Ҡытай делегацияһы «Алексеевка» совхозының эше менән танышты

Ляонин провинцияһының Шэньян ҡалаһы мэры урынбаҫары Чжэн Бинь ханым етәкселегендәге Ҡытай Халыҡ Республикаһы делегацияһы «Алексеевка» агросәнәғәт комплексы» акционерҙар йәмғиәтендә булды. Хужалыҡ йыл әйләнәһенә йәшелсә, еләк-емеш һәм йәшел тәмләткестәр үҫтереү, шулай уҡ һөт продукцияһы етештереү менән шөғөлләнә. «Алексеевка» агросәнәғәт комплексы етәксеһе Дмитрий Овчинников предприятие буйлап экскурсия үткәрҙе, теплица комплексында ҡулланылған алдынғы технологиялар, предприятиела продукция етештереү, эшкәртеү, һаҡлау һәм фирма магазиндарында һатыу буйынса тулы ябыҡ цикл булдырылыуы тураһында һөйләне. - Шэньян ҡалаһы делегацияһы менән һөйләшеүҙәр һөҙөмтәһендә бер нисә килешеүгә өлгәштек. Мәҫәлән, Ҡытай компаниялары Башҡортостанда төрөү ҡорамалдарын етештереү, кукуруз һәм башҡа ауыл хужалығы культураларын үҫтереү өсөн ерҙәрҙе ҡуртымға алыу, шулай уҡ Башҡортостандан экологик яҡтан таҙа аҙыҡ-түлек тауарҙары, иген, ҡуҙаҡлы иген, майлы культуралар һатып алыу буйынса ниәттәрен белдерҙе. Беҙ иһә, үҙ сиратыбыҙҙа, уларҙан ауыл хужалығы техникаһы һатып алырға һәм был производстволарҙың бер өлөшөн төбәк биләмәһендә локалләштерергә әҙербеҙ, - тип уртаҡлашты Башҡортостан Республикаһының тышҡы иҡтисади бәйләнештәр һәм конгресс эшмәкәрлеге министры Маргарита Болычева. Билдәле булыуынса, «Алексеевка» агросәнәғәт комплексының теплица хужалығы 11,1 гектар майҙанды биләй. Сығарылған продукция ассортиментында 17-нән ашыу культура – 12 томат гибриды, 5 ҡыяр гибриды, баклажан, һуған, редис, борос һәм башҡа йәшелсә, емеш-еләк бар. Йыл һайын 11 500 тоннанан ашыу йәшелсә үҫтерелә. Белешмә өсөн: Федераль таможня хеҙмәтенең 2023 йылғы мәғлүмәттәре буйынса, Ҡытай Башҡортостан Республикаһының тышҡы сауҙа әйләнешендә 1 урынды биләй (24,3 процент өлөш). 2023 йыл йомғаҡтары буйынса экспорт машиналар эшләү продукцияһынан, химия сәнәғәте продукцияһынан, каучуктан, аҙыҡ-түлек тауарҙарынан һәм сеймалдан, минераль продукттарҙан, ағастан һәм целлюлоза-ҡағыҙ изделиеларынан, металдарҙан һәм уларҙан эшләнгән изделиеларҙан торған. 2023 йыл йомғаҡтары буйынса импорт машина эшләү продукцияһы, химия сәнәғәте продукцияһы, каучук, металл һәм уларҙан эшләнгән изделиелар, туҡыма һәм туҡыма әйберҙәр, башҡа тауарҙар, ағас һәм унан эшләнгән изделиелар, аҙыҡ-түлек тауарҙары һәм сеймал, минераль продукттарҙан торған. Сығанаҡ: pravitelstvorb.ru