Тормошта шундай кешеләр осрай: улар һәр нәмәнән, шул иҫәптән эшенән дә йәм табып эшләй. Рәмзиә Ғайсар ҡыҙы Мозафарова – тап шундайҙарҙан. Ул - Архангел районы Заря фельдшер-акушерлыҡ пункты фельдшеры. Ошо уҡ райондың Арх-Латыш ауылында урта мәктәпте тамамлағандан һуң, Белорет медицина училищеһына уҡырға инә. Ҡулына диплом алған йәш белгес, оҙаҡ уйлап тормай, тыуған районында хеҙмәт итергә ҡарар итә. Башта – Ҡыҙыл Ырғыҙлы ауылында фельдшер, аҙаҡ “Ашығыс ярҙам”да, 1993 йылдан тыуған ауылында эшләй. Кейәүгә сыға. Рәмзиә Ғайсар ҡыҙы – биш бала әсәһе. “Барыһы ла белем алды, өсәүһе юғары белемгә эйә булды”, - ти ул. 2016 йылдан Убалар ауылын да ул хеҙмәтләндерә. “Эшемде яратам”, - ти Рәмзиә Мозафарова. Ә барлыҡ күңелеңде һалып башҡарған эш тә үҙ емешен бирмәй ҡалмай – халыҡ хөрмәте менән кире ҡайтыусан. Етеп килгән медицина хеҙмәткәрҙәре көнө айҡанлы “Башҡортостан” гәзитенең “Бәйләнештә” селтәрендә фельдшерҙар араһында үткәрелгән конкурста ҡатнашҡан Рәмзиә Мозафарова өсөн тауыш бирәйек, дуҫтар. Уға һәм уның коллегаларына һөнәри байрамдары айҡанлы изе теләктәрҙе юллайыҡ, лайктар ҡуяйыҡ. Фотолар: Рәмзиә Мозафарованың шәхси архивынан.