50 йыл сер һаҡлаған васыятты астылар

Бөгөн, 12 июндә, Башҡортостан Башлығы Радий Хәбиров “Өфө - хеҙмәт батырлығы ҡалаһы” стелаһына сәскәләр һалды. Бында ул 1974 йылғы “Ваҡыт капсулаһы”н асыу тантанаһында ҡатнашты. Ваҡыт капсулаһы – ул элекке быуындарҙан килгән киләсәк быуындарға мөрәжәғәте. Капсула идеяһын комсомолдың ҡала комитеты секретары Валерий Ижорский тәҡдим итә. Замандаштары хәтерләүенсә, капсула үҙе ярты метр оҙонлоҡтағы төргәкте хәтерләтә. Уны Башҡортостанда ҡойолған суйын корпусҡа һалып ҡуялар. Уны һалыу тантанаһында ВЛКСМ ағзалары, һуғыш һәм хеҙмәт ветерандары, шулай уҡ йәштәр вәкилдәре, атап әйткәндә, Моторҙар эшләү заводы көйләүсеһе Заһит Сәлмәнов, медицина хеҙмәткәре буласаҡ студент Владимир Гончаров, профессиональ техник училище уҡыусыһы Фәнүс Насретдинов, 100-сө мәктәптең уң флангыһы отряды пионеры Лариса Мартемьянова ҡатнашҡан. 1970 йылдарҙағы комсомолдар үҙҙәренең ҡаҙаныштары тураһында һөйләй һәм алыҫ йәштәштәре менән совет кешеһе исемен ҡәҙерләргә, яратҡан Ватаныбыҙҙың данын һәм байлығын арттырырға васыят итә. Бөгөн сарала 79 йәшлек Наил Таһир улы Бәхтизин, ваҡыт капсулаһын һалыу тантанаһында ҡатнашҡан 73 йәшлек Фәнүз Баязит улы Насретдинов һәм Өфө моторҙар эшләү берекмәһен ойоштороусы Заһит Сәлмәновтың һеңлеһе Флиза Сәлмәнова ла ҡатнашты. – Беҙ тарихи ваҡиғала ҡатнашабыҙ. 50 йыл элек, республикабыҙ баш ҡалаһының 400 йыллығын байрам итеү сиктәрендә, “Ваҡыт капсулаһы”на нигеҙ һалынды. Был хатты беҙгә, 21 быуат халҡына, ата-бабаларыбыҙ васыят иткәнсә, бөгөн асабыҙ. Был идеяның авторы һәм капсула һалыуҙа ҡатнашҡандарҙы айырыуса хөрмәт менән сәләмләргә теләйем. Бына улар – ул саҡтағы комсомол етәкселәре һәм әүҙемселәре, ә бөгөн хөрмәтле ветерандар Наил Бәхтизин, Фәнүз Насретдинов. Беҙ һеҙҙең менән бергә был тантанала ҡатнашыуыбыҙға шатбыҙ, – тине Башҡортостан Башлығы Радий Хәбиров. Радий Хәбиров өлкән быуындың хеҙмәт ҡаҙаныштарына һәр ваҡыт ҙур ихтирам менән ҡарауын, йыш ҡына тарихи хроникаға мөрәжәғәт итеүен, грандиоз төҙөлөштәргә, совет халҡының еңеүҙәренә, уңыштарына һәм ҡаҙаныштарына һоҡланыуын билдәләне. – Беҙ ул дәүерҙең лайыҡлы вариҫтары булырға тырышабыҙ. Үткән аҙнала ҙур делегация Петербург иҡтисади форумында ҡатнашты. Унда осрашыуҙар, кәңәшмәләр күп булды, һәм ҡайҙа ғына ҡатнашһаҡ та, республикабыҙҙы һәр ваҡыт лидерҙар