Бер нисә йыл элек Хәйбулла районының Мәмбәт ауылында яңы фодулле фельдшер-акушерлыҡ пункты асылды. Уның мөдире, “Башҡортостан” гәзитенең “Бәйләнештә” селтәрендәге төркөмөндә барған конкурста ҡатнашҡан Фәрзәнә Ҡәйепова – төбәктәге тәжрибәле фельдшерҙарҙың береһе. Бөгөн Мәмбәттә бөтә заманса талаптарға һәм санитар нормаларға яуап биргән яҡты, йылы, уңайлы модулле фельдшер-акушерлыҡ пункты эшләй. Ул пациенттарҙы уңайлы шарттарҙа ҡабул итеү мөмкинлеген биргән кәрәкле ҡорамалдар менән йыһазландырылған. Бында фельдшер кабинеты, ҡаралыу, процедуралар бүлмәләре, килгәндәр өсөн көтөү урыны, хужалыҡ блогы, санузел, эҫе һәм һалҡын һыу бар. Билдәле булыуынса, һуңғы йылдарҙа республикабыҙҙа медицина тармағында ошондай ыңғай күренештәр һөйөндөрә. Фәрзәнә Ғәлийән ҡыҙы Сибай медицина училищеһын “Акушерлыҡ эше” белгеслеге буйынса тамамлаған. Икенсе курста белем алғанда Хәйбулла районының Мәмбәт ауылы егетенә кейәүгә сыҡҡан. Ире менән сирек быуаттан ашыу татыу ғүмер кисерәләр, дүрт улға ғүмер биргәндәр. Фәрзәнә Ҡәйепова 2016 йылда, быға тиклем эшләгән фельдшер хаҡлы ялға сыҡҡас, ошо һөнәр эйәһенә уҡып сыҡҡан. Хәҙер инде һигеҙ йыл фельдшер бурыстарын үтәй, күрше Сәғит ауылы халҡын да хеҙмәтләндерә. - Эшем шул тиклем оҡшай: кешеләргә ярҙам итергә яратам. Ә фельдшер ауылда ашығыс медицина ярҙамы күрһәтә, төрлө ауырыуҙарҙан иҫкәртеү сараларын күрә. Бер йыл инде матур һәм йылы фельдшер-акушерлыҡ пунктында эшләйем, - тип тәьҫораттары менән уртаҡлашты Фәрзәнә Ҡәйепова. – Беҙҙә диспансерлаштырыуҙың беренсе этабын үтергә мөмкин. Был иһә - анализдар тапшырыу, ЭКГ эшләү, тән ауырлығын үлсәү, барлыҡ ҡатындарға цитологияға анализ тапшырыу. Беҙҙә дефибриллятор һәм кислород баллоны бар. Эшенән дә, ғаиләһенән дә, тормошонан да йәм табып йәшәй Фәрзәнә Ғәлийән ҡыҙы. Быларҙың барыһы ла эшендә күркәм сағылыш таба. Ә был бик мөһим. Тиҙҙән конкурсанттарыбыҙҙың һөнәри байрамы – Медицина хеҙмәткәрҙәре көнө. Фәрзәнә Ғәлийән ҡыҙы өсөн тауыш бирәйек, лайктар ҡуяйыҡ һәм йылы һүҙҙәребеҙҙе яҙайыҡ. Тап байрам ваҡытында йылы һүҙҙәрҙе әйтеп ҡалырға кәрәк. Фотолар: Фәрзәнә Ҡәйепованың шәхси архивынан.