Ведомство-ара комиссия ултырышы үтте

Бөгөн, 13 июндә, Өфөлә Башҡортостан Башлығы Радий Хәбиров һәм Ростех авиация комплексының индустриаль директоры Анатолий Сердюков республика менән Дәүләт корпорацияһы араһында хеҙмәттәшлекте үҫтереү буйынса ведомство-ара комиссия ултырышын үткәрҙе. Ул Өфө моторҙар эшләү берекмәһе майҙансығында ойошторолған. Башҡортостан Башлығы үҙ сығышында Ростех предприятиеларының республика үҫешенә индергән өлөшөн билдәләне. Берлектәге ведомство-ара комиссия ултырыштарында ҡабул ителгән ҡарарҙар ҙур әһәмиәткә эйә, тине. - Ведомство-ара комиссия форматында беҙ 2020 йылдан алып эшләйбеҙ. Беҙҙең осрашыуҙар конструктив һәм һөҙөмтәле, - тине Радий Хәбиров. - Ә өлгәшелгән бөтә килешеүҙәрҙе «юл картаһына» теркәйбеҙ һәм артабан уларҙың үтәлешен контролдә тотабыҙ. Ростех авиация комплексының индустриаль директоры Анатолий Сердюков шулай уҡ республика менән хеҙмәттәшлектең һөҙөмтәлелеген һәм төбәк биләмәһендә Дәүләт корпорацияһы предприятиеларының тотороҡло эшен юғары баһаланы. Ултырышта Ростех структураһына ингән республика предприятиеларының тотороҡло эшен тәьмин итеүҙең бер нисә көнүҙәк мәсьәләһе ҡаралды. Улар иҫәбендә - профессиональ кадрҙар әҙерләү. Билдәләп үтәйек, 2021 йылдан Башҡортостан Дәүләт корпорацияһы менән берлектә «Ростех ҡанаттары» проектын тормошҡа ашыра (Өфө фән һәм технологиялар университеты һәм Өфө моторҙар эшләү берекмәһе программаһы), уның сиктәрендә буласаҡ инженерҙар әҙерләнә. Тағы ла бер мөһим мәсьәлә – 2026 йылда Өфө моторҙар эшләү берекмәһенең 100 йыллығын байрам итеүгә әҙерлек. Юбилей саралары, Рәсәй Президенты Владимир Путин указына ярашлы, федераль статус алды. Кәңәшмәлә ҡатнашыусылар был йәһәттән берлектәге эш планын тикшерҙе. Ултырыш аҙағында Радий Хәбиров республика сәнәғәтен үҫтереүгә ҙур өлөш индергән өсөн Башҡортостандың дәүләт наградаларын тапшырҙы. Республика етәксеһе социаль селтәрҙәге шәхси битендә был осрашыуҙың мөһимлеген билдәләне. Унда түбәндәге һүҙҙәр бар: "Ростех Дәүләт корпорацияһы авиация комплексының индустриаль директоры Анатолий Эдуардович Сердюков менән ведомство-ара комиссиябыҙҙың сираттағы ултырышын үткәрҙек. Республиканың бөтә төп предприятиелары менән ошондай ведомство-ара комиссия төҙөлгән. Был беҙгә хәл-ваҡиғалар тураһында хәбәрҙар булырға һәм килеп тыуған проблемаларҙы хәл итергә мөмкинлек бирә. Бөгөн бер нисә мөһим мәсьәлә тикшерелде. Беренсенән, кадрҙар менән тәьмин итеү. Предприятиелар бик юғары әйләнештә эшләй, заказдар күләме арта, шуға күрә эшсе ҡулдар етмәй. Был мәсьәләне хәл итеү өсөн Мәғариф министрлығы ҡатнашлығында берҙәм «юл картаһы» бар. Икенсе мәсьәлә – Өфө моторҙар эшләү берекмәһе юбилейы. Рәсәй Президенты Өфө заводының 100 йыллығын байрам итеү тураһында Указға ҡул ҡуйҙы, был ваҡиғаны федераль кимәлдә билдәләйәсәкбеҙ. Өсөнсөһө - террорҙан һаҡланыу мәсьәләһе. Ростех контурындағы бөтә предприятиеларҙың да яҡшы, йәнле фазала булыуы мөһим. Бөтә урында ла етештереү күләме үткән квартал менән сағыштырғанда артҡан”. Фото: glavarb.ru