“Иң яҡшы дәүләт инженер-инспекторы” конкурсы һөҙөмтәһе билдәле

Бөгөн Өфөлә “Сфера” уҡыу үҙәге майҙансығында Башҡортостан Республикаһының Үҙйөрөшлө машиналарҙың һәм башҡа төр техниканың техник торошон күҙәтеү буйынса дәүләт комитетының (Гостехнадзор) инженер-инспекторҙар араһында “Иң яҡшы дәүләт инженер-инспекторы” республика конкурсының икенсе этабы үтте. Был сара республикала инде 14 йыл дауамында ойошторола һәм яҡшы традицияға әйләнгән. Һөнәри оҫталыҡ конкурсы быйыл республика сиктәренән сығып, Волга буйы федераль округы кимәлендә ойошторолдо, йәғни Рәсәйҙең башҡа төбәктәренә лә ҡатнашыу хоҡуғы бирелде. Ошо мөмкинлектән файҙаланып, Сыуаш Республикаһы, Һамар, Ырымбур, Киров, Пенза өлкәләренән дә конкурсанттар килде һәм үҙҙәренең һөнәри оҫталығын күрһәтте. Конкурс флагын күтәреү хоҡуғы 2023 йылда еңгән – республиканың Үҙйөрөшлө машиналарҙың һәм башҡа төр техниканың техник торошон күҙәтеү буйынса дәүләт комитетының Благовар районындағы секторы мөдире Илдар Уразмәтовҡа һәм Сибай ҡалаһындағы баш белгес Анна Степановаға бирелде. Сарала ҡатнашыусыларҙы тәбрикләп Үҙйөрөшлө машиналарҙың һәм башҡа төр техниканың техник торошон күҙәтеү буйынса дәүләт комитеты рәйесе Урал Салауат улы Искәндәров, БР Дәүләт Йыйылышы – Ҡоролтайҙың Аграр мәсьәләләр, экология һәм тәбиғәттән файҙаланыу буйынса комитеты рәйесенең беренсе урынбаҫары Рәил Рамаҙан улы Әбдрәхимов һәм башҡа ҡунаҡтар сығыш яһаны. Трактодромда “Һөнәре буйынса экскаватор-тейәүсе операторҙар араһында иң яҡшыһы” конкурсы еңеүсеһе – “Транснефть Урал” акционерҙар йәмғиәтенең машинисы Флорист Фәнүр улы Яушев экскаваторҙа үҙенең һөнәри оҫталығын күрһәтте, шулай уҡ тракторҙың сүмесе ярҙамында “Өфө” тип яҙҙы. Был һәләтле егет Туймазы районынан. Һигеҙ йыл экскаватор-тейәүсе операторы булып эшләй. “Һөнәрем оҡшай. Эшеңде яратып башҡарһаң, уңыш йылмая”, – тип белдерҙе ул. Әйткәндәй, егет Урал округында уҙған конкурста беренсе урын яулаған, хәҙер Рәсәй беренселегендә көсөн һынап ҡараясаҡ. Шулай уҡ "Сфера" уҡыу үҙәгенең йөрөргә өйрәтеү буйынса мастеры Флүр Ғүмәр улы Ҡолсурин тракторҙа фигуралы йөрөтөү элементтарында оҫталығын күрһәтте. Тәүҙә йәрәбә буйынса сығыш яһаусылар исемлеге билдәләнде. Артабан конкурсанттар трактодромда теория буйынса белемен, автомобиль-трактор полигонында үҙҙәренең һөнәри оҫталыҡтарын күрһәтте. Ошо уҡ ваҡытта Башҡортостан Республикаһының, Сыуаш Республикаһының, Һамар, Ырымбур, Киров, Пенза өлкәләренең Үҙйөрөшлө машиналарҙың һәм башҡа төр техниканың техник торошон күҙәтеү буйынса дәүләт комитеттары етәкселәре лә үҙйөрөшлө машинала йөрөү оҫталығын күрһәтте, мәргәнлектә көс һынашты. Конкурс мауыҡтырғыс булды, бер тында үтеп китте. Һөҙөмтәләр ҡыуаныслы ине, сөнки “Иң яҡшы дәүләт инженер-инспекторы” республика конкурсында беҙҙекеләр һынатманы. Үҙйөрөшлө машиналарҙың һәм башҡа төр техниканың техник торошон күҙәтеү буйынса дәүләт комитеттары етәкселәре араһында республиканың Үҙйөрөшлө машиналарҙың һәм башҡа төр техниканың техник торошон күҙәтеү буйынса дәүләт комитеты рәйесе Урал Салауат улы Искәндәров беренсе урын яуланы. Шулай уҡ Үҙйөрөшлө машиналарҙың һәм башҡа төр техниканың техник торошон күҙәтеү буйынса дәүләт комитетының Нуриман районындағы секторы мөдире Марсель Глус улы Сакаев “Иң яҡшы дәүләт инженер-инспекторы” исеменә лайыҡ булды. Конкурста ҡатнашҡан һәр кем ҡәнәғәт ҡалды. Үҙйөрөшлө машиналарҙың һәм башҡа төр техниканың техник торошон күҙәтеү буйынса дәүләт комитеты етәкселеге белдереүенсә, инженер-инспекторҙар тәүҙә үҙҙәре һөнәрҙең оҫтаһы, уның барлыҡ нескәлектәрен яҡшы белергә тейеш, шул саҡта башҡалар алдында ла ошондай талаптар ҡуя аласаҡтар. Рәмилә МУСИНА фотоһы.