Санкт-Петербургта халыҡ-ара иҡтисади форум тамамланды. Мин һеҙгә аҙна дауамында форум сиктәрендә республикабыҙ ниндәй һөҙөмтәләргә ирешеүен, Хәбировтың командаһы ниндәй эш башҡарыуын һөйләнем. Бөгөн иһә форум барышын күҙәткәндә яһалған һығымталарым менән бүлешергә теләйем. Форум тағы бер тапҡыр Көнбайыштың санкцияларҙа хаталаныуын күрһәтте: улар беҙҙең иҡтисадҡа йоғонто яһаны, әммә юҡ итмәне, ә киреһенсә күп кенә мөһим процестарҙы яңынан башлауға булышлыҡ итте. Бөгөн илгә 20 меңдән ашыу төрлө санкциялар һалынған. Башҡа дәүләттәргә ҡарағанда күберәк. Хатта көнбайыш элиталарҙың оҙаҡ ваҡыт “теше үтмәгән” Иран һәм Төньяҡ Корея ла бындай кимәлдә иҡтисади баҫым кисермәгән. Әммә беҙ булдыра алдыҡ, потенциалыбыҙ киләсәккә ышаныслы ҡарарға һәм технологик процестарҙа алдынғы урын биләү өсөн инновациялар индерергә мөмкинлек бирә. Бөгөн Беҙ Японияны уҙып киттек һәм донъяның иң ҙур иҡтисадтарының глобаль рейтингында дүртенсе урынды биләнек. Был – Бөтә донъя банкы мәғлүмәттәре. Әйткәндәй, ул – Рәсәйгә лояль булмаған ойошма. Эйе, был илдә йәшәү кимәле тиҙ арала күтәрелергә тейеш тигәнде аңлатмай, әммә Президент яҡын арала граждандарыбыҙҙың именлеген арттырыу бурысын ҡуйҙы. Рәсәйҙе сәйәси яҡтан изоляциялау теләге тормошҡа ашманы. Көнбайыш илдәре халыҡ-ара иҡтисади форумға ҡабат килмәй, әммә уларһыҙ ҙа форум вәкилле булып ҡала. Быйыл форумға 139 дәүләттең делегаттары килде. Бөгөн беҙҙең ил донъяның антиколониаль хәрәкәтенең лидеры булып тора. Шул уҡ ваҡытта һуңғы ике йылда элекке көнбайыш ”партнерҙарыбыҙ” Рәсәй баҙарында ҡалдырған урындарын күп кенә үҫешкән илдәр биләргә тырыша һәм хатта улар өсөн көрәш бара. Форумдың төп һөҙөмтәләренең береһе Владимир Владимирович Путин трафынан әйтелгән һүҙҙәрҙер, тип иҫәпләйем. Ул былай тине: “Төбәктәрҙең иҡтисади мөмкинлектәрен нығытасаҡбыҙ. Ошоноң менән бәйле, шул иҫәптән хөкүмәттә, беҙҙең эре корпорацияларҙың һәм дәүләт компанияларының баш структураларын федерация субъекттарына күсереү пландары тикшерелә. Был идея, һис шикһеҙ, эшкәртеүҙе талап итә, әммә иғтибарға һәм хуплауға лайыҡ”. Бындай ҡарар төбәктәрҙә иҡтисади фонды үҙгәртәсәк һәм уларға яңы үҫеш импульсы бирәсәк. Иҡтисади үҫештең төп маҡсаты элеккесә кеше, беҙҙең йәмғиәт булып ҡала. Һәм халыҡтың йәшәү сифаты үҫеше – дөрөҫ йүнәлештә хәрәкәт итеүебеҙҙең төп күрһәткесе. Шуға ла Рәсәйҙә киләһе йылдан хеҙмәткә түләүҙең минималь күләме (МРОТ) медиан эш хаҡына бәйләнәсәк. Петербург форумы Рәсәйҙең ҡатмарлыҡтарға ҡарамайынса үҫеүен һәм алға барыуын күрһәтте. Фото: Андрей Назаров.