16 июндә илдә изге байрам – Ҡорбан байрамы билдәләнә. Был көндө үткәреүгә әҙерлек буйынса Хөкүмәт кәңәшмәһендә һөйләшеү булды. Ветеринария буйынса дәүләт комитеты рәйесе Азат Йыһаншин әйтеүенсә, республиканың барлыҡ муниципаль берәмектәрендә район хакимиәттәре, дини ойошмалар һәм дәүләт ветеринария хеҙмәте менән берлектә 60-тан ашыу махсус мал һуйыу майҙансығы, шул иҫәптән Өфөлә ике мал һуйыу майҙансығы әҙерләнә. Өфөлә Зинин ҡасабаһы эргәһендәге “Карауан” сауҙа үҙәгендә – беренсе майҙансыҡ, Төньяҡ автовокзал биләмәһендә икенсеһе урынлаша. Яҡынса мәғлүмәттәр буйынса, уларҙа 3000 баштан ашыу, ә республика буйынса 8000 баштан ашыу ҡорбан малы һуйыласаҡ. – Йәнлектәрҙе һуйыу ветеринария хеҙмәте контроле аҫтында үткәрелә, бөтә ветеринария-санитария талаптарын иҫәпкә алабыҙ, – тине Азат Йыһаншин. – Хайуандар ветеринар-оҙатыу документтары нигеҙендә ҡабул ителә, малдар клиник тикшереүҙән һуң һуғымға оҙатыла, ә һуғым продукттары ветеринар-санитар экспертиза үткәндән һуң бирелә. Ҡалдыҡтар артабан утилләштереү өсөн махсус контейнерҙарға йыйыла. Ведомство етәксеһе Рәсәй Федерацияһы биләмәһендә эпизоотик хәлдең көсөргәнешле булып ҡалыуын билдәләне. Бигерәк тә йоғошло ауырыуҙар хәүеф тыуҙыра. 75 ауырыу араһында унауһы айырыуса хәүефле, шуларҙың етеһе кеше һәм хайуандар өсөн уртаҡ. Ошо шарттарҙы иҫәпкә алып, ветеринария хеҙмәте үҙ алдына клиник яҡтан һау-сәләмәт малды ғына ҡорбан салыу майҙансыҡтарына индерергә тигән өҫтөнлөклө бурыс ҡуя. - Махсус булдырылған һуғым майҙансыҡтарында ветеринария-санитария экспертизаһын үткәреү өсөн техника менән тәьмин ителгән ветеринар белгестәрҙең дежурлығы ойошторола, - тип асыҡлыҡ индерҙе Башҡортостандың баш ветеринары. Түшкәләргә һәм һуйылған продукттарға ветеринария-санитария экспертизаһы ҡорбан малын һуйыуҙы ойоштороуҙың айырылғыһыҙ өлөшө булып тора. Һәр һуйыу майҙансығына ветеринар табип-эксперт беркетелгән, ул продукцияны тулыһынса ҡарай. Эске ағзалар ауырыуҙары асыҡланған осраҡта, бындай органдар Рәсәй Федерацияһы Ауыл хужалығы министрлығы приказы менән раҫланған ҡағиҙәләргә ярашлы утилләштереләсәк. Һуйыу майҙансыҡтарын таҙартыу махсус хеҙмәттәрҙең техникаһын йәлеп итеп үткәрелә, майҙансыҡтарҙы ике тапҡыр дезинфекциялау дәүләт ветеринария хеҙмәте тарафынан махсус техника һәм дезинфекция ҡулайламалары ярҙамында башҡарыла. - Беҙҙең дини лидерҙар менән ниндәй ярҙам күрһәтеү кәрәклеге хаҡында һөйләшергә, кешеләргә ғибәҙәтханаларға килергә мөмкинлек бирергә кәрәк, - тине Башҡортостан Башлығы үҙенең хакимиәте етәксеһе Максим Забелинға. – Ҡорбан салыу байрамы, туғандар һәм яҡындар, мохтаж кешеләр менән уртаҡлашыу. Яҡшы мәғәнә, шуға күрә эшләгеҙ. Фото: cdum.ru