Вуз-ара кампуста матбуғат туры үтте

Республика һәм федераль баҫмалар, телевизион каналдар журналистары Өфөләге вуз-ара кампустың фәнни лабораториялары һәм инновация майҙансыҡтары буйынса матбуғат турында ҡатнашты. Экскурсия Йәштәр көнө уңайынан ойошторолдо. Донъя кимәлендәге Евразия фәнни-белем биреү үҙәгенең вуз-ара студенттар кампусы тураһында фән үҫеше үҙәге булараҡ кампус директоры Сергей Гладких һөйләне. –Кампус төбәктең инновация һәм иҡтисад үҫешенә ҙур импульс буласаҡ. Шулай уҡ тикшеренеү эшмәкәрлеге үҫеше өсөн этәргес бирәсәк, студенттарҙы һәм ҡала халҡын үҙенә йәлеп итәсәк, - тине ул. Бөгөн кампустың икенсе сиратын төҙөү бара. Проект буйынса был 4300 урынға иҫәпләнгән студенттар ятағы, уҡыу блоктары, лабораториялар, геном үҙәге, шулай уҡ йәмәғәт-эшлекле киңлектәр һәм башҡа майҙансыҡтар. Геном үҙәге 5,5 мең квадрат метрға тиң дүрт ҡатлы бинала урынлашасаҡ. Был объекттың 2024 йыл аҙағында файҙаланыуға тапшырыу ниәтләнә. Вуз-ара кампустың тәүге этабын төҙөү былтыр декабрь айында тамамланды. IQ-паркта 21 лаборатория үҙ эшен башлаған да инде. Өфө фән һәм технологиялар университетының “Киләсәк моторҙары” тигән алдынғы мәктәп юғары һөҙөмтәле электр һәм гибрит көс ҡулайламалары, Рәсәйҙең хәрби һәм граждандар авиацияһы өсөн агрегаттар булдырыу буйынса ғилми-технологик бурыстарҙы башҡара. Йыл башынан алып алдынғы инженер мәктәбенә 1,2 миллиард һум федераль аҡса йәлеп ителгән. Өфө фән һәм технологиялар университетының популяция һәм медицина лабораторияһы башҡарған бурыстар ҙа бик мөһим. Бында “Сәләмәт оҙон ғүмерлелек” стратегик проекты сиктәрендә тикшеренеүҙәр алып барыла. Ғилми коллектив онкологик сирҙәргә килтереүсе гендарҙы анализлай. Был иһә уларҙы иртә диагностика мәлендә асыҡларға ярҙам итә. Күптән түгел асылған “Спаркс” киберспорты үҙәгендә Йәштәр сәйәсәте буйынса идаралыҡтың һанлы спорт үҫеше бүлеге һәм спортты программалау зонаһы урынлашасаҡ. Бында ҡатын-ҡыҙҙар араһында киберспортсыларҙың йыйылма командаһы тупланған. Ә Өфө фән һәм технологиялар университетының йыйылма командаһы Рәсәйҙең иң көслө студенттар киберкомандалары иҫәбенә инде. Башҡорт дәүләт медицина университетының аддитив технологиялар лабораторияһында “аҡыллы” импланттар етештереләсәк. Бында 3D принтерҙар ярҙамында йәш ғалимдар кеше һөйәктәренең, ҡан тамырҙарының күсермәһен эшләйәсәк. Аорта импланты ярҙамында кардиоүҙәктең пациентының ғүмерен һаҡлап ҡалыуға өлгәшкәндәр. Унда ошо уникаль операция эшләнгән. “Фарма-үҙәк”тә яңы алымдар ярҙамында яңы фармацевтика препараттарын эҙләү бара. Тикшеренеүҙәрҙең төп йүнәлеше – яңы матдәләрҙе синтезлау. Лабораторияла булдырылған ҡушымталар нигеҙендә үҙенсәлекле дарыуҙар эшләнәсәк. Улар йөрәк-ҡан тамырҙары сирҙәрен, депрессияларҙы, мейеләге ҡан әйләнеше боҙолоуын дауалауҙа ҡулланыласаҡ. Өфө дәүләт нефть техник университетының кибер-ательеһы хеҙмәткәрҙәре Башҡорт дәүләт медицина университеты коллегалары менән берлектә йығылыуҙарҙан һаҡлау өсөн “аҡыллы” кейем булдыра. Ғөмүмән, “кибер-ателье” һанлы фабрикалар прототибы. Унда кейемде проектлау процесы виртуаль технологиялар һәм робот техникаһы ҡулланыу һөҙөмтәһендә башҡарыла. Бында үҙеңде модельер, дизайнер ролендә һынарға мөмкин. Махсус программалар һәм ҡорамалдар ярҙамында виртуаль кейемдәр тегәләр. Яңыраҡ лабораторияла “Тегенсе робот” та барлыҡҡа килгән. Фото: Башҡортостан Хөкүмәте сайтынан.