Социаль хеҙмәткәрҙәр көнө йыл һайын илебеҙҙә 8 июндә үткәрелә.Был иҫтәлекле көндә республиканың туғыҙ меңдән ашыу хеҙмәткәре һөнәри байрамын билдәләй. Байрам алдынан “Башҡортостан” дәүләт концерт залында тантаналы сара үтте. Байрамда ҡатнашыусыларҙы республиканың Дәүләт Йыйылышы- Ҡоролтай Рәйесе Костантин Толкачев сәләмләне. Ул айырыуса социаль хеҙмәткәрҙәрҙең махсус хәрби операцияла ҡатнашыусыларға һәм уларҙың ғаиләләренә ойошҡан рәүештә ярҙам итеүҙәрен билдәләне. Әле бик ҙур көсөргәнеш “Ғаилә” үҙәге белгестәренә һәм “ Ватанды яҡлаусылар” фонды филиалының социаль координаторҙарына төшә. Спикерҙың һүҙҙәренә ҡарағанда, республикала иғлан ителгән Һаулыҡ мөмкинлектәре сикләнгән кешеләр тураһында хәстәрлек йылы шулай уҡ төбәк өсөн үҙенсәлекле балалар тәрбиәләгән ғаиләләрҙе яҡлау, хеҙмәткә һәләтле йәштәге инвалидтарҙы эшкә урынлаштырыу, һөнәри уҡытыу, асыҡ мөхит булдырыу менән бәйле социаль бурыстарҙың өҫтөнлөклө икәнен раҫлай. Константин Толкачев тантанала ҡатнашыусыларға еңел булмаған хеҙмәттәре өсөн ҙур рәхмәт белдерҙе, рухи көс, һаулыҡ теләне. Ғаилә, хеҙмәт һәм халыҡты социаль яҡлау министры Ленара Иванова әйтеүенсә, эштең ҙур һөҙөмтәһе булып республикала күп балалы ғаиләләрҙең арта барыуын, етемдәрҙең кәмеүен билдәләргә мөмкин. Һуңғы өс йылда республикала етемдәр 1620-гә кәмегән. Етәксе Башҡортостандың күләмле федераль проекттар өсөн пилот майҙаны була барыуын әйтеп үтте. 800 кеше бөгөн өйҙә сифатлы социаль хеҙмәт ала. Ленара Иванова 2024 йылда социаль хеҙмәтләндереү өлкәһендә профессиональ оҫталыҡ буйынса Бөтә Рәсәй конкурсы еңеүселәренә наградалар тапшырҙы. Конкурстың төп маҡсаты –инициативалы, үҙ эштәренең ысын оҫталарын асыҡлау.Еңеүселәр ун номинацияла билдәләнде. Фото: https://mintrud.bashkortostan.ru/