иҫәбендә атанылар. Инвестициялар, сәнәғәт сәйәсәте, спорт, мәғариф, фән буйынса ла. Бөгөн беҙ, совет осорондағы кеүек үк, йыл һайын яңы предприятиелар, юлдар һәм күперҙәр, торлаҡ, мәктәптәр һәм балалар баҡсалары, дауаханалар һәм спорт комплекстары төҙөйбөҙ. Был йәһәттән ветерандарыбыҙҙың да ҡаҙанышы бар. Беҙгә һеҙҙең тәрбиәгеҙ, тәжрибәгеҙ һәм белемегеҙ бик ярҙам итә. “Ваҡыт капсулаһы”н асып, беҙ был тарихи бәйләнеште раҫлайбыҙ. Эстафетаны өлкән быуындан ҡабул итәбеҙ, ул киләсәк мотлаҡ бөгөнгөһөнән яҡшыраҡ булыр, уларҙың тоҡомдары мотлаҡ улар башлаған яҡтылыҡты һәм изгелекте дауам итер, тип ышана. Һәм беҙ уларҙың өмөттәре өсөн барыһын да эшләргә тейешбеҙ. Ватандаштарыбыҙ ҡалдырған төп наказ – Ватанды, уның азатлығын һәм бойондороҡһоҙлоғон яратыу һәм һаҡлау. Уның сәскә атыуы хаҡына уҡырға, эшләргә. Шуныһы мөһим: бөгөнгө йәштәр олатайҙарыбыҙҙың һәм оло олатайҙарыбыҙҙың батырлыҡтарының бөйөклөгөн аңлай. Уларҙың хәрби һәм хеҙмәт ҡаҙаныштары өсөн ғорурлыҡ тойғоһо кисерә. Быға махсус хәрби операция ла ҙур йоғонто яһай. Бөгөн беҙҙең балалар, олатай-өләсәйҙәре кеүек, Ватанды батырҙарса яҡлай. Улар менән беҙ ғорурланабыҙ, уларҙың лайыҡлы вариҫтары буласаҡбыҙ, – тине Радий Хәбиров. Республика Башлығы, быйыл юбилей йылында яңы ваҡыт капсулаһы һалынасаҡ, унда оло быуындарҙың йолаларына, уларҙың героик үткәненә тоғролоҡ һаҡлауыбыҙ, тыуған республикабыҙҙың артабанғы сәскә атыуы өсөн барыһын да эшләүебеҙ тураһында ғорурлыҡ менән яҙыласаҡ, тип белдерҙе. – Алдан билдәләнгән пландарҙы тормошҡа ашырасаҡбыҙ һәм эстафетаны киләсәк быуынға лайыҡлы тапшырасаҡбыҙ, улар 50 йылдан һуң ваҡыт капсулаһын асыр. Беҙ үҙебеҙҙән алда эшләгән кешеләр менән ғорурланабыҙ һәм уларҙың лайыҡлы вариҫтары булырға вәғәҙә итәбеҙ! – тине Радий Хәбиров. – Барығыҙҙы ла Рәсәй көнө, Өфө ҡалаһы көнө һәм ошо иҫ киткес ваҡиға менән ихлас ҡотлайым! Ветерандарыбыҙға оҙон ғүмер, һаулыҡ һәм бәхет! Барығыҙға ла, ҡәҙерле дуҫтар, именлек, тыныслыҡ һәм изгелек! “Беҙ тыуған илебеҙ, республикабыҙ, яҡшы граждан, кеше булырға кәрәклеге, ауыр осор кисереүебеҙ хаҡында шундай уҡ хәбәр ҡалдырасаҡбыҙ. Әммә беҙ бирешмәйәсәкбеҙ һәм киләсәк быуындарыбыҙға ныҡлы ил һәм ныҡлы республика тапшырырбыҙ, тип ышанам”, – тип һөйләне Радий Хәбиров капсуланы асыу тантанаһынан һуң. Олег Яровиков фотолары. Мәғлүмәт сығанағы: Башинформ