең дипломын тапшырҙыҡ. Ул, билдәле булыуынса, баҫмабыҙҙың "Бәйләнештә" селтәрендәге төркөмөндә үткән "Халыҡ таланттары" конкурсында беренсе урынды яулағайны. Үҙ эшен ихлас яратып башҡарған, халыҡ һөйөүен яулаған, әүҙем, дәртле, ижади күңелле Вәлимә Ишбулды ҡыҙы Архангелдең йөҙөк ҡашы булған коллективҡа 2004 йылдан алып етәкселек итә. – Әле “Өмөт” башҡорт халыҡ театрында 18 – 74 йәшлек утыҙ самаһы кеше шөғөлләнә. Төрлө һөнәр эйәләре улар, – ти Вәлимә Ишбулды ҡыҙы. – Көнүҙәк проблемаларҙы күтәреп, халыҡҡа театрҙың кәрәклеген, әһәмиәтен аңлатырға тырышабыҙ. Өҫтәүенә беҙҙә “Осҡон” балалар театры эшләй – үҙебеҙгә алмаш тәрбиәләйбеҙ. Талантлы йәштәребеҙгә артабан республикабыҙҙағы сәнғәт уҡыу йорттарының театр бүлектәренә уҡырға инергә ярҙам итәбеҙ. Бик күп фестивалдәрҙә ҡатнашып, дипломдарға, лауреат исемдәренә лайыҡ булдыҡ. Төрлө райондарға, ауылдарға сығып спектаклдәребеҙҙе күрһәтәбеҙ. Һигеҙ актерыбыҙға “Өмөт” театрының атҡаҙанған артисы исемен бирҙек. Вәлимә Ишбулды ҡыҙы "Башҡортостан" гәзите редакцияһына төрлө һөнәр эйәләре араһында конкурстарҙы даими уҙғарғаны өсөн рәхмәт белдерҙе. "Һеҙ ошо рәүешле республикабыҙҙың төрлө райондарында эшләгән хеҙмәттәштәребеҙ менән таныштыраһығыҙ, тәжрибә өлгөләрен күрһәтәһегеҙ, күңелгә сәм, дәрт өҫтәйһегеҙ. Иғтибарҙан "ҡанаттар" үҫеп киткәндәй була. Рәхмәт һеҙгә", - тине Вәлимә Өмөтбаева. Ул ире Закир Зөфәр улы менән бергә музыкаль сәләм дә ебәрҙе - видеояҙманы тәҡдим итәбеҙ. Вәлимә Өмөтбаева, "Өмөт" театры артистары хаҡында гәзиттә сығасаҡ яҙмала уҡырһығыҙ. Автор фотоһы